9
Untulan ma Langgal Pagkulbanan Tagnaꞌ
1 Na, aniyaꞌ saraꞌ pasal pagtaꞌat ni Tuhan bay pabeyaꞌ ma kapagsulutan tagnaꞌ, maka aniyaꞌ isab lumaꞌ pangarapan bay hinangan manusiyaꞌ. Buwattitu hinanganna: 2 aniyaꞌ lumaꞌ tolda bay nihinang duwa bilikna. Ya bilik pasōran dahū niōnan Bilik Sussi. Aniyaꞌ panyapna papagan palitaꞌan maka lamisahan pagtutukbalan, maka tinapay pangalabot ni Tuhan. 3 Aniyaꞌ isab bilik niōnan Bilik Mahasussi ma deyom toꞌongan, ma liyu kultina pangagpang. 4 Ya panyapna lamisahan bulawan panugtugan kamanyan, maka baꞌul sinarul deyom-luwasanna maka bulawan, ya pinagōnan Baꞌul Pagsulutan. Aniyaꞌ ma deyom baꞌul inān garul bulawan isihan kinakan niōnan “manna”. Inaꞌan isab tungkud si Harun ya bay tinomoꞌan dahun, maka duwa papan batu bay niukilan pagsulutan Tuhan. 5 Aniyaꞌ duwa malaꞌikat pikpikan ma diyataꞌan baꞌul, tandaꞌ pangilahan in inaꞌan-i haddarat Tuhan. Pabꞌllat pikpik sigām angalimbuhan saꞌob baꞌul, ya pinigsikan lahaꞌ pangampunan dusa. Saguwāꞌ mbal tapagbissalatam baꞌanan kapanyapanna ma waktu itu.
6 Na, buwattitu ya kalꞌngngananna ma deyom Lumaꞌ Pangarapan inān: magsōd saga imam llaw-llaw ni deyom bilik tampal ni luwasan boꞌ angahinang ai-ai ya kapatutan sigām. 7 Saguwāꞌ luwal imam muwallam ya makajari pasōd ni bilik ma deyom toꞌongan inān, mintꞌdda dantahun. Maka minsan iya, subay aniyaꞌ lahaꞌ pagkulban tabowana pareyom, tinukbalan ni Tuhan pamapuwas dusana sampay dusa saga aꞌa kaseheꞌan ya halam tasayu eꞌ sigām. 8 Jari asawa pamanduꞌ min Rū Sussi itu, hatina halam aniyaꞌ pasōran ni Bilik Mahasussi Toꞌongan satꞌggol masi Lumaꞌ Pangarapan tagnaꞌ inān. 9 Kapamintāngan koꞌ itu ma kitam buwattinaꞌan, hatina in lalabotan maka kukulbanan ya tinukbal ni Tuhan ma waktu palabay inān, halam aniyaꞌ dapatna amabontol itikad saga aꞌa inān. 10 Angkan buwattēꞌ, sabab in untulan bay bogbogan sigām pasal pagkakan maka paginum maka ginisan pagail, hal pamasussi baran sigām sampay taꞌabut waktu pamabahaꞌu ai-ai eꞌ Tuhan.
Pasal Lahaꞌ Al-Masi
11 Saguwāꞌ makalahil paꞌin Al-Masi magimam muwallam angumbangan saga pakaradjaꞌan ahāp ya paniyaꞌ ma buwattinaꞌan, bay iya pasōd ni langgal labi asampulnaꞌ min langgal hinangan manusiyaꞌ. In langgal itu nggaꞌi ka sukuꞌ ma alam pinapanjari. 12 Min tꞌdda du Al-Masi bay pasōd ni Bilik Mahasussi. Nggaꞌi ka lahaꞌ kambing maka lahaꞌ sapiꞌ ya tabowana, saguwāꞌ dī lahaꞌna, boꞌ supaya kitam pinuwas min hukuman dusa sampay ni kasaumulan. 13 Bang aniyaꞌ aꞌa abatal ma masa awal, subay iya pinigsikan maka lahaꞌ kambing atawa lahaꞌ sapiꞌ, maka abu min anak sapiꞌ tinunuꞌ pinalamud ni boheꞌ. Manjari alaꞌan batalna ati patut iya anambahayang. 14 Saguwāꞌ labi akawasa lahaꞌ Al-Masi min lahaꞌ hayop. Tinabang iya eꞌ Rū kakkal ma waktu kapaglillaꞌna baranna pagkulban ni Tuhan, halam isab aniyaꞌ tamak-tamakna. Manjari lahaꞌna itu makapabontol itikadtam min kahinangan ya amowa ni kamatay. Minnēꞌ limaya na kitam maghinang ni Tuhan ya kakkal salama-lama.
