Titus 3

Sakap Maghinang Ahāp

¹ Paentomin saga bebeyaꞌan si Isa Al-Masi mailu, in sigām subay angaku ma kapatut saga pagnakuraꞌan maka saga aꞌa angꞌntan pagparinta, ati subay ameyaꞌ ma panohoꞌan sigām. Subay sigām sakap maghinang ai-ai ahāp. ² Sohoꞌun sigām daꞌa angalimut ma sai-sai, sagōꞌ subay sigām pasulut maka pabagay sadja ma aꞌa kaseheꞌan. Subay ahanunut pahꞌlling sigām ni aꞌa kamemon.

³ Sabab in kitam bay du isab aꞌawam ma waktu palabay, bay agagga sinohoꞌ, maka bay talingu. Tabowa-bowa na paꞌin kitam eꞌ napsu ahāp-alaꞌat, ai-ai ya makahāp palasahan. Bay alaꞌat isab kasuddahantam maka angandaliꞌit na paꞌin kitam ma saga seheꞌtam. Abꞌnsi kitam ma pagkahita, maka kinabꞌnsihan isab kitam eꞌ sigām. ⁴ Sagōꞌ Tuhan, ya angalappas kitam, bay makapatuwaꞌ kahāpna maka lasana ma bangsa manusiyaꞌ, ⁵ ati puwasanna kitam min hukuman dusa. Nggaꞌi ka ma sabab aniyaꞌ kahāpan bay hinangtam, sagōꞌ ma sabab aseꞌna ma kitam. Nianakan kitam pabīng eꞌ Rū Sussi maka kabuwanan kallum bahaꞌu pagka sussina ataytam. ⁶ Manglabi-labihan na kahāpan ma kitam pagka kitam pinasangonan Rū Sussi eꞌ Tuhan ma sabab si Isa Al-Masi ya angalappas kitam. ⁷ Sabab min lasa maka aseꞌ Tuhan ya angkan kitam pinapagkahāp na maka Tuhan, boꞌ kitam kaniyaꞌan kallum kakkal ya asal holatantam. ⁸ Bꞌnnal sadja ya pahꞌllingku itu. Kabayaꞌanku subay ka amanduꞌ pahāp-hāp pasal saga panduꞌku ya ma deyom sulat itu. Sohoꞌun saga aꞌa ilu angikut toꞌongan boꞌ supaya sasuku sigām magkahagad ma Tuhan magmatuyuꞌ na paꞌin maghinang ahāp. Ahāp asal hinang sigām buwattēꞌ, maka aniyaꞌ kagunahanna ma aꞌa kamemon.

⁹ Saguwāꞌ halliꞌin saga aꞌa magjawab ma halam aniyaꞌ kagunahanna, maka pagsuli-suli pasal saga ōn kaꞌmboꞌ-mboꞌan sigām pangkat-mamangkat. Daꞌa ka isab palamud bang aniyaꞌ maglugat atawa magsuꞌal pasal saraꞌ bay pangꞌbba eꞌ si Musa ma masa awal eꞌ. Saga pagsuli-suli buwattēꞌ mbal makahāp, halam aniyaꞌ pūsna. ¹⁰ Bang aniyaꞌ seheꞌbi makatagnaꞌan paglugat ma saga bebeyaꞌan si Isa, sanggupin iya mintꞌdda, boꞌ sanggupin iya pabīng min tꞌdda laꞌa. Bang iya mbal angꞌbba min hinangna heꞌ, daꞌa ka palamud ma iya. ¹¹ Sabab kataꞌuwannu in aꞌa buwattēꞌ, abengkok asal pikilanna maka dusahan. Atampal sāꞌna sabab min hinangna.

Bissala Katangbusan

¹² Na, Titus, bang atꞌkka piꞌilu si Artemas atawa si Tikikus, sai-sai ya sohoꞌku, patuyuꞌ ka pehēꞌ ni daꞌira Nikupulis boꞌ kitam magbāk mahēꞌ. Sabab agaraꞌ aku patꞌnnaꞌ mahēꞌ satꞌggol timpu pamaliyu. ¹³ Patuntulun si Apollos maka si Senas ya abugaw heꞌ bang sigā pauntas ni palꞌngnganan sigā. Buwanin sigā ai-ai kagunahan sigā. ¹⁴ Panduꞌin saga seheꞌtam bebeyaꞌan si Isa Al-Masi ilu, in sigām subay patukid maghinang ahāp boꞌ aniyaꞌ panabang sigām ma aꞌa kaseheꞌan bang kasigpitan. Bang buwattēꞌ aniyaꞌ du paꞌin kagunahan saga kahinangan sigām.

¹⁵ Saga seheꞌku kamemon maitu amasampay minsan laꞌa hal lapal sigām ni kaꞌa. Ya du aku amasampay kasi-lasaku ni sasuku alasahan kami, pagka kitam dambeyaꞌan angandol ma Al-Masi.

Mura-murahan, bang paꞌin kaꞌam kamemon pinaniyaꞌan tatabangan eꞌ Tuhan. Wassalam