4
1 Na, pagka masi taga-pūs bay panganjanjiꞌ Tuhan ma kitam, hatina in kitam makajari pasōd ni pahalian bay tagamana, angkan kita subay ahalliꞌ supaya halam aniyaꞌ min kitam mbal makaꞌabut pinasōd ni pahalian eꞌ. 2 Bay kitam makakale lapal ahāp min Tuhan, buwat bay pinakale ma kaꞌmboꞌ-mboꞌan eꞌ. Bay sigām makakale lapal sagōꞌ halam aniyaꞌ kahāpan taꞌāꞌ sigām minnēꞌ sabab halam bay amꞌnnal. 3 Sagōꞌ makasōd kitam ni pahalian bay tinagama eꞌ Tuhan, pagka amꞌnnal ma lapalna. Saguwāꞌ sasuku mbal amꞌnnal, mbal isab pasōd buwat bay pamissala eꞌ Tuhan, yuk-i,
“Astolan aku, ya poꞌon aku makasubali, yukku,
Saga aꞌa itu, mbal toꞌongan makasōd
ni deyom lahat pamahalianku sigām.”
Buwattēꞌ bay janjiꞌ Tuhan. Aniyaꞌ asal pahalian sabab ajukup hinang Tuhan sangay min waktu bay kapamapanjarina dunya. 4 Sabab aniyaꞌ tasulat ma deyom Kitab ma pasal llaw kapituꞌna, ya yuk-i, “Taꞌabut paꞌin llaw kapituꞌna, magtūy pahali Tuhan min hinangna kamemon sabab ajukup na.” 5 Niꞌisaban isab eꞌ Tuhan pahꞌllingna, , yukna, “Mbal toꞌongan makasōd saga aꞌa itu ni lahat bay tagamaku pahalian sigām.”
6 Jari halam bay makasōd ni deyom pahalian saga aꞌa bay makakale tagnaꞌ, sabab agagga sigām. Malaingkan aniyaꞌ aꞌa pinasōd, 7 sabab aniyaꞌ giꞌ llaw dakayuꞌ panganggantaꞌ eꞌ Tuhan ma manusiyaꞌ, ya pinagbahasa “Llaw Ītu”. Palabay paꞌin daka pilantahun min waktu kaꞌmboꞌ-mboꞌan eꞌ, niꞌisaban eꞌ Tuhan palmanna, pinabissala ma si Daꞌud, ati tasulat bissalana ma ayat Kitab bay pagbassata tagnaꞌ. Yuk-i,
“Ma llaw itu, bang takalebi palman Tuhan,
daꞌa patuwasunbi kōkbi.”
8 Bang si Yussaꞌ bay makabuwanan pahalian tantu ma bangsa Israꞌil ma masa awal inān, waktu tagnaꞌ, mbal bay amissala Tuhan pasal llaw saddī. 9 Sagōꞌ aniyaꞌ bissalana, maka aniyaꞌ pahalian ma aꞌa sukuꞌ Tuhan, 10 sabab sasuku makasōd ni deyom pahalian bay tinagamahan iya eꞌ Tuhan, pahali iya min hinangna buwat kahali Tuhan min bay hinangna. 11 Angkan kitam subay amuspus pasōd ni pahalian Tuhan, boꞌ supaya halam aniyaꞌ min kitam tinaikutan ma sabab kapameyaꞌna ma kajarihan saga aꞌa patigaggahun inān.
12 Pahōp asal palman Tuhan, maka apaslod. Atalom giꞌ labi min katalom kalis, ati paꞌabut toꞌongan ni deyom paltubu-tubuhanta maka ni palnyawahanta sampay ni sumsumta. Manjari ai-ai pinikil maka niniyat eꞌ manusiyaꞌ, tasilang sadja ma sabab palman Tuhan eꞌ. 13 Halam aniyaꞌ katapukan min pangꞌndaꞌ Tuhan ma ai-ai pinapanjari kamemon. Atampal sadja ma pangꞌndaꞌna, ati paharap du kitam ni iya ma sinosōng, magpasabꞌnnal ma pasal kamemon bay hinangta.
Si Isa Imam Muwallam Bangsahan
14 Na, aniyaꞌ ma kitam Imam Muwallam landuꞌ bangsahan, waꞌi na makasampay ni haddarat Tuhan. Ya na si Isa Anak Tuhan. Angkan subay ahogot pamogbogtam ma agama ya pagsabꞌnnalantam itu. 15 Sabab si Isa, ya Imamta Muwallam, landuꞌ maꞌaseꞌ ma kitam. Kataꞌuwanna asal kalammahantam sabab bay na kalabayanna sasat indaginis buwat makani-kitam. Ya sadja pagbiddaꞌanna, in iya halam bay makarusa. 16 Na, pagka aniyaꞌ ma kitam Imam Muwallam buwattēꞌ, subay mbal agꞌmma sumangattam pasekot ni haddarat Tuhan angamuꞌ tabang min iya, ya poꞌonan tabang. Tantu kitam kinaꞌaseꞌan maka tinabang ma waktu asigpit.