4
1 Na, Timuti, aniyaꞌ giꞌ panohoꞌanku toꞌongan ma kaꞌa. Saksiꞌku Tuhan maka si Isa Al-Masi, ya angahukum manusiyaꞌ ma sinosōng, saga aꞌa masi allum sampay saga aꞌa magpatayan. Song iya pabalik piꞌitu ni dunya amatꞌnnaꞌ pagparintana, angkan buwattitu pangamay-ngamayku ma kaꞌa. 2 Pagnasihatun lapal Tuhan, anakap ka di-nu minsan ai waktu, kinale ka llingnu atawa mbal. Bang aniyaꞌ makahinang kasāꞌan, biꞌatun. Bang aniyaꞌ makarusa, lāngun. Bang aniyaꞌ alamma pangandolna ma Tuhan, pakosogun. Patampalun pamanduꞌnu, maka imanin saga aꞌa panduꞌannu minsan sigām ahunit pinanduꞌan. 3 Angkan buwattitu panohoꞌanku ma kaꞌa, sabab aniyaꞌ waktu ma sinosōng mbal anaimaꞌ saga aꞌa ma panduꞌ bꞌnnal. Ya tinurul eꞌ sigām ai-ai kabayaꞌan sigām, ati aheka guru pinatimuk eꞌ sigām, sasuku amowahan sigām lling ahāp kinale. 4 Pataikut sigām min panduꞌ bꞌnnal ati akale gom paꞌin ma kissa bay hinangan manusiyaꞌ. 5 Saguwāꞌ kaꞌa, Timuti, subay atotog pikilannu minsan ai kalabayannu. Sandalin kasigpitan ai-ai, maka tuyuꞌin hinangnu magnasihat lapal ahāp pasal si Isa Al-Masi. Hinangun toꞌongan ai-ai kamemon bay pamahinang kaꞌa eꞌ Tuhan.
6 Song na taꞌabut gantaꞌan panukbal kallumku, sapantun inuman panukbal ni Tuhan. Asekot na waktu pamoleꞌku ni ahirat. 7 Bay na puspusanku kosogku saliꞌ dalil aꞌa maglomba ma pagdaganan, ati makasampay na aku ni gindananna. Halam bay bbahanku pangandolku ma Tuhan. 8 Manjari aniyaꞌ asal tinagama eꞌ Tuhan ma deyom sulgaꞌ panungbasna ma sasuku bay abontol atayna ma deyom dunya. Pinasambutan du aku tungbas inān eꞌ Panghūꞌ Isa Al-Masi, ya maghuhukum abontol, bang taꞌabut llaw aheya inān. Nggaꞌi ka isab hal aku ya tinungbasan. Tinungbasan du isab saga aꞌa kamemon sasuku aholat angalagaran kapiꞌitu si Isa.
Pasal bay Kalabayan si Paul
9 Patuyuꞌ ka pasaꞌut piꞌitu, 10 sabab bay na aku niꞌbbahan eꞌ si Demas pagka ahalgaꞌ ma iya saga legot dunya itu, ati waꞌi na iya alaꞌan tudju ni lahat Tessaloneka. Si Kresken waꞌi na ni Galatiya, maka si Titus waꞌi ni Dalmatiya. 11 Luwal laꞌa si Lukas ya seheꞌku maitu. Ngāꞌun si Markus ati bowahun piꞌitu sabab makatabang iya ma aku ma hinangku itu. 12 Inaꞌan si Tikikus bay sohoꞌku ni Epesos. 13 Bang ka piꞌitu, bowahun sꞌmmekku ya bay taꞌbba ma lumaꞌ si Karpus mahēꞌ ma lahat Trowas. Bowahun isab saga būkku, ya lagiꞌna saga katas panulatanku.
14 Si Iskandar, ya aꞌa magsasal eꞌ, bay sidda angalaꞌat aku. Sagōꞌ pīꞌun na, Tuhan ya ataꞌu anungbasan iya ma sabab hinangna. 15 Kaꞌa isab, pahalliꞌ ka ma iya sabab akosog panaggaꞌna ma lapal pagnasihatta.
16 Tagnaꞌ aku sinumariya mahēꞌ ma saraꞌ, halam aniyaꞌ bay angandapitan aku. Bay aku siniya-siya eꞌ seheꞌku kamemon. Mura-murahan, bang paꞌin mbal binista eꞌ Tuhan paghinang sigām buwattēꞌ. 17 Sagōꞌ minsan aku bay niꞌbbahan eꞌ sigām, pagapiꞌ asal Panghūꞌ Isa ma aku. Kabuwanan aku kosog eꞌna supaya aku makapagnasihat ma saga aꞌa nggaꞌi ka Yahudi, boꞌ sigām makakale pahāp ma lapalna. Jari kapuwasan aku eꞌna min kamulahan, sapantun aꞌa niliyusan min bowaꞌ halimaw. 18 Tantu isab aku lappasan eꞌ Tuhan min kalaꞌatan kamemon ya patꞌkka ni aku ma sinosōng, ati binowa aku eꞌna ni lahat pagparintahanna ma deyom sulgaꞌ, ma halam aniyaꞌ baya-bayana. Patut iya pinudji sampay ni kasaumulan. Amin.
Bissala Katangbusan
19 Itiyaꞌ aku amasampay minsan laꞌa hal lapalku ni si Prisila maka si Akila maka disi Onesepor magtaiꞌanak. 20 Si Erastus, heꞌ na angagad ma Kurintu, maka si Trupimus bay bbahanku ma daꞌira Militus pagka asaki. 21 Amay-amay, Timuti, pasaꞌut ka piꞌitu boꞌ ka mbal taꞌabut eꞌ musim pamaliyu.
Itiyaꞌ isab disi Ubulus, si Pudin, si Linus maka si Klauda magpasampay isab minsan laꞌa hal lapal sigām ni kaꞌam. Damikiyanna isab saga dauranakantam bebeyaꞌan si Isa kaseheꞌan.
22 Mura-murahan, bang paꞌin patotog Panghūꞌtam ma deyom ataynu. Bang paꞌin kaꞌam kamemon kaniyaꞌan tatabangan min Tuhan. Wassalam