10
1 Ya saraꞌ bay pamuwan eꞌ Tuhan ma bangsa Yahudi heꞌ hal hantang suntuꞌan pangꞌndaꞌanta kahāpan ya song pinaniyaꞌ. Nggaꞌi ka kabꞌnnalanna. Aniyaꞌ susumbaliꞌan bay pinagkulban ni Tuhan tahun ni tahun, halam aniyaꞌ kaubusanna. Sagōꞌ mbal makarapat saga pagkulban inān pangalanuꞌ pangatayan aꞌa magsasambahayang. 2 Bang sigām bay sinussi sabꞌnnal-bꞌnnal min dusa sigām, halam aniyaꞌ dusa tananam sigām, ati mbal sigām magkagunahan magkulban pabalik. Malaingkan masi du dusa sigām. 3 Maka susumbaliꞌan ya pagkulban na paꞌin ma pasalan sigām tahun ni tahun hal pamaentom in sigām masi taga-dusa. 4 Mattan du, lahaꞌ sapiꞌ maka lahaꞌ kambing mbal makapuwasan dusa manusiyaꞌ.
5 Na, pagka halam aniyaꞌ kaꞌampunan dusa min paghinang tagnaꞌ heꞌ, buwattitu pagkallam Al-Masi hinabuna palahil ni dunya itu. Yukna,
“Nggaꞌi ka pagkulban maka lalabotan ya kabayaꞌannu,
saguwāꞌ sakapannu aku baran manusiyaꞌ.
6 Mbal ka kasulutan ma katibuꞌukan hayop tinunuꞌ pagkulban,
atawa ginisan lalabotan ya tinukbal pamaꞌampun dusa.
7 Buwattitu isab pamissalaku: Itiyaꞌ aku, O Tuhan,
lillaꞌ angahinang ai-ai pangahandaknu aku,
buwat tasulat ma pasalku ma deyom Kitab.”
8 Duwa ginis bay pamissalana heꞌ, kaissana, “Halam aniyaꞌ kabayaꞌannu, ai na ka ma susumbaliꞌan maka lalabotan, atawa ma hayop tinunuꞌ ma katibuꞌukan atawa ma pagkulban pagtaubatan dusa.” (Buwattēꞌ pahꞌllingna minsan panohoꞌan saraꞌ asal saga pagkulban maka tutukbalan.) 9 Karuwana, ya yukna, “Itiyaꞌ aku, O Tuhan, sakap angahinang ai-ai pangahandaknu aku.” Hatina, nibbahan eꞌ Tuhan bay bowahan tagnaꞌ boꞌ pinagantiꞌ bowahan bahaꞌu. 10 Na, pagka ajukup eꞌ si Isa Al-Masi bay pangahandak Tuhan ma iya, asussi kitam min dusatam ma sabab baran si Isa bay pagkulban pinamꞌntꞌdda.
11 Magtꞌnggehan na paꞌin ma deyom langgal saga imam Yahudi inān kamemon boꞌ maghinang ai-ai pamahinang sigām. Tinukbalan eꞌ sigām magbalik-balik saga pagkulban halam dapatna pamalaꞌan dusa. 12 Saguwāꞌ in imam damuli itu, hatina Al-Masi, bay magmalillaꞌ baranna min tꞌdda sadja, nihinang pagkulban pamapuwas dusa manusiyaꞌ, ati mbal binalikan sampay ni kasaumulan. Jari itu, aubus paꞌin hinangna heꞌ, aningkōꞌ iya ma bihing Tuhan tampal ni kowan, 13 ati inaꞌan na iya angagad buwattinaꞌan sampay taꞌabut waktu kapangandaꞌug Tuhan min palbantahanna kamemon, boꞌ yampa pinatꞌnnaꞌ saga palbantahan eꞌ ma deyoꞌ pād-tapeꞌ Al-Masi. 14 Al-Masi itu, pinamintꞌdda pagmalillaꞌna baranna ni Tuhan, ati minnēꞌ pinabontol toꞌongan itikad manusiyaꞌ, sasuku sinussi eꞌna.
15 Aniyaꞌ isab saksiꞌ min Rū Sussi, ya tasulat ma deyom Kitab, yuk-i,
16 “Ya na itu kapagsulutan patꞌnnaꞌku ma manusiyaꞌ
bang taꞌabut llawna, yuk Panghūꞌ.
Pahōpku panohoꞌanku ni deyom atay sigām.
Sulatku isab ma deyom panahuꞌan sigām.”
17 Sinugpat isab ayat dakayuꞌ itu, ya yuk-i,
“Mbal na entomku paldusahan sigām,
sampay kalaꞌatan bay tahinang eꞌ sigām.”
