2
Pasal Kalappas Aheya
1 Pagka buwattēꞌ kawasa Anak Tuhan, subay isbatta panduꞌ bꞌnnal bay takaleta ma pasalna, supaya kita mbal tabowa palaran. 2 Sabab bang mbal katangkisan saraꞌ ya bay pinalatun eꞌ malaꞌikat ni kaꞌmboꞌ-mboꞌantam, maka bang sasuku makahinang kasāꞌan atawa dusa bay pinatꞌnnaꞌan kabinasahan pinapagtongod maka dusana, 3 na, buwattingga kita apuwas min mulkaꞌ bang palehomta kalappas landuꞌ aheya itu? Panghūꞌ Isa baranna bay magnasihat pasal kalappas itu, ati tinuman kasabꞌnnalanna eꞌ saga aꞌa bay makakale iya. 4 Tinapilan isab saksiꞌ sigām eꞌ Tuhan, pagka sigām buwananna barakat maghinang paltandaꞌan maka hinang kainu-inuhan aꞌa. Katulunan sigām ginis kapandayan min Rū Sussi, min kahandak Tuhan isab.
Si Isa ya Manglalappas
5 Na nggaꞌi ka bangsa malaꞌikat ya ginꞌllal eꞌ Tuhan makapagbayaꞌ ma dunya sinosōng ya pagsambatta itu. 6 Manusiyaꞌ ya pinapagbayaꞌ, buwat tasulat ma deyom Kitab, ya yuk-i,
“Ai kapūsan manusiyaꞌ angkan pagkaꞌinagonannu?
Ai anak manusiyaꞌ angkan parulinu?
7 Patꞌnnaꞌnu iya areyoꞌ dangkuriꞌ min bangsa malaꞌikat.
Buwanannu iya kasanglitan maka kabantugan,
8 sampay kapatut magbayaꞌ ma kamemon ai-ai.”
Bang ma bissala Kitab itu, aniyaꞌ kapatut pamuwan eꞌ Tuhan ma Anak Manusiyaꞌ boꞌ kapagbayaꞌan eꞌna ai-ai kamemon. Halam aniyaꞌ mbal tumabeyaꞌ pinagbayaꞌan. Malaingkan mbal giꞌ taꞌndaꞌta manusiyaꞌ magbayaꞌ ma kamemon. 9 Taꞌndaꞌta si Isa, ya bay pinareyoꞌ daiꞌ-daiꞌ min saga malaꞌikat, minahaldikaꞌan na maka sinanglitan ma sabab kamatayna gantiꞌ manusiyaꞌ kamemon, sabab min aseꞌ maka lasa Tuhan.
10 Tuhan ya poꞌonan ma kamemon maka kamattihan ma kamemon, angkan patut bang iya amasampulnaꞌ si Isa labay min saga kabinasahan bay kalabayanna. Aheka aꞌa tahinang panganak Tuhan bay binowa eꞌ si Isa ni kasahayaꞌanna, sabab iya ya pagmakōkan maka Manglalappas sigām.
11 Sinussi eꞌna pangatayan manusiyaꞌ, jari daꞌmmaꞌ iya maka saga aꞌa ya sinussi. Angkan iya mbal aiyaꞌ angaku in sigām danakanna. 12 Buwattitu ya bay pahꞌllingna ni Tuhan, yuk-i:
“Bissalahanku saga danakanku ma pasal kahinangannu.
Sanglitanta ka ma palhimpunan sigām.”
13 Yukna isab,
“Pasangdol aku ma Tuhan.”
Maka aniyaꞌ isab ayat dakayuꞌ, ya yuk-i,
“Itiyaꞌ aku maka dauranakan ya bay pamaipat aku eꞌ Tuhan.”
14 In niōnan dauranakan itu dalahaꞌ maka daisi sabab manusiyaꞌ sigām saliꞌ-saliꞌ, angkan si Isa bay tahinang manusiyaꞌ boꞌ supaya makananam kamatay. Jari itu, pagka kalabayanna kamatay, taraꞌug eꞌna nakuraꞌ saitan ya bay taga-gaꞌosan ma kamatay manusiyaꞌ. 15 Pagka buwattēꞌ kapangandaꞌug si Isa min nakuraꞌ saitan, tapalimaya eꞌna sasuku bay tabanyagaꞌ eꞌ tāw sigām ma kamatay, sangay lagiꞌ min kaondeꞌ sigām. 16 Atampal koꞌ itu, nggaꞌi ka malaꞌikat ya tinabang eꞌ si Isa, sagōꞌ saga panubuꞌ si Ibrahim.” 17 Ya itu sababanna angkan si Isa subay magsaliꞌ toꞌongan maka dauranakanna manusiyaꞌ boꞌ supaya tananamna ai-ai kalabayan sigām. Manjari maꞌaseꞌ iya maka kapangandolan, jari patut iya nihinang Imam Muwallam magpatiꞌllot ma sigām maka Tuhan boꞌ supaya aniyaꞌ kaꞌampunan dusa sigām. 18 Ma buwattinaꞌan makatabang na si Isa ma sasuku sinasat sabab bay kalabayanna sasat maka kabinasahan.