15 Ya itu sababanna angkan Al-Masi wajib magpatillot angahatul kapagsulutan bahaꞌu ya paghāpan manusiyaꞌ maka Tuhan, boꞌ supaya sasuku tapeneꞌ eꞌna makasambut pusakaꞌ kakkal. Angkan sigām makajari anambut, sabab Al-Masi bay amatay pamapuwas sigām min paldusahan ya bay tahinang sigām ma deyoꞌan kapagsulutan tagnaꞌ.
16 Bang takdil ni kataddangan pamusakaꞌ, buwattitu kalꞌngngananna: in pusakaꞌ mbal magtūy niꞌndeꞌan ni aꞌa pinusakaꞌan. Subay amatay dahū in aꞌa amusakaꞌ, maka subay aniyaꞌ bainat pasal kamatayna boꞌ yampa niꞌndeꞌan pusakaꞌ inān. 17 Sabab in kataddangan pusakaꞌ itu mbal giꞌ taga-pūs satꞌggol masi allum aꞌa tag-altaꞌ. Subay iya amatay boꞌ yampa taga-pūs. 18 Angkanna, minsan ma kapagsulutan tagnaꞌ, subay aniyaꞌ lahaꞌ pagkulban pabuꞌus dahū boꞌ yampa aniyaꞌ kajatuhanna. 19 Buwattitu isab kalꞌngngananna: aubus paꞌin eꞌ si Musa bay amataꞌu saga aꞌa Israꞌil pasal kamemon saraꞌ ya panohoꞌan Tuhan ma sigām, bay iya angāꞌ lahaꞌ hayop pinaglamud maka boheꞌ, boꞌ pigsikanna Kitab panulatan saraꞌ, beyaꞌ isab saga aꞌa inān kamemon. Ya tagunana pamigsik lahaꞌ, engas-engas min kayu-kayu hissup pinꞌkkos maka bulbul bili-bili nianjibi keyat. 20 Ya lling si Musa hinabuna amigsik: “Ya itu lahaꞌ amuwan kajatuhan ma pagsulutan itu, ya bay pinatꞌnnaꞌan kaꞌam eꞌ Tuhan boꞌ kam ameyaꞌ ma panohoꞌanna.” 21 Damikiyanna lumaꞌ pangarapan sigām ni Tuhan, maka panyap kamemon ya pinakay ma paghinang sigām, pinigsikan isab maka lahaꞌ. 22 Hatina, sinussi maka lahaꞌ agon-agon kamemon ai-ai ya pinakay ma saraꞌ agama inān. Subay aniyaꞌ lahaꞌ pinabuꞌus boꞌ kaꞌampunan paldusahan manusiyaꞌ.
23 Jari in lumaꞌ pangarapan tagnaꞌ maka kapanyapanna subay sinussi maka lahaꞌ hayop. Sagōꞌ nggaꞌi ka heꞌ kabꞌnnalanna. Hal ibarat pattaꞌ ma dī Lumaꞌ Pangarapan ya ma deyom sulgaꞌ. Boꞌ malaingkan landuꞌ ahalgaꞌ ai-ai ma deyom sulgaꞌ, angkan subay aniyaꞌ lahaꞌ labi ahalgaꞌ panussi iya. 24 Jari sinōd eꞌ Al-Masi in Bilik Mahasussi, sagōꞌ nggaꞌi ka bilik sussi hinangan manusiyaꞌ ma buwat suntuꞌan bay min sulgaꞌ. Pasōd Al-Masi ni deyom sulgaꞌ toꞌongan boꞌ makapagharap maka Tuhan ma haddaratna, ati mainaꞌan iya anganjunjung ma pasalantam. 25 Bay pasōd saga imam muwallam Yahudi ni deyom Bilik Mahasussi tahun ni tahun amowa lahaꞌ hayop pagkulban ni Tuhan. Saguwāꞌ Al-Masi halam bay pasōd boꞌ maglillaꞌ baranna magbalik-balik. 26 Bang iya bay pasōd min heka, min heka du isab tananamna kabinasahan sangay min waktu kapamapanjari dunya. Saguwāꞌ mintꞌdda sadja kalahilna ni dunya itu, ma song akiyamat dunya, boꞌ supaya paglillaꞌna baranna ni kamatay pamalaꞌan dusa manusiyaꞌ. 27 Ya panganggantaꞌ bangsa manusiyaꞌ subay amatay min tꞌdda sadja boꞌ yampa nihukum eꞌ Tuhan. 28 Damikiyanna Al-Masi, min tꞌdda du isab iya bay amatay pagkulban boꞌ supaya tatanggungna dusa manusiyaꞌ. Palahil iya pabīng ma sinosōng, kaminduwana na, sagōꞌ nggaꞌi ka pamuwas dusa. Ya angkan iya palahil pabīng boꞌ kalappasanna toꞌongan sasuku angalagaran iya.