Titus 1

TITUS

Sulat si Paul ni si

TITUS

¹ Sulat itu min aku, si Paul, sosohoꞌan Tuhan. Kawakilan isab aku eꞌ si Isa Al-Masi, sinōꞌ pehēꞌ anabangan saga aꞌa bay tapeneꞌ eꞌ Tuhan boꞌ pasōng pangandol sigām ma iya, boꞌ pasōng isab pangitaꞌu sigām pasal panduꞌ bꞌnnal, ya amowa sigām ameyaꞌ ma kabayaꞌan Tuhan. ² Angkan buwattēꞌ, sabab aniyaꞌ kallum kakkal holatantam. Kallum kakkal inān bay panganjanjiꞌ asal eꞌ Tuhan dahū giꞌ min waktu pamapanjari dunya, maka Tuhan itu mbal ataꞌu magputing. ³ Taꞌabut paꞌin waktu bay panganggantaꞌ inān, pinaluwas eꞌna lapalna labay min pagnasihatku. In pagnasihat itu bay pangandol ma aku eꞌ Tuhantam Manglalappas.

⁴ Pasampayku sulat itu ni kaꞌa, Titus. Saliꞌ na ka anakku lahasiyaꞌ pagka kita angandol saliꞌ-saliꞌ ma si Isa Al-Masi. Mura-murahan, bang paꞌin ka pinaniyaꞌan tatabangan maka kasannangan atay eꞌ Mmaꞌtam Tuhan maka eꞌ si Isa Al-Masi, ya maglalappas ma kitam.

Saga Hinang si Titus ma Pūꞌ Kerete

⁵ Bay ka bbahanku mailu ma pūꞌ Kerete boꞌ tahatulnu ai-ai halam bay aubus, tapatꞌnnaꞌnu isab saga aꞌa nihinang pagmattoꞌahan ma saga jamaꞌa si Isa ya magtimuk ma kalahat-lahatan ilu kamemon. Entomun bay panohoꞌanku ma kaꞌa: ⁶ bang aꞌa pinatꞌnnaꞌ pagmattoꞌahan subay halam aniyaꞌ dusana panāꞌan iya maka subay dakayuꞌ du hꞌndana. Saga panganakna isab subay angandol ma si Isa Al-Masi, maka subay mbal bulaꞌug atawa atuwas pinanduꞌan. ⁷ Sababna bang aꞌa pinatꞌnnaꞌ pagmakōkan ma saga jamaꞌa si Isa, hinang Tuhan ya pangandol ma iya, angkan subay halam aniyaꞌ dusa panāꞌan iya. Subay iya mbal abbuhan atawa alꞌkkas apasuꞌ atayna. Subay iya nggaꞌi ka aꞌa patilango, maka subay mbal abꞌngngis atawa napsuhan ma pilak. ⁸ Bang aniyaꞌ aꞌa pehēꞌ ni lumaꞌna subay paꞌiddana toꞌongan, maka subay iya kaꞌamuhan isab ma ai-ai makahāp. Subay iya ahantap ma ai-ai hinangna, maka subay iya abontol. Subay iya ameyaꞌ ma Tuhan min deyom atayna, maka subay ataꞌu ahalliꞌan napsuna. ⁹ Subay ahogot pamalutna ma lapal kapangandolan itu, buwat bay pamanduꞌ ma iya. Manjari ataꞌu iya amahogot atay saga aꞌa kaseheꞌan, pagka pamanduꞌna panduꞌ kasabꞌnnalan ma sigām. Maka ataꞌu iya anambungan saga aꞌa anaggaꞌ iya boꞌ pabontolna kasāꞌan sigām.

¹⁰ Angkan subay buwattēꞌ, sabab aheka aꞌa atuwas kōk sigām maka agagga pinanduꞌan, labi-lubaꞌna saga seheꞌbi bay papinda min agama Yahudi. Binissala eꞌ saga aꞌa inān ya halam aniyaꞌ pūsna, maka nilingu eꞌ sigām aꞌa kaseheꞌan. ¹¹ Lāngun saga aꞌa magbissala buwattēꞌ sabab aheka aꞌa magtautaiꞌanak tabowa asasaw eꞌ pamanduꞌ sigām, panduꞌ mbal wajib pinamūng, maka panduꞌ pagpilak sadja. ¹² Aniyaꞌ dakayuꞌ pagkahi sigām bangsa Kerete, aꞌa bibissalahun, bay makapaluwas bissala, yuk-i, “Saga bangsa Kerete itu hal magputing, abꞌngngis sigām buwat sattuwa talun, napsuhan sigām maka lisuꞌan maghinang.” ¹³ Taluwaꞌ bissala inān, angkan subay lāngnu saga aꞌa magpanduꞌ inān boꞌ supaya ahāp pagkahagad sigām ma panduꞌ bꞌnnal. ¹⁴ Sohoꞌun sigām daꞌa angisbat ma saga kissa-kissa bangsa Yahudi ya nggaꞌi ka bꞌnnal, daꞌa isab ameyaꞌ ma panohoꞌan bay nihinang eꞌ saga aꞌa pataikut min kasabꞌnnalan. ¹⁵ Bang aꞌa asussi pangatayanna, asussi ai-ai kamemon makani-pikilanna. Sagōꞌ bang aꞌa mbal asussi pangatayanna maka mbal amꞌnnal ma si Isa Al-Masi, halam aniyaꞌ asussi ma iya sabab katamakan deyom pamikilna, maka mbal tapagbiddaꞌna hāp maka laꞌat. ¹⁶ Saga aꞌa inān magbauꞌ-bauꞌ in sigām ataꞌu ma Tuhan, sagōꞌ hinang sigām maka bissala sigām mbal magtaluwaꞌ. Makabꞌnsi-bꞌnsi addat sigām, mbal sigām ameyaꞌ panduꞌ, maka mbal makapaghinang ahāp.