3
Si Isa Alanga min si Musa
1 Saga dauranakanku magpangandol ma si Isa, kaꞌam bay niabbita eꞌ Tuhan nihinang aꞌana, sohoꞌta na kam angannal ma pasal si Isa. Bay iya pinapiꞌitu eꞌ Tuhan nihinang Imam Muwallam ma agama ya pagsabꞌnnalantam. 2 Atukid asal iya ma hinangna tudju ni Tuhan, ya bay ameneꞌ iya magimam, buwat bay katukid si Musa maghinang ai-ai ma lumaꞌ okoman Tuhan. 3 Patut asal bang si Isa sinanglitan labi min si Musa. Buwat ibarat lumaꞌ, patut bang aꞌa maghinang lumaꞌ ya sinanglitan labi min lumaꞌ bay hinangna. 4 Minsan maingga lumaꞌ, aniyaꞌ bay makahinang iya, saguwāꞌ Tuhan ya makahinang kamemon ai-ai. 5 Sosohoꞌan Tuhan asal si Musa, atukid maghinang ai-ai ma deyom lumaꞌ Tuhan. Binissala eꞌna pasal palman Tuhan ya pinaluwas ma waktu sinōng. 6 Saguwāꞌ pangandolan Al-Masi pagka Anak tag-lumaꞌ iya, angkan tukiranna hinangna magbayaꞌ ma lumaꞌ Tuhan. Sapantun kitam lumaꞌ Tuhan kapagbayaꞌanna, bang paꞌin ahogot imantam maka kaholatantam.
Aniyaꞌ Pahalian ma saga Aꞌa Sukuꞌ Tuhan
7 Ya itu lapal min Rū Sussi, ya yuk-i,
“Ma llaw itu, bang takalebi suwala Tuhan,
8 daꞌa patuwasunbi kōkbi buwat bay kaꞌmboꞌ-mboꞌanbi,
waktu bay kapanulang sigām ma kabayaꞌanku,
waktu isab kapanukas sigām ma aku ma lahat paslangan.
9 Sinulayan na paꞌin aku eꞌ sigām, yuk Tuhan, tinukas na paꞌin,
minsan sigām bay makaꞌndaꞌ saga kahinanganku
ma deyom mpatpūꞌ tahun eꞌ.
10 Angkan apꞌddiꞌ atayku ma saga aꞌa inān.
‘Saga aꞌa itu,’ yukku, ‘mbal atꞌttog pameyaꞌ sigām ma aku.
Halam niꞌikut eꞌ sigām addat-tabiꞌat ya kabayaꞌanku.’
11 Bay aku angastol ati pagsapahanku sigām, yukku,
‘Saga aꞌa itu mbal toꞌongan pasōd ni lahat pahalian bay tagamaku.’ ”
12 Na, saga dauranakan, halliꞌinbi pikilanbi boꞌ supaya halam aniyaꞌ min kaꞌam maghinang kalaꞌatan, saga angꞌbbahan pangandolna, ati tabowa pataikut min Tuhan ya kakkal salama-lama. 13 Satꞌggol masi waktu niōnan “llaw itu”, subay kam magtabang-tiyabangi dapagkahian sakahabaꞌ waktu boꞌ pahogot imanbi, supaya kam mbal kaꞌakkalan eꞌ kalaꞌatan ati tabowa magmatuwas ma Tuhan. 14 Tantu kita dambeyaꞌan maka Al-Masi bang paꞌin isbatta pangandolta min tagnaꞌ sampay ni katapusan. 15 Buwat lapal sulat Kitab, ya yuk-i:
“Ma llaw itu, bang takalebi suwala Tuhan,
daꞌa patuwasunbi kōkbi buwat bay kaꞌmboꞌ-mboꞌan eꞌ,
ma waktu bay kapanulang sigām ma kabayaꞌan Tuhan.”
16 Na, sai pinagbissala itu, ya bay makakale suwala Tuhan saguwāꞌ anulang ma kabayaꞌanna? Ya na sigām kamemon bay pinagmundaꞌan eꞌ si Musa paluwas min lahat Misil. 17 Sai isab bay kinaꞌastolan eꞌ Tuhan ma deyom mpatpūꞌ tahun eꞌ? Ya na saga aꞌa bay makarusa, angkan sigām bay nilaglagan ma lahat paslangan eꞌ. 18 Maka sai isab taluwaꞌ sapahan Tuhan, ya yukna, “Saga aꞌa itu mbal toꞌongan pasōd ni pahalian bay tagamahanku sigām.” Ya taluwaꞌ sapa Tuhan inān, ya na saga bay anulang kabayaꞌanna. 19 Manjari kataꞌuwanta, halam bay makasōd saga aꞌa inān ni lahat pahalian sabab mbal magkahagad ma Tuhan.