13
Saga Hinang Makasulut Tuhan
1 Daꞌa bbahinbi kabiyaksahanbi maglasa-liyasahi sabab magdanakan kam ma deyoman Al-Masi. 2 Paentom kam. Bang aniyaꞌ piꞌilu ni lumaꞌbi aꞌa mbal takilābi, subay iya patuntulbi. Sabab aniyaꞌ ma waktu palabay bay amatuntul aꞌa liyu, kinabāꞌ manusiyaꞌ sagōꞌ malaꞌikat min sulgaꞌ. 3 Kannalunbi na paꞌin kahālan pagkahibi ma deyom kalabusu ilu, saliꞌ hantang baranbi ya ma deyom kalabusu. Kannalunbi isab saga pininjalaꞌ, saliꞌ hantang kaꞌam isab pininjalaꞌ.
4 Kaꞌam kamemon, pahalgaꞌunbi paglakibinibi. Kamayaꞌ-mayaꞌ kam, sabab sasuku maghinang kalaꞌatan dꞌnda maka lꞌlla atawa angaliyu-lakad ni nggaꞌi ka pagholaꞌna, tantu pinataluwaꞌan hukuman Tuhan. 5 Subay kam ahalliꞌ isab ma napsubi boꞌ kam mbal ameyaꞌ ma bahaya pilak. Daꞌa kam atawad min bay panganggantaꞌ kaꞌam, sabab aniyaꞌ du Tuhan amaruli, buwat yukna,
“Mbal kam bbahanku, mbal kam pasagaranku saumul-umul.”
6 Angkan kita subay atawakkal amissala buwat bay tasulat ma deyom Kitab, ya yuk-i,
“Panghūꞌ du ya anabangan aku,
ati halam aniyaꞌ kagawahanku.
Mbal du aku tināw niꞌinay eꞌ aꞌa.”
7 Entomunbi saga aꞌa pagmakōkanbi, ya bay anganasihatan kaꞌam lapal Tuhan. Entomunbi bay kamattihan sigām pagka ahāp bowahan sigām tꞌggol sigām allum. Sengorinbi isab bay pangandol sigām. 8 Mbal magkapinda si Isa Al-Masi, saliꞌ du iya min katagnaꞌ sampay ni kabuwattinaꞌanan, sampay isab ni katapusan.
9 Daꞌa kam abowa-bowa eꞌ panduꞌ magsaddī-saddī, supaya kam mbal pabiddaꞌ min panduꞌ bꞌnnal. Ahāp bang lasa maka aseꞌ Tuhan ya ginuna pamakosog palnyawahanta, daꞌa na panohoꞌan pasal kapamangan. Halam aniyaꞌ paluntungan saga aꞌa pinagbayaꞌan eꞌ panohoꞌan buwattēꞌ. 10 Aniyaꞌ kulban tinukbalan ma pasaltam, sagōꞌ mbal makalamud saga aꞌa ya maghinang ma langgal pagkulbanan Yahudi.
11 Ma agama Yahudi, bang taꞌabut waktu pagkulban ni Tuhan supaya pinuwasan dusa saga aꞌa, Imam Muwallam ya wajib amowa lahaꞌ hayop ni deyom Bilik Mahasussi boꞌ tinukbal ni Tuhan. Saguwāꞌ baran hayop itu binowa paluwas min kalumaꞌan inān, boꞌ yampa tinunuꞌ. 12 Damikiyanna si Isa, bay iya amatay isab ma luwasan daꞌira supaya tasussina saga aꞌana maka lahaꞌna luggiyaꞌ. 13 Jari paluwas kita min agama Yahudi tudju ni si Isa, ati ameyaꞌ kita pinaggunyak-gunyak buwat bay paggunyak-gunyak saga aꞌa ma iya. 14 Sabab halam aniyaꞌ palahatanta kakkal ma dunya itu. Tuꞌud kita angalagaran lahat dakayuꞌ ya paniyaꞌ ma sinosōng.
15 Angkan na, subay kitam magabut-abut anukbal pudji ni Tuhan labay min si Isa, hatina bissala pamudji paluwas min bowaꞌta, pagka si Isa pamanyabutantam. 16 Daꞌa kam alipas angahinang kahāpan ni seheꞌbi. Bahagiꞌinbi sigām kaniyaꞌbi bang sigām taluwaꞌ kasigpitan, sabab hinangbi buwattēꞌ saliꞌ dalil lalabotan makasulut atay Tuhan. 17 Beyaꞌunbi pamanduꞌ saga aꞌa pagmakōkanbi maka paluluy sadja kam ma panohoꞌan sigām. Anganjaga na paꞌin sigām ma kaꞌam boꞌ mbal ainay pal-imananbi, sabab aniyaꞌ waktu pabaihuꞌ sigām ni Tuhan angahaka pasal ai-ai bay tahinang sigām. Beyaꞌunbi isab panohoꞌan sigām supaya aniyaꞌ kakōgan sigām, sabab halam aniyaꞌ kasōngan ma kaꞌam bang sigām kabuhatan ma sabab panulangbi.
18 Daꞌa kam pahali angamuꞌan kami tabang ni Tuhan. Makatantu kami in itikad kami abontol sadja tudju ni Tuhan, maka halam aniyaꞌ angut kami saddī min hinang ahāp maka kasuddahan ahāp. 19 Aniyaꞌ isab panganjunjungku ni kaꞌam: angamuꞌ-ngamuꞌ kam konoꞌ ni Tuhan bang paꞌin aku makasaꞌut pabīng ni kaꞌam.
Lling Katapusan
20-21 Pangamuꞌantam Tuhan poꞌonan kasannangan, ya bay amangun Panghūꞌtam si Isa min kamatayna supaya iya allum pabīng. Si Isa ya dakayuꞌ babantugun angupiksaꞌ kitam ma sabab lahaꞌ kamatayna bay pamajatu kapagsulutan kakkal ni kasaumulan. Angipat na iya ma kitam sukuꞌna, ya pinagbahasa saliꞌ bili-bilina. Mura-murahan, bang paꞌin kam pinanyapan eꞌ Tuhan ai-ai kagunahanbi supaya ahāp eꞌbi angahinang kahandakna. Mura-murahan isab, bang paꞌin Tuhan angahinang ai-ai kabayaꞌanna ma deyom pangatayanbi ma sabab Al-Masi ya pameyaꞌanbi. Manjari sanglitantam Al-Masi salama-lama. Amin.
22 Saga dauranakanku, aniyaꞌ giꞌ panganjunjungku ni kaꞌam: ikutunbi lapal sulat ya pabeyaꞌku itu. Daꞌa kam sinumu amassa, sabab mbal sakit atahaꞌ. 23 Subay kataꞌuwanbi in danakantam si Timuti tapaluwas na min kalabusu. Bang iya makasaꞌut piꞌitu, bowaku iya ameyaꞌ ma aku anibaw kaꞌam.
24 Hakaꞌinbi saga pagnakuraꞌanbi sampay aꞌa sukuꞌ Tuhan ilu kamemon in kami itu amabeyaꞌ minsan laꞌa hal lapal kami ma sigām. Saga danakantam min lahat Itali itu amabeyaꞌ isab lapal sigām.
25 Mura-murahan, bang paꞌin kaꞌam kamemon pinaniyaꞌan tatabangan. Wassalam