12
Mmaꞌtam Tuhan
1 Na, pagka kita saliꞌ dalil aꞌa maglomba pinagtimukan eꞌ baꞌanan saksiꞌ, subay bbahanta ai-ai makasembol, sampay saga dusa ya katagihanta sidda. Subay kita atuyuꞌ magdagan sampay taꞌabutta gindan ya patꞌkkahanta. 2 Subay patonganta si Isa saumul-umul, sabab iya ya pasangdolanta min katagnaꞌ sampay ni katapusan. Bay sinandalan eꞌna katiksaꞌan ma waktu kapangalansang iya ni hāg pinapatay. Halam bay paheyana ma atay kaiyaꞌanna amatay ma hāg, sabab niangut eꞌna kakōgan ya tinagamahan iya. Inaꞌan na iya ma sulgaꞌ aningkōꞌ ma haddarat Tuhan, tampal ni kowan.
3 Kannalunbi toꞌongan bay kasandal si Isa waktuna pinagsaggaꞌ eꞌ saga aꞌa baldusa. Bang heꞌ-i takannalbi mbal du palamma pangandolbi. Mbal du kam sinumu ameyaꞌ ma iya, 4 sabab kataꞌuwanbi asal, halam lagiꞌ aniyaꞌ min kaꞌam bay amatay min kapanaggaꞌbi ma kalaꞌatan. 5 Maraiꞌ takalipatbi ya bay binissala eꞌ Panghūꞌ ni buwat kaꞌam anakna boꞌ supaya ahogot ataybi. Yukna inān,
“Kaꞌam saga anak, daꞌa kam amabiyal ma pamiꞌatku ma kaꞌam.
Daꞌa kam mandāꞌ-dāꞌ bang kam buwananku kalꞌggahan.
6 Sabab biꞌatku du sasuku kalasahanku.
Palabayku isab min kabinasahan sasuku ōnanku anak.”
7 Angkanna, bang kam gantaꞌ pinatꞌkkahan kabinasahan, subay kam magmalillaꞌ sadja sabab pamiꞌat mmaꞌbi koꞌ itu. Ya kabinasahan tananambi ilu tandaꞌ palsaksiꞌan in kaꞌam binista anak eꞌ Tuhan. Aniyaꞌ bahāꞌ ondeꞌ-ondeꞌ mbal biniꞌat eꞌ mmaꞌna? 8 Bang kam mbal tumabeyaꞌ biniꞌat eꞌ Tuhan buwat kapamiꞌatna ma anakna kamemon, mbal kam manjari niōnan anakna lahasiyaꞌ. Saliꞌ kam nggaꞌi ka anak toꞌongan. 9 Minsan mmaꞌta maitu ma dunya, bay amiꞌat kita ati masi sigām pagaddatanta. Ya lagiꞌna isab Mmaꞌta Tuhan, ya angꞌntan palnyawahan manusiyaꞌ. Subay kita magmaluluy ma iya boꞌ supaya kita allum toꞌongan. 10 Pinagbiꞌat kita eꞌ mattoꞌata satꞌggol kita ondeꞌ-ondeꞌ, boꞌ pamiꞌat sigām hal min akkal manusiyaꞌ. Saguwāꞌ saddī pamiꞌat Tuhan sabab tantu pamahāpna kaul-piꞌilta boꞌ supaya kita makasaliꞌ ni buwat kasussina. 11 Bang kita biniꞌat eꞌ Tuhan mbal kita magtūy kinōgan sabab masi alengog pikilanta. Saguwāꞌ bang palabay na waktu bay pamiꞌat eꞌ, amintāng du kita boꞌ aniyaꞌ kasannanganta luwas min kabontolan hinangta.
Pamanduꞌ maka Pagbandaꞌ
12 Angkan yukku ma kaꞌam: pakosog kam, maka patꞌttogunbi pangandolbi. 13 Pabontolunbi lān palꞌngngananbi. Jari bang aniyaꞌ pagkahibi ilu magduwa-ruwa, mbal iya alungay min lān. Gom paꞌin kauliꞌan kalamma pangandolna.
14 Subay kam amuspus magsulut maka aꞌa kamemon. Tuyuꞌinbi isab kaul-piꞌil asussi, sabab halam aniyaꞌ makataꞌu Tuhan bang mbal asussi. 15 Kamayaꞌ-mayaꞌ kam, kalu aniyaꞌ min kaꞌam angꞌbba min aseꞌ maka lasa Tuhan. Painsap kam isab bang aniyaꞌ aꞌa ma deyomanbi alaꞌat kasuddahanna, sabab aꞌa buwattēꞌ sapantun gamut kayu makalassun, taka-taka pasahaꞌ ati paledled laꞌatna ni kahekaꞌan. 16 Kamayaꞌ-mayaꞌ kam isab boꞌ supaya halam aniyaꞌ min kaꞌam magdꞌnda atawa maglꞌlla. Daꞌa isab pasagarinbi bang aniyaꞌ mailu anꞌppu si Esaw, aꞌa masa awal saliꞌ halam aniyaꞌ tuhanna. Si Esaw itu bay anak kasiyakahan, ati pamusakaꞌ ma iya paljanjiꞌan Tuhan. Saguwāꞌ bay panambiꞌ eꞌna palsukuꞌanna ni dapinggan kinakan. 17 Kataꞌuwanbi asal kissana. Atꞌggol-tꞌggol paꞌin minnēꞌ, anganjunjung iya ma mmaꞌna bang paꞌin iya niamuꞌan lidjikiꞌ min Tuhan. Sagōꞌ pinaginꞌmbal iya sabab in bay hinang mmaꞌna inān mbal toꞌongan kapindahan, minsan buwattingga pagtangisna.
18 Kaꞌam ilu, asekot na kam ni Tuhan, sagōꞌ ya kasekotbi nggaꞌi ka buwat bay ma bangsa Israꞌil masa awal eꞌ, sabab taꞌndaꞌ eꞌ sigām bang ai ya pasekotan sigām, hatina būd Turusina. Taꞌndaꞌ eꞌ sigām kosog apina, maka lendom makatangkob lahat, maka hunus alandos. 19 Takale isab sigām saliꞌ tiyup-tiyup atanog, maka lling suwala makatāw-tāw. Pagkale sigām ma suwala heꞌ, magtūy sigām anganjunjung toꞌongan bang paꞌin sigām mbal pinakalehan pabalik, minsan hal dakabtang. 20 Tināw sigām makalanduꞌ ma sabab panohoꞌan, ya yuk-i, “Bang aniyaꞌ makaragpak ni būd itu, minsan hayop, subay pinagbantung pinapatay.” 21 Makatāw-tāw sidda ya taꞌndaꞌ sigām inān. Sampay isab si Musa, sabab buwattitu bay llingna: “Amidpid aku,” yukna. “Tināw aku sidda.”
22 Saguwāꞌ kaꞌam ilu, saddī na kasekotbi ni Tuhan. Ilu na kam makasampay ni būd Siyun, ni daꞌira paglahatan Tuhan kakkal salama-lama. Makasampay na kam ni daꞌira Awrusalam ma deyom sulgaꞌ, sampay ni saga malaꞌikatna magibu-ibuhan. 23 Inaꞌan kam ma palhimpunan magkalasigan, ma palhimpunan saga aꞌa niōnan anak Tuhan siyaka, ya tasulat ōn sigām ma deyom sulgaꞌ. Makaharap isab kam ni Tuhan, ya angahukum ma manusiyaꞌ kamemon. Inaꞌan isab kam ma saga umagad aꞌa adil bay magpatayan, ya asampulnaꞌ na. 24 Makasampay na isab kam ni si Isa, ya magpatillot ma manusiyaꞌ maka Tuhan boꞌ angahatul kapagsulutan bahaꞌu. Taꞌabutbi isab lahaꞌ si Isa, ya pinagsambat lahaꞌ pamigsik. Lahaꞌ labi ahāp koꞌ inān min lahaꞌ si Habil ya bay pinabuꞌus ma masa awal eꞌ, sabab lahaꞌ pamalosan.
25 Angkanna kita subay mbal amabiyal bang Tuhan ya amissala ni kita. Subay kita amintāng min saga aꞌa bay amabiyal ma pagbandaꞌ si Musa, waktu kapamowana palman Tuhan ma masa awal eꞌ. Bang sigām halam bay makapuwas min kabinasahan minsan hal manusiyaꞌ ya bay pinabiyal eꞌ sigām, lubaꞌ-lagiꞌna kita mbal makapuwas bang taikutanta Tuhan ya magbandaꞌan kitam min deyom sulgaꞌ. 26 Ma waktu kapamalman Tuhan ma si Musa, bay ajogjog deyom dunya eꞌ suwalana. Sagōꞌ buwattinaꞌan aniyaꞌ panganjanjiꞌna dakayuꞌ, ya yuk-i, “Pajogjogku dunya pabīng, min tꞌdda lagiꞌ, sagōꞌ nggaꞌi ka hal dunya ya pinajogjog, sampay isab saga lapis langit.” 27 Bang nihati kabtangan itu, ya yuk-i, “min tꞌdda lagiꞌ”, in ai-ai pinapanjari nijogjog du boꞌ palanyap, malaingkan pataptap sadja ya mbal takoleꞌ nijogjog.