6
1 Angkanna, bang kitam bilahi asangpot ma kaul maka piꞌil, subay kitam angꞌbba min pamanduꞌ panagnaꞌan pasal Al-Masi, boꞌ palanjal ni pangadjiꞌ alalom-lalom. Daꞌa balikantam undang-undangan pasal pagtaikut min hinang halam taga-pūs maka pangandol ma Tuhan, 2 pasal pagpandi maka pagtꞌppak tangan, maka panduꞌ pasal pagpakallum aꞌa magpatayan maka hukuman kakkal. Bay na pangadjiꞌantam inaꞌan. 3 Jari pasangpot du pangitaꞌutam, bang karūlan isab eꞌ Tuhan.
4 Saupama aꞌa bay pinasawahan panahuꞌanna: bay makananam anughalaꞌ min sulgaꞌ maka bay makahampit kawasa min Rū Sussi. Bang aꞌa inān anaikutan pangandolna ma si Isa, tantu iya mbal makabāk kataubatan pabīng. 5 Bay na kalabayanna kahāpan min palman Tuhan maka tananamna isāb barakat min pagparintahan sinōng. 6 Sagōꞌ bang iya animanan pangandolna, tantu iya mbal makabāk pagsusunan atawa pagtaubatan pabalik. Sabab hatulanna, nilansang eꞌna Anak Tuhan ni hāg pabalik, nihinang iya panunggīngan aꞌa ma mata mairan pabīng.
7 Na, kitam manusiyaꞌ sapantun tanaꞌ paghumaꞌan. Bang araran kaulanan, pasulig mainaꞌan saga tinanom ya pagguna eꞌ aꞌa tag-huma. 8 Saguwāꞌ bang tanaꞌ hal patomoꞌan sagmot maka kayu-kayu itingan, halam aniyaꞌ kagunahanna. Taka-taka sinuknaꞌan ati tinunuꞌ ma katobtobanna.
9 Saguwāꞌ minsan buwattēꞌ pagbandaꞌku ma kaꞌam, saga bagay kalasahanku, makatantu kami in kaꞌam mbal magkabuwattēꞌ. Tantu kam kaniyaꞌan kahāpan ya pinasambeyaꞌ maka kalappasan kalabayanbi ilu. 10 Abontol asal Tuhan. Mbal takalipatna bay hinangbi ahāp sampay lasabi ma iya. Taꞌndaꞌ lasabi min panabangbi ma pagkahibi bebeyaꞌan si Isa, min tagnaꞌ sampay ni kabuwattinaꞌanan. 11 Ya sadja kabayaꞌan kami bang paꞌin ataptap katuyuꞌbi dangan maka dangan sampay taꞌabutbi kamaujuranna, boꞌ tatuman ai-ai holatbi min Tuhan. 12 Mbal kami bilahi bang kam maglisuꞌ-lisuꞌ. Ahāp lagiꞌ kam anengoran saga aꞌa anandalan haggut-pasuꞌ ma sabab pangandol sigām, ya angkan sigām makasambut panganjanjiꞌ Tuhan.
Tuman du Janjiꞌ Tuhan
13 Ma waktu kamattoꞌahan, aniyaꞌ janjiꞌ Tuhan ma si Ibrahim. Bay sapahanna isab janjiꞌna, ōnna dakayuꞌ-kayuꞌ ya pagsapahanna sabab halam aniyaꞌ alanga min ōnna. 14 Angallam iya ma si Ibrahim, yukna, “Ya itu janjiꞌku ma kaꞌa: barakatanta ka toꞌongan maka pahekaku saga panubuꞌnu.” 15 Halam sinumu si Ibrahim angalagaran Tuhan, angkan tasambutna kamemon bay panganjanjiꞌ ma iya.
16 Ya addat manusiyaꞌ bang anapa, subay aniyaꞌ pagsapahan liyu min sigām, jari asulut palkalaꞌ aꞌa duwangan bang makapagsapa na. 17 Ya kabayaꞌan Tuhan subay atampal toꞌongan bang ai maksudna maka bang buwattingga tatasna, angkan pinapagtapil janjiꞌna maka sapana. 18 Minnēꞌ kitam makatantu in janjiꞌ Tuhan mbal magkapinda sabab mbal kapindahan in duwa magtapil itu, mbal isab kapaliluhan eꞌ Tuhan. Angkan patꞌttog gom paꞌin imanta, sasuku kitam makabāk kasalamatan ma iya, ati amalut kitam ma kaholatan ya pamuwanna ma kitam. 19 Jari ahogot kaholatantam, saliꞌ sapantun sau mbal talaran minsan buwattingga kalandos sꞌllog. Angkan ahogot, sabab inaꞌan paengkot ma deyom Lumaꞌ Pangarapan ni Tuhan, ma haddaratna toꞌongan. 20 Bay na pareyom pinaꞌan si Isa, dahū min kitam, saliꞌ dalil imam magpatillot ma pasaltam. Tahinang na iya Imam Muwallam magimam salama-lama, buwat bay kapagimam si Malkisadik ma masa awal eꞌ.