PILIMUN
1
Sulat si Paul ni si
PILIMUN
1 Sulat itu min aku, si Paul, maka min si Timuti danakantam ma deyoman si Isa. Itiyaꞌ aku ma deyom kalabusu ma sabab si Isa Al-Masi ya pameyaꞌanku.
Pinasampay sulat itu ni kaꞌa, Pilimun. Bagay kami ka, maka seheꞌ kami maghinang ma Tuhan. 2 Pinasampay isab ni si Appiya danakantam dꞌnda, maka ni si Arkippus ya seheꞌ kami maghinang ma si Isa ibarat sundalu, maka ni kajamaꞌahan si Isa ya magtipun ma lumaꞌnu.
3 Mura-murahan bang paꞌin kam pinaniyaꞌan tatabangan maka kasannangan deyom atay eꞌ Mmaꞌtam Tuhan maka Panghūꞌtam si Isa Al-Masi.
Magsukul si Paul ni Tuhan
4 Magsukul aku ni Tuhan sakahabaꞌ waktu kapangamuꞌ-ngamuꞌku ma pasalnu, 5 sabab takaleku pasal pangandolnu ma Panghūꞌ Isa maka kaheya lasanu ma saga aꞌa sukuꞌ Tuhan kamemon. 6 Angamuꞌ-ngamuꞌ aku ni Tuhan bang paꞌin ka atuyuꞌ angahakaꞌan saga aꞌa pasal pangandolnu ma Panghūꞌ Isa, boꞌ supaya palalom panghatinu pasal kamemon kahāpan ya pinaniyaꞌan kitam ma sabab Al-Masi ya parakayuꞌantam. 7 Bagay, akōd toꞌongan aku sabab min lasanu, maka alasig isab deyom atayku ma sabab kapamalasignu pangatayan saga aꞌa sukuꞌ Tuhan.
Pangamuꞌ si Paul ma Pasal si Onesimus
8 Manjari itu, minsan aniyaꞌ kapatutku deyoꞌ min Al-Masi anohoꞌ kaꞌa pasal ai-ai subay hinangnu, mbal du aku magpanohoꞌan. 9 Sagōꞌ amuꞌanta sadja ka junjung, luwas min paglasata. Jari aku, si Paul, aꞌa toꞌa na, ya ma deyom kalabusu itu ma sabab kapameyaꞌku ma Al-Masi, hal anganjunjung laꞌa. 10 Angamuꞌ aku junjung ni kaꞌa pasal si Onesimus, ya saliꞌ anakku lahasiyaꞌ itu. Tahinang aku pagꞌmmaꞌanna sabab tabowa iya magkahagad ma si Isa hinabuku ma deyom kalabusu itu. 11 Tagnaꞌ heꞌ, halam bay aniyaꞌ gunana ma kaꞌa, sagōꞌ ma buwattinaꞌan aheya na gunana ma kaꞌam sampay isab ma aku.
12 Jari itiyaꞌ papoleꞌku ni kaꞌa si Onesimus, aꞌa kalasahanku toꞌongan. 13 Bilahi aku bang iya bay paddas maitu ma aku boꞌ aniyaꞌ pagantiꞌ min kaꞌa anabangan aku satꞌggolku ma deyom kalabusu itu ma sabab lapal ahāp ya pagnasihatku. 14 Sagōꞌ mbal ka pogosku subay anabangan aku. Ya kabayaꞌanku bang aku tabangannu, subay min bayaꞌnu toꞌongan. Jari mbal aku angahinang ai-ai bang ka mbal pasulut.
15 Ya angkan araiꞌ si Onesimus bay pinaokat min kaꞌa daiꞌ-daiꞌ, supaya iya pakakkal ma kaꞌa tꞌggolna allum. 16 Tagnaꞌ heꞌ banyagaꞌnu sadja iya, sagōꞌ ma buwattinaꞌan ahāp lagiꞌ iya min banyagaꞌ, sabab danakantam na iya kinalasahan. Ahalgaꞌ toꞌongan iya ma aku, sagōꞌ labi iya ahalgaꞌ ma kaꞌa sabab banyagaꞌnu iya maka danakannu isab ma sabab Panghūꞌ Isa ya parakayuꞌanbi.
17 Manjari, Pilimun, bang aku tabistanu saliꞌ seheꞌnu magusaha, taimaꞌun si Onesimus itu buwat panaimaꞌnu ma aku. 18 Bang aniyaꞌ dusana ma kaꞌa, atawa bang aniyaꞌ utangna, aku ya paꞌatasun. 19 Ndaꞌun paljanjiꞌanku itu, ma sulatan tanganku: “Aku si Paul amayad.” Nggaꞌi ka isab pagtungbuy, sagōꞌ aheya utangnu ma aku, sabab aku ya poꞌonna angkan ka taga-kallum kakkal na ni kasaumulan. 20 Ahoꞌ, bagay, dūlin lagiꞌ aku maka palasigun atayku ma sabab pangandolta ma Al-Masi ya Panghūꞌtam.
21 Sulatku sulat itu sabab tatantuku in kaꞌa akale du. Kataꞌuwanku in tabangnu ma aku palabi lagiꞌ min pangamuꞌku itu. 22 Aniyaꞌ giꞌ isab amuꞌku: sakapin aku bilik mailu, sabab aholat aku in pangamuꞌbi ni Tuhan nirūlan du eꞌna, ati niꞌndeꞌan du aku ni kaꞌam.
Bissala Katapusan
23 Itiyaꞌ si Epapras, seheꞌku maitu ma deyom kalabusu ma sabab si Isa Al-Masi ya pameyaꞌanna, amabeyaꞌ minsan laꞌa hal lapalna ma kaꞌa. 24 Damikiyanna disi Markus, si Aristarkus, si Demas maka si Lukas, saga seheꞌku maitu maghinang ma Tuhan, amabeyaꞌ isab lapal sigām ma kaꞌa.
25 Mura-murahan, bang paꞌin kam kamemon pinaniyaꞌan tatabangan eꞌ si Isa Al-Masi Panghūꞌtam.
Wassalam