HIBRANI
1
HIBRANI
Anak Tuhan Labi Alanga min saga Malaꞌikat
1 Ma awal jaman lagiꞌ araran eꞌ Tuhan amasampay palmanna ni kaꞌmboꞌ-mboꞌantam labay min kanabi-nabihan, maka aheka ginisan lān bay pamasampayna. 2 Saguwāꞌ ma ahil jaman itu, Anakna ya amasampay palmanna ni kitam. Bay pinapanjari eꞌ Anak saga alam min kahandak Tuhan, maka ginꞌllal iya pinusakaꞌan kamemon ai-ai ma sakalingkal alam. 3 Takilāta sahaya Tuhan labay min Anakna, taꞌndaꞌta isab ma kajarihan Anak bang buwattingga kajarihan Tuhan. Tinayak na paꞌin alam itu eꞌ Anak sabab min kallamna kawasahan. Aubus paꞌin eꞌna angahinang lawang pamasussi manusiyaꞌ min dusa sigām, aningkōꞌ iya ma bihing Tuhan Sangat Kawasa, tampal ni kowan.
4 Jari pinabangsa Anak itu labi min saga malaꞌikat. Maka alanga isab ōn ya pamusakaꞌ Tuhan ma iya, labi alanga min ōn saga malaꞌikat. 5 Sabab halam aniyaꞌ malaꞌikat bay binissalahan eꞌ Tuhan buwat bay pamissalana ma Anakna, ya yuk-i,
“Kaꞌa ya Anakku, maka aku ya mmaꞌnu min llaw itu.”
Damikiyanna isab, halam aniyaꞌ malaꞌikat bay pinalmanan eꞌ Tuhan buwat ma ayat ītu, ya yuk-i,
“Mmaꞌna du aku,
maka anakku du iya.”
6 Aniyaꞌ isab bay pangallam eꞌ Tuhan ma waktu song pinabeyaꞌ Anakna tunggal-kawasahan piꞌitu ni deyom dunya, yuk-i,
“Subay iya pinudji eꞌ kamemon saga malaꞌikat Tuhan.”
7 Buwattitu isab pamissalana ma pasal bangsa malaꞌikat:
“Tahinangna bangsa malaꞌikat saliꞌ baliyu,
tahinang sosohoꞌanna saliꞌ dallet api.”
8 Malaingkan buwattitu pangallam Tuhan pasal Anakna:
“O Tuhan, anatas pagparintanu ni kasaumulan.
Abontol sadja kapagsultannu.
9 Kasulutan ka ma ai-ai abontol,
kabꞌnsihannu ai-ai alaꞌat.
Angkan ka pineneꞌ pinalanga eꞌ Tuhannu,
angkan ka binuwanan kakōgan maka kabantugan
labi giꞌ min bay pamuwanna ma kaseheꞌannu.”
10 Aniyaꞌ giꞌ pamissala dakayuꞌ, yuk-i,
“O Panghūꞌ, bay papanjarinu dunya itu ma awal tagnaꞌ.
Tangannu ya bay angahinang kalangit-langitan.
11 Palanyap du babaw dunya itu maka diyataꞌ ayan,
Magkaꞌndang kamemonna buwat sapantun sꞌmmek.
sagoꞌ kaꞌa ilu kakkal sadja.
12 Momosnu dunya maka langit buwat sꞌmmek nilūnan,
ati pindahannu ni saddī, buwat badjuꞌ.
Malaingkan kaꞌa ilu mbal magkapinda,
kakkal ka saumul-umul.”
13 Halam aniyaꞌ malaꞌikat bay binissalahan eꞌ Tuhan buwat pamissalana ma Anakna, ya yuk-i,
“Daiꞌ ka aningkōꞌ ma bihingku kowan,
sampay patꞌnnaꞌku palbantahannu kamemon,
ma deyoꞌ pād-tapeꞌnu.”
14 Na pagka buwattēꞌ, ai bahāꞌ saga malaꞌikat? Ginis umagad sigām pinabeyaꞌ eꞌ Tuhan anabang ma manusiyaꞌ ya makataimaꞌ kalappasan min Tuhan.