18 Na, pagka taꞌampun dusatam kamemon eꞌ Tuhan, mbal na kitam magkagunahan angahinang pagkulban pabīng.
Pasekot Kitam ni Tuhan
19 Manjari itu, saga danakanku, makatawakkal na kitam pasōd ni deyom Bilik Mahasussi ma sabab lahaꞌ si Isa. 20 Sabab bay pagmalillaꞌ eꞌ si Isa baranna pinapatay, ati minnēꞌ kitam niukaban pasōran bahaꞌu, pasōran kakkal. Hatina makasōd na kitam ni Bilik Mahasussi labay min kultina ya sapantun baran si Isa. 21 Aniyaꞌ na Imamtam bangsahan tag-kapatut ma okoman Tuhan. 22 Angkan kitam subay pasekot ni Tuhan magatay poteꞌ, ma ahogot pangandolta ma iya. Subay halam aniyaꞌ hawal-hawalta ma pasal dusa bay hinangta ma waktu palabay, sabab tapabontol na itikadta. Tapandi isab baranta paltandaꞌan in kitam asussi na. 23 Subay kita amalut pahogot ma kaholatan ya pagkahagaranta, sabab kapangandolan asal Tuhan ya bay anganjanjiꞌ ma kitam. 24 Subay kannalta isab pagkahita bang buwattingga eꞌta anabangan sigām boꞌ maglasa-liyasahi maka maghinang kahāpan. 25 Daꞌa kitam angꞌbba min addattam magtipun-tipun, buwat kapangꞌbba eꞌ saga jamaꞌa si Isa kaseheꞌ. Gom na paꞌin kita magtipun amatꞌttog iman pagkahita dangan maka dangan, ya lagiꞌna ma buwattinaꞌan pagka kataꞌuwanta asekot na Llaw Panghūꞌ Isa.
26 Na, bang kita angahinang kalaꞌatan boꞌ pagtuꞌuranta minsan bay tataimaꞌ panduꞌ kasabꞌnnalan, tantu halam aniyaꞌ pagkulban pamalaꞌan dusata. 27 Ya sadja lagaranta hukuman Tuhan makatāw-tāw, maka api asiglat ya panunuꞌna ma saga aꞌa anaggaꞌ iya. 28 Bang aniyaꞌ aꞌa bay makalanggal saraꞌ si Musa ma masa awal eꞌ, boꞌ aniyaꞌ saksiꞌ min duwangan atawa tꞌllungan maguyun, pinapatay iya, mbal kinaꞌaseꞌan. 29 Jari labi abisa hukuman pinatꞌkkahan aꞌa ya angahalipulu Anak Tuhan. Mbal isab magaddat ma lahaꞌ bay pamajatu pagsulutan bahaꞌu, ya panussi pangatayanna min dusa. Tahinaꞌ isab eꞌna Rū Sussi, ya amaꞌndaꞌan kitam kaꞌaseꞌ Tuhan. 30 Kataꞌuwanta bang sai bay amaluwas bissala, ya yuk-i, “Aku ya amalos. Aku ya anungbas.” Yukna isab, “Angahukum Panghūꞌ ma bangsa sukuꞌna.” 31 Landuꞌ makatāw-tāw bang kita taluwaꞌ hukuman Tuhan, ya kakkal salama-lama.
32 Entomunbi bay palihalanbi ma waktu tagnaꞌ giꞌ. Bahaꞌu kam bay makananam kasawahan min Tuhan sampay amꞌnnal ma si Isa, maka aheka katiksaꞌan bay kalabayanbi, sagōꞌ halam bay apinda imanbi. 33 Sumaꞌan pinaggunyak-gunyak baranbi maka pininjalaꞌ ma mata mairan, sumaꞌan kaꞌam angandapitan pagkahibi waktu sigām pininjalaꞌ. 34 Bay kaꞌaseꞌanbi saga aꞌa pilisu ati tanggungbi kabinasahan sigām. Minsan kalangpasan ai-aibi kamemon, gom paꞌin kam kinōgan sabab kataꞌuwanbi aniyaꞌ giꞌ ma kaꞌam altaꞌ labi ahalgaꞌ, anatas ni kasaumulan.
35 Angkan kam sinohoꞌ daꞌa angꞌbbahan pangandolbi ma Tuhan, sabab aheya tungbasna bang binogbogan. 36 Paiman kam supaya tahinangbi ai-ai pangahandak kaꞌam eꞌ Tuhan, boꞌ kam makahampit bay paljanjiꞌanna ma kaꞌam. 37 Sabab asekot na waktu, buwat bay tasulat ma deyom Kitab, ya yuk-i,
“Mbal atꞌggol boꞌ atꞌkka ya bay nilagaran. Maraiꞌ na tꞌkkana.
38 Allum du saga aꞌaku abontol ma sabab pangandol sigām,
sagōꞌ bang aꞌa pataikut min aku, mbal aku kasulutan ma iya.”
39 Saguwāꞌ halam aniyaꞌ lamudtam ma saga aꞌa ya pataikut min Tuhan boꞌ yampa binutawanan eꞌna. Angandol kitam ma Tuhan ati lappasan kitam min hukuman.