7
Si Imam Malkisadik
1 Na in pasal sultan Malkisadik: si Malkisadik itu bay sultan ma lahat Salem ma masa awal eꞌ, maka imam isab iya ma Tuhan Mahatinggi. Jari dakayuꞌ llaw, hinabu si Ibrahim amoleꞌ min pangandaꞌugna ma saga sultan kuntarana, sinampang iya eꞌ Malkisadik maka sinibahatan eꞌna kahāpan. 2 Kabuwanan bahagiꞌ si Malkisadik eꞌ si Ibrahim, dambahagiꞌ min sangpūꞌ ma pangaltaꞌ bay taꞌagawna ma pagbonoꞌan. Bang nihati ōn Malkisadik itu, ‘Sultan Kaꞌadilan’ atawa ‘Sultan Kasannangan.’ 3 Halam aniyaꞌ salsila pasal si Malkisadik bang minningga pangkatanna. Mbal isab kataꞌuwanta bang buwattingga kapaganak ma iya maka bang sumiyan kamatayna. Dasaliꞌ iya maka Anak Tuhan, sabab anatas kapagimamna ni kasaumulan.
4 Kira-kirahunbi kabangsa si Malkisadik itu, sabab kabuwanan iya bahagiꞌ sangpūꞌ min pangaltaꞌ bay tataban eꞌ si Ibrahim, pangkattam landuꞌ abantug. 5 Aniyaꞌ panohoꞌan saraꞌ pinatꞌnnaꞌan saga panubuꞌ si Libi pasal kapagimam sigām. Sinōꞌ sigām animuk altaꞌ min pagkahi sigām tubuꞌ si Ibrahim, bahagiꞌ sangpūꞌ min kaniyaꞌ sigām. 6 Nggaꞌi ka panubuꞌ si Libi si Malkisadik itu, sagōꞌ makasambut iya bahagiꞌ min si Ibrahim. Jari si Ibrahim, aꞌa bay kapanganjanjiꞌan eꞌ Tuhan, bay niamuꞌan kahāpan eꞌ si Malkisadik. 7 Atampal koꞌ itu, ya aꞌa angamuꞌ kahāpan akawasa lagiꞌ min aꞌa ya niamuꞌan kahāpan. 8 Aꞌa magkamatay asal saga kaimaman Yahudi ya animuk bahagiꞌ altaꞌ min pagkahi sigām. Saguwāꞌ si Malkisadik itu, ya bay makasambut bahagiꞌ min si Ibrahim, tasulat ma deyom Kitab in iya taptap allum. 9 Taga-kapatut saga imam panubuꞌ si Libi animuk altaꞌ sagōꞌ tumabeyaꞌ si Libi ma mboꞌna si Ibrahim ma kapanukbal bahagiꞌ altaꞌ ni si Malkisadik. 10 Halam giꞌ bay nianakan si Libi ma waktu kapanukbal si Ibrahim eꞌ, sagōꞌ inaꞌan iya patanam ma deyom kuddarat mboꞌna.
Si Isa maka si Malkisadik
11 Na, ma waktu tagnaꞌ inān aniyaꞌ saraꞌ pamatꞌnnaꞌ eꞌ Tuhan ma bangsa Israꞌil, maka aniyaꞌ kaimaman panubuꞌ si Libi bay ginꞌllal magsuluhan. Manjari bang panubuꞌ si Libi itu bay taga-kawasa amasampulnaꞌ kajarihan saga pagkahi sigām, angay subay aniyaꞌ bowahan imam saddī buwat kapagimam si Malkisadik? Angay mbal bineyaꞌ kapagimam si Harun ya panubuꞌ si Libi? 12 Bang ginantiꞌan bowahan pagimam tagnaꞌ, subay ginantiꞌan isab saraꞌ ya pameyaꞌanna. 13-14 Atampal koꞌ itu, nggaꞌi ka panubuꞌ si Libi ya pagbissalahantam itu, sagōꞌ si Isa ya Panghūꞌtam. Saddī tubuꞌanna sabab panubuꞌ si Yuda iya, maka halam aniyaꞌ panubuꞌ si Yuda maghinang ma deyom Lumaꞌ Pangarapan ni Tuhan. Halam minsan sinambat eꞌ si Musa panubuꞌ si Yuda bang takdil ni imam.
15 Atampal toꞌongan, aniyaꞌ na imam saddī palahil, ma buwat kapagimam si Malkisadik. 16 Nggaꞌi ka saraꞌ atawa usulan manusiyaꞌ ya makabuwanan si Isa kapatut magimam, sagōꞌ nihinang iya imam ma sabab kawasana, pagka halam aniyaꞌ kahinapusan kallumna. 17 Buwat bay binissala ma deyom Kitab, ya yuk-i,
“Kaꞌa ya tahinang imam ma salama-lama tahun,
buwat bay kapagimam si Malkisadik.”
18 Pinapasan na bay saraꞌ tagnaꞌ pagka halam aniyaꞌ kosogna, halam aniyaꞌ kapūsanna. 19 Sabab halam aniyaꞌ bay tasussi pangatayanna ma sabab saraꞌ si Musa ya bogboganna. Maka aniyaꞌ na niholat saddī, labi ahāp min saraꞌ inān. Minnēꞌ kitam taga-kapatut pasekot ni Tuhan.
20 Aniyaꞌ giꞌ sapa Tuhan pinabeyaꞌ ma pagimam si Isa. Halam aniyaꞌ sapa ma saga imam tagnaꞌ, 21 saguwāꞌ si Isa tahinang imam labay min panapa Tuhan, ya yuk-i,
“Angallam Panghūꞌ ma pasalan kaꞌa, yukna,
‘Kaꞌa ya tahinang imam sampay ni kasaumulan.’
Mbal toꞌongan apinda sapa pangallamna itu.”
22 Na pagka buwattēꞌ, labi ahāp kapagsulutan bahaꞌu itu, ya niumbangan eꞌ si Isa.
23 Aniyaꞌ giꞌ pagbiddaꞌan saga imam tagnaꞌ maka si Isa. Magkamatay asal saga imam tagnaꞌ inān, angkan subay aheka boꞌ aniyaꞌ na paꞌin pagantiꞌ. 24 Saguwāꞌ halam aniyaꞌ gantiꞌ si Isa sabab allum iya salama-lama. 25 Angkan iya makagaꞌos angalappas toꞌongan ma sasuku angandol ma iya, boꞌ supaya makapagsekot maka Tuhan. Makalappas iya min buwattinaꞌan sampay ni kasaumulan sabab allum iya salama-lama anganjunjung ni Tuhan ma pasalan sigām.
26 Manjari Imamtam Muwallam si Isa, ya ataꞌu anabangan kitam. Asussi pangatayanna, halam aniyaꞌ tamakna. Pinabiddaꞌ iya min manusiyaꞌ dusahan ati pinalanga iya ma deyom sulgaꞌ. 27 Biddaꞌ isab iya min saga Imam Muwallam kaseheꞌan inān. Taga-kapatut sigām anukbalan susumbaliꞌan llaw-llaw pamapuwas dusa. Dusa baran sigām ya pinuwas dahū, boꞌ yampa dusa kaseheꞌan. Sumaguwāꞌ mbal magkagunahan buwattēꞌ si Isa. Pinamintꞌdda panukbalna pagkulban ni Tuhan pamapuwas dusa manusiyaꞌ kamemon, pagka paglillaꞌna baranna ni kamatay. 28 Bang ma saraꞌ si Musa, manusiyaꞌ sallaꞌan ya pinatꞌnnaꞌ magimam-nakuraꞌ. Saguwāꞌ labi ajatu pangwakil Tuhan ma Anakna sabab min janjiꞌna ahogot, damuli lagiꞌ min waktu kapamuwan saraꞌ. Jari Anakna, ya halam aniyaꞌ sallaꞌ-sallaꞌna, tahinang Imam Muwallam sampay ni kasaumulan.