11
Pasal Pangandol
1 Na in pasal pangandol itu, hatina aniyaꞌ paltantuhanta in ai-ai holatta buwattinaꞌan paniyaꞌ du ma sinosōng. Min pangandolta, ya angkan kita amꞌnnal ma pasal ai-ai ya mbal giꞌ taꞌndaꞌta. 2 Bay kasulutan Tuhan ma saga aꞌa ma waktu kaꞌmboꞌ-mboꞌan ma sabab pangandol sigām ma iya.
3 Bang kita angandol, makataꞌu kita in alam itu kamemon bay pinapanjari eꞌ Tuhan min palmanna sadja. Manjari kakayaꞌ-kayaꞌanna itu ya taꞌndaꞌ mata, bay tahinang min ai-ai ya mbal taꞌndaꞌ. 4 Entomunbi saga aꞌa bay ma masa awal eꞌ, buwat si Habil. Bay iya angandol ma Tuhan, ya poꞌon iya bay makatukbalan pagkulban tudju ni iya, labi ahāp min bay pangalamas siyakana si Kabil. Bay angandol si Habil, ati binista iya abontol eꞌ Tuhan sabab kaꞌamuhan Tuhan ma panukbalna. Masi aniyaꞌ kapamintāngantam min pangandol si Habil minsan atꞌggol na kamatayna.
5 Si Idris isab ma masa awal eꞌ, halam iya bay makalabay kamatay sabab akosog pangandolna ni Tuhan. Halam tabāk bangkayna sabab bay iya pinaꞌangkat eꞌ Tuhan hinabuna allum. Angkan buwattēꞌ, sabab aꞌa iya makasulut atay Tuhan. 6 Halam aniyaꞌ manusiyaꞌ makasulut atay Tuhan bang mbal angandol ma iya. Sabab sai-sai bilahi angarap ni Tuhan subay magkahagad aniyaꞌ Tuhan. Subay isab kahagadna aniyaꞌ panungbas Tuhan ma sasuku atuyuꞌ amiha iya.
7 Si Nū isab, aniyaꞌ pangandolna angkan iya bay angasip ma pagbandaꞌ Tuhan pasal balaꞌ song pinatꞌkka ni dunya. Kinahagad eꞌna ma halam giꞌ taꞌndaꞌna. Bineyaꞌ eꞌna panohoꞌan Tuhan, ati nihinang eꞌna adjung aheya supaya sigām magtaiꞌanak lappasan min latap. Ati minnēꞌ, min bowahan hinang si Nū heꞌ, talhakit in aꞌa kaseheꞌan bay ma dunya patut pinatōngan dusa. Boꞌ si Nū ya binista abontol ma sabab pangandolna.
8 Si Ibrahim isab, bay iya angandol ma Tuhan angkan beyaꞌna panohoꞌan Tuhan ati alaꞌan min dī lahatna tudju ni lahat saddī, ni bay panganjanjiꞌ Tuhan ma iya. Bay iya palintas minsan halam kataꞌuwanna bang piꞌingga patudjuhanna. 9 Ma sabab pangandolna isab, angkan si Ibrahim bay patꞌnnaꞌ ma lahat bay panganjanjiꞌ Tuhan ma iya, minsan iya saliꞌ aꞌa liyu mainaꞌan. Maglihan-lihan iya, ati lumaꞌ tolda ya lumaꞌ palihananna. Buwattēꞌ du isab anakna si Isaꞌak maka mpuna si Yakub, ya tumabeyaꞌ ma si Ibrahim panganjanjiꞌan lahat inān eꞌ Tuhan. 10 Aiman si Ibrahim sabab aniyaꞌ lagaranna lahat saddī, hatina daꞌira ahogot pangosolanna, ya ginantaꞌ maka nihinang eꞌ Tuhan.
11 Damikiyanna si Sara hꞌnda si Ibrahim, angandol isab ma Tuhan ati kabuwanan iya kosog makapangiram minsan iya aumul na, minsan palabay na bay waktu pangiramna. Tuꞌud pangandolanna Tuhan in janjiꞌna maujud du. 12 Si Ibrahim itu, minsan iya saliꞌ aꞌa pinagamatay na, humeka toꞌongan tubuꞌna. Ya heka panubuꞌna buwat heka bituꞌun ma bꞌttong langit, buwat solagan gusung ma bihing tahik, mbal takoleꞌ niꞌitung.
13 Manjari kamemon saga aꞌa kaōnan inān bay magpangandol ma Tuhan sampay ni kamatay. Ya bay paljanjiꞌan Tuhan ma sigām, halam bay tasambut ma dunya lagiꞌ, saguwāꞌ tapantaw eꞌ sigām min katāhan, maka eꞌ sigām kinōgan. Bay sigām angahaka patampal in sigām saliꞌ aꞌa liyu, hal maglihan ma dunya itu. 14 Na, pagka sigām ahꞌlling in sigām aꞌa liyu, manyatakan du aniyaꞌ lahat saddī minohot, hatina lahat sigām luggiyaꞌ. 15 Halam isab nientom lahat bay palaꞌanan sigām tagnaꞌ, sabab bang aniyaꞌ bay bayaꞌ sigām pabīng ni lahat eꞌ, halam aniyaꞌ bay makasaggaꞌ. 16 Sagōꞌ nggaꞌi ka lahat tagnaꞌ ya nientom eꞌ sigām, sagōꞌ lahat labi ahāp, lahat sulgaꞌ. Angkan Tuhan mbal aiyaꞌ niōnan Tuhan eꞌ sigām, sabab aniyaꞌ daꞌira bay tinagama eꞌna ma sigām.
17-18 Si Ibrahim isab, waktu bay kapanulay Tuhan ma iya, ahogot pangandolna. Angkan iya bay mbal allog amapatay anakna si Isaꞌak pagkulban, minsan ya anak bay panganjanjiꞌ eꞌ Tuhan. Yuk janjiꞌ Tuhan eꞌ, “Paheka du panubuꞌnu luwas min si Isaꞌak.” Sagōꞌ angandol si Ibrahim, angkan iya magmalillaꞌ amapatay anakna heꞌ, pagkulban ni Tuhan. 19 Sabab bang ma bistahan si Ibrahim, tapakallum du anakna eꞌ Tuhan. Jari tasambut eꞌ si Ibrahim anakna saliꞌ luwas min kamatay.
20 Si Isaꞌak isab bay angandol ma Tuhan, angkan nijanjiꞌan eꞌna anakna duwangan, si Yakub maka si Esaw, in sigā pinatꞌkkahan du lidjikiꞌ eꞌ Tuhan ma sinosōng.
21 Si Yakub isab, song paꞌin iya magkamamatay, bay angandol ma Tuhan ati niamuꞌan eꞌna barakat mpuna, anak si Yusup duwangan. Binalutan eꞌna tungkud pasangdolanna hinabuna amudji Tuhan.
22 Si Yusup isab, song paꞌin iya magkamamatay, bay angandol ma Tuhan. Angkan iya bay makapahꞌlling pasal kalaꞌan bangsa Israꞌil min lahat Misil. Pangꞌbba eꞌna ma sigām panohoꞌan pasal bangkayna.
23 Inaꞌ-mmaꞌ si Musa isab bay angandol ma Tuhan waktu kapanguldin sultan Misil subay pinapatay kamemon anak Yahudi lꞌlla sasuku nianakan bahaꞌu. Angkan sigā bay anapukan si Musa ma deyom tꞌllumbulan puwas min kapaganak ma iya. Taꞌndaꞌ paꞌin eꞌ sigā in si Musa mahal-mahal lingkatna, halam sigā tināw ma uldin sultan eꞌ.
24 Si Musa isab bay angandol ma Tuhan, sabab taꞌabut paꞌin kasangpotna mbal na iya angaku niōnan anak dayang-dayang, ya anak Sultan bay amasulig iya. 25 Pād-pād iya ameyaꞌ ma hinang alaꞌat ma lumaꞌ sultan, ya makahāp palasahan daiꞌ-daiꞌ sadja, bilahi lagiꞌ iya parakayuꞌ ma pagkahina bangsa Israꞌil, aꞌa sukuꞌ Tuhan. Lillaꞌ iya magbeyaꞌ maka sigām bininasa. 26 Bang ma iya, minsan iya pinakaiyaꞌ ma sabab Al-Masi, ahalgaꞌ lagiꞌ min kamemon altaꞌ ma lahat Misil, sabab ya angutna tungbas min Tuhan ma llaw damuli. 27 Bay alaꞌan si Musa min lahat Misil ma sabab kosog pangandolna ma Tuhan, halam iya tināw ma pangastol sultan eꞌ. Akosog toꞌongan niyatna, sabab taꞌndaꞌna Tuhan ya mbal taꞌndaꞌ manusiyaꞌ. 28 Ma sabab pangandolna isab, angkan iya bay magpanohoꞌan ma bangsa Israꞌil. Sinōꞌ sigām amigsikan lahaꞌ bili-bili ni lusuk-lusuk lawang sigām, boꞌ mbal talapay pinapatay anak sigām lꞌlla kasiyakahan bang palabay malaꞌikat pangmumulkaꞌ. Ya heꞌ tagnaꞌan Hinang Paglakad.
29 Bangsa Israꞌil isab, waktu kauntas sigām ni dambilaꞌ sꞌllang ya niōnan Sꞌllang Keyat. Minsan du bay sꞌllang, tahinang gintanaꞌan magtūy ma sabab pangandol sigām, jari pauntasan sigām parambilaꞌ. Saguwāꞌ pasulay paꞌin saga aꞌa Misil pauntas, alembo sigām sabab pabīng magtūy tahik.
30 Waktu kapehēꞌ bangsa Israꞌil ni daꞌira Ariha, pinaglibut-libutan daꞌira inān eꞌ sigām ma deyom dapituꞌ. Taꞌabut paꞌin kapituꞌna, magtūy alubu ādna batu sabab min kosog pangandol sigām. 31 Bay angandol ni Tuhan si Rahab ya dꞌnda pagtatambahan ma daꞌira Ariha. Pinatuntul eꞌna saga aꞌa magmata-mata ati halam iya bay talapay pinapatay maka saga aꞌa ya agagga ma Tuhan.
32 Na, mbal na sugpatanku sabab mbal aku makasaꞌut angahakaꞌan kaꞌam ma pasal disi Gidiyun, si Barak, si Samson, si Jepta, si Daꞌud, si Samwel, sampay ni kanabi-nabihan. 33 Saga aꞌa itu bay anganggaꞌos pagsultanan ma sabab pangandol sigām. Aniyaꞌ kaseheꞌ abontol pagsaraꞌ sigām ma sabab pangandol, maka aniyaꞌ bay makasambut panganjanjiꞌ Tuhan ma sabab pangandol sigām. Aniyaꞌ isab bay amakꞌttop bowaꞌ halimaw. 34 Aniyaꞌ sigām kaseheꞌ bay amꞌddahan api aheya, aniyaꞌ isab bay makaliyus min patay bonoꞌ. Aniyaꞌ isab sigām taluwaꞌ kalammahan saguwāꞌ angosog gom paꞌin pamaranan sigām. Landuꞌ sigām aesog ma pagbonoꞌ, sampay taraꞌug eꞌ sigām baꞌanan sundalu min lahat saddī. 35 Aniyaꞌ saga dꞌnda bay kamatayan sagōꞌ allum pabalik saga lahasiyaꞌ sigām magpatayan heꞌ. Aniyaꞌ isab aꞌa kaseheꞌ mbal angahoꞌ pinalꞌppa minsan sigām pinapꞌddiꞌan toꞌongan sampay kamatay. Tuꞌud sigām aholat pinakallum pabalik boꞌ binuwanan kallum labi ahāp. 36 Aniyaꞌ isab kaseheꞌ bay pinaggunyak-gunyak sampay niraplosan, aniyaꞌ isab kaseheꞌ bay kinarenahan boꞌ yampa tinambolan ma deyom kalabusu. 37 Aniyaꞌ isab sigām bay pinagbantung, aniyaꞌ bay pinagkatkat duwa, maka aniyaꞌ isab bay binonoꞌ maka kalis. Aniyaꞌ sigām kaseheꞌ hal kuwit bili-bili atawa kambing ya pasꞌmmek sigām, miskin toꞌongan. Nilaꞌugan na paꞌin sigām, nijahulakaꞌ. 38 Dunya itu mbal tōp paglahatan saga aꞌa inān, subay lahat labi ahāp. Satꞌggol sigām ma dunya itu, hal sigām maglihan na paꞌin sumaꞌan ma lahat paslangan, sumaꞌan ma kabūd-būran. Bay sigām patꞌnnaꞌ ma deyom sengab batua atawa ma lowang ma deyom tanaꞌ.
39 Babantugun saga aꞌa itu kamemon ma sabab kosog pangandol sigām ma Tuhan. Saguwāꞌ halam sigām bay makasambut panganjanjiꞌ Tuhan tꞌggol sigām allum, 40 sabab aniyaꞌ labi ahāp panganggantaꞌ kitam eꞌ Tuhan. Hatina in kitam maka saga aꞌa bay masa awal inān subay magbeyaꞌ anambut paljanjiꞌan maka kasampulnaꞌanna.