Titus 2

Panduꞌ Bꞌnnal

¹ Samantalaꞌ kaꞌa, Titus, pamituwanu subay magtaluwaꞌ maka panduꞌ bꞌnnal. ² Pituwahin saga mattoꞌa lꞌlla in sigām subay ahalliꞌ ma napsu baran sigām, subay ahāp addat sigām, maka subay ahantap ma ai-ai nihinang eꞌ sigām. Subay ahogot toꞌongan pangandol sigām ma si Isa, subay alasa ma pagkahi sigām, maka subay asandal minsan ai tumꞌkka ni sigām. ³ Buwattēꞌ isab pamituwanu ma saga mattoꞌa dꞌnda. Ya addat-tabiꞌat sigām subay makatōp ma dꞌnda ya atuyuꞌ ameyaꞌ ma kabayaꞌan Tuhan. Subay sigām daꞌa angalimut ma seheꞌ sigām maka subay mbal tagihan anginum ai-ai makalango. Ya pamanduꞌ eꞌ sigām subay panduꞌ ahāp. ⁴ Manjari tabiꞌat eꞌ mattoꞌa dꞌnda itu saga karꞌndahan abataꞌ giꞌ boꞌ sigām alasa ma anak-hꞌlla sigām, ⁵ sampay ahantap ma ai-ai hinang sigām. Subay asussi pangatayan sigām maka subay atuyuꞌ maghinang ma deyom lumaꞌ. Subay isab angaku kagaraꞌan eꞌ hꞌlla sigām. Bang buwattēꞌ addat sigām, manjari halam aniyaꞌ makapahꞌllingan laꞌat pasal lapal Tuhan itu.

⁶ Damikiyanna isab saga lꞌlla abataꞌ giꞌ, sohoꞌun sigām pahantap ma ai-ai tahinang sigām. ⁷ Kaꞌa Titus, subay ahāp toꞌongan kaul-piꞌilnu boꞌ ka manjari panunuran eꞌ saga seheꞌnu. Bang ka amanduꞌ subay abontol sadja pamanduꞌnu, maka bowahannu subay magtaluwaꞌ maka lapal Tuhan ya pamanduꞌnu. ⁸ Ma ai-ai pamanduꞌnu paggunahun saga bissala ahāp ya mbal tasoway, supaya aiyaꞌ saga kuntaratam pagka mbal makabāk sababan pamahꞌlling sigām laꞌat ma kitam.

⁹ Panduꞌin saga ata in sigām subay ameyaꞌ kapagbayaꞌan nakuraꞌ sigām, maka subay patuyuꞌ anulut atayna. Mbal sigām manjari anganjawab ma panohoꞌan nakuraꞌ sigām. ¹⁰ Subay sigām mbal anangkawan nakuraꞌ sigām, sagōꞌ subay mattan in sigām ahatul maka kapangandolan sakahabaꞌ waktu. Jari kaꞌamuhan saga aꞌa ma pamanduꞌtam pasal Tuhan, ya angalappas ma kitam min hukuman dusa.

¹¹ Sabab pinatuwaꞌ na eꞌ Tuhan lasana maka aseꞌna boꞌ kalappasan saga manusiyaꞌ kamemon min hukuman dusa. ¹² Kapanduꞌan kitam eꞌ lasa maka aseꞌ Tuhan subay angꞌbba min ai-ai ya mbal amowa kitam tudju ni iya. Subay bbahanta isab napsuta ma legot dunya itu. Jari subay kitam ahantap ma ai-ai hinangtam. Subay kitam abontol sadja, maka subay ameyaꞌan kabayaꞌan Tuhan satꞌggoltam ma dunya itu, ¹³ samantalaꞌ kitam angalagaran llaw ya asal holatantam. Ya na inaꞌan llaw patuwaꞌ sahaya Tuhantam Sangat Kawasa, si Isa Al-Masi ya maglalappas ma kitam. ¹⁴ Bay iya maglillaꞌ amatay ma sababtam, supaya kitam talꞌkkat eꞌna maka kapuwasan min kalaꞌatan kamemon. Kabayaꞌanna subay asussi ataytam, boꞌ kitam manjari aꞌa sukuꞌna na, ya atuyuꞌ maghinang kahāpan.

¹⁵ Ya itu pamanduꞌnu ni saga aꞌa. Amay-amayin sigām maka biꞌatun sasuku sigām asāꞌ, sabab aniyaꞌ kapatutnu anagda sigām. Subay halam aniyaꞌ amareyoꞌ kaꞌa.