5
1 Na, in pasal Imam Muwallam bangsa Yahudi: bang aniyaꞌ pineneꞌ magimam muwallam, pineneꞌ iya min pagkahina manusiyaꞌ. Kawakilan iya maghinang ni Tuhan pagantiꞌ min pagkahina. Tinukbalan eꞌna lalabotan ni Tuhan, kinulban eꞌna saga hayop supaya aniyaꞌ pangampunan dusa saga aꞌa. 2 Biyaksa iya tꞌkkahan lamma angkan ahanunut eꞌna amissalahan saga aꞌa halam kapanduꞌan, aꞌa bay paokat min lān tudju ni Tuhan. 3 Nggaꞌi ka isab hal dusa aꞌa kaseheꞌan ya pinagkulbanan, sampay dusa baranna isab, sabab manusiyaꞌ iya magkalamma. 4 Halam aniyaꞌ anganggꞌllal di-na Imam Muwallam bang hal min baranna, saguwāꞌ Tuhan sadja ya ameneꞌ, buwat bay pameneꞌna ma si Harun waktu palabay.
5 Damikiyanna Al-Masi, halam iya bay maglaku-laku di-na in iya subay imam muwallam, saguwāꞌ Tuhan bay anganggꞌllal. Buwattitu pamissala Tuhan ma iya:
“Kaꞌa ya Anakku, maka aku ya mmaꞌnu min llaw itu.”
6 Aniyaꞌ isab bay pamissalana ma ayat saddī, ya yuk-i,
“Kaꞌa ya tahinang imam salama-lama tahun.
Saliꞌ du pagimamnu maka bay pagimam si Malkisadik waktu tagnaꞌ.”
7 Hinabu paꞌin si Isa ma dunya itu, bay iya angamuꞌ duwaꞌa maka anganjunjung ni Tuhan, ya taga-kapatut amuwasan iya min kamatay. Akosog panangisna sabuna angamuꞌ-ngamuꞌ, ati kinale iya eꞌ Tuhan ma sabab kapagmalulusna ma kahandakna. 8 Makananam si Isa katiksaꞌan minsan iya Anak Tuhan, manjari atukid pameyaꞌna ma panohoꞌan Tuhan pagka kapamintānganna tiksaꞌ inān. 9 Taꞌabut paꞌin iya atubus ma kamemon, tahinang iya tunggal manglalappas ma sasuku ameyaꞌ ma iya, boꞌ supaya sigām pinaniyaꞌan kallum kakkal. 10 Lāgi pinatꞌnnaꞌ iya Imam Muwallam eꞌ Tuhan, buwat bay kapagimam si Malkisadik ma masa awal eꞌ.
Imanta Subay Ginomgoman Pahāp
11 Na, aheka lagiꞌ arak pamataꞌu kami ma kaꞌam ma pasal inaꞌan-i, saguwāꞌ kahunitan aku amahati kaꞌam sabab agagga kam pinanduꞌan. 12 Atꞌggol na kapameyaꞌbi ma si Isa, sagōꞌ mbal giꞌ kam makapanduꞌ ma pagkahibi ilu. Subay aniyaꞌ aꞌa saddī amanduꞌan kaꞌam pabalik pasal lapal Tuhan. Saliꞌ kam hantang ondeꞌ-ondeꞌ ya mbal makakakan atuwas, subay hal gatas. 13 Bang aꞌa mbal makakakan saddī min gatas, masi iya ondeꞌ-ondeꞌ ya mbal giꞌ makapanilang ahāp maka alaꞌat. 14 Subay kam asangpot boꞌ yampa makakakan pagkakan atuwas. Hatulanna, bang aꞌa asangpot pangandolna, biyaksa iya amiꞌat baranna boꞌ tasilangna ahāp maka alaꞌat.