Titus i

TITUS

Pahati pasal sulat itu

Si Titus itu bangsa Girīk. Abataꞌ lagiꞌ iya ma waktu kasambutna sulat itu. Bay iya makakale ma pagnasihat si Paul angkan iya angandol na ma si Isa Al-Masi. Manjari tabanganna si Paul ma hinangna, ati kapangandolan toꞌongan iya.

Bay iya ameyaꞌ ma si Paul ma lꞌngnganna pabalik ni saga lahat kaseheꞌ bay pagnasihatanna. Jari aniyaꞌ dakayuꞌ lahat ya patꞌkkahan sigā ma lꞌngngan eꞌ-i, ya na pūꞌ Kerete. Manjari itu, song paꞌin sigā alaꞌan, anohoꞌ si Paul ma si Titus subay paꞌbba ma pūꞌ inān angahatul saga aꞌa mainaꞌan ya magpangandol ma Panghūꞌ Isa.

Ma deyom sulat itu pinanduꞌan eꞌ si Paul si Titus bang buwattingga pameneꞌna aꞌa pinatꞌnnaꞌ nakuraꞌ ma saga jamaꞌa si Isa Al-Masi ma lahat dakayuꞌ maka dakayuꞌ, maka bang buwattingga subay addat sigām. Pinanduꞌan iya isab pasal mattoꞌa maka ondeꞌ bahaꞌu, dꞌnda maka lꞌlla, bang buwattingga subay kaul-piꞌil sigām. Sinōꞌ iya angalāng saga guru ya magpanduꞌ nggaꞌi ka bꞌnnal, sabab panduꞌ sigām hal amowa saga Almasihin magkasasawan.