8
Si Isa ya Imam Muwallam
1 Na, ya na itu toꞌongan maksud pagbissalahantam: aniyaꞌ ma kitam Imam Muwallam buwat bay bissalaku heꞌ. Inaꞌan iya ma haddarat Tuhan Sangat Kawasa, aningkōꞌ ma bihingna tampal ni kowan. 2 Inaꞌan iya magimam ma pangarapan mahasussi, hatina ma langgal toꞌongan ya bay nihinang eꞌ Panghūꞌ, nggaꞌi ka eꞌ manusiyaꞌ.
3 Ya angkan aniyaꞌ imam muwallam pinatꞌnnaꞌ, sabab anukbalan sigām lalabotan saga manusiyaꞌ ni Tuhan, sampay susumbaliꞌan ya pagkulban sigām. Damikiyanna Imamtam Muwallam, subay aniyaꞌ panukbalna ni Tuhan. 4 Bang iya bay ma dunya lagiꞌ, mbal iya makapagimam sabab aniyaꞌ asal imam maitu pinatꞌnnaꞌ anukbalan lalabotan saga aꞌa ni Tuhan ma buwat usulan saraꞌ Yahudi. 5 Sagōꞌ ya nihinang eꞌ imam ma dunya itu nggaꞌi ka kabꞌnnalanna. Saliꞌ lambung sadja atawa pattaꞌ ma hinang toꞌongan, ya nihinang ma deyom sulgaꞌ. Buwattēꞌ isab bay kahinangan si Musa ma masa awal eꞌ, ma songna maghinang langgal tolda. Bay iya binandaꞌan eꞌ Tuhan, yuk-i, “Amay-amay, beyaꞌin suntuꞌan langgal bay paꞌndaꞌanku ni kaꞌa ma diyataꞌ būd.” 6 Sagōꞌ kapagimam ya pamahinang ma si Isa, aheya toꞌongan lagiꞌ min kapagimam saga aꞌa ma dunya. Labi ahāp isab kapagsulutan bahaꞌu ya paghāpan manusiyaꞌ maka Tuhan ma sabab si Isa, maka labi ahāp paljanjiꞌan ya amuwan kajatuhan.
7 Bang bay halam aniyaꞌ sallaꞌ ma kapagsulutan tagnaꞌ, mbal bay ginantiꞌan ni saddī, 8 sagōꞌ tasoway eꞌ Tuhan saga aꞌa sukuꞌna, angkan yukna,
“Aniyaꞌ waktu paniyaꞌ ma sinosōng
waktu pangahinangku pagsulutan bahaꞌu maka bangsa Israꞌil,
beyaꞌ isab bangsa Yuda.
9 Saddī isab min kapagsulutan tagnaꞌ,
ya bay hinangku ma kaꞌmboꞌ-mboꞌan sigām,
waktu kapamowaku sigām paluwas min lahat Misil.
Halam kabogbogan eꞌ sigām kapagsulutanku maka sigām,
ya angkan sigām pasagaranku, yuk Panghūꞌ.
10 Buwattitu ya kapagsulutan song hinangku ma bangsa Israꞌil:
Ma waktu sinōng inān, yuk Panghūꞌ,
pahōpku panohoꞌanku ni deyom pamikil sigām.
Sulatku isab saraꞌku ma deyom atay sigām.
Ati aku ya pagtuhanan sigām,
maka sigām ya tahinang bangsa sukuꞌku.
11 Mbal na sigām subay amanduꞌan seheꞌ sigām ma pasalanku,
mbal sigām amogos pagkahi sigām subay ataꞌu ma Panghūꞌ.
Sabab kinataꞌuwan du aku eꞌ aꞌa kamemon,
min aꞌa areyoꞌ sampay ni aꞌa bangsahan.
12 Ati ampunku paldusahan sigām kamemon.
Mbal na entomku bay hinang sigām alaꞌat.”
13 Na, pagka binissala eꞌ Tuhan kapagsulutan bahaꞌu itu, hatina amaluba na in kapagsulutan tagnaꞌ. Sabab minsan ai-ai, bang angꞌndang na atawa amaluba na, alꞌkkas na magkaꞌat.