3
Pasal Masa Kahinapusan
1 Entomun toꞌongan itu, Timuti. Bang sōng na taꞌabut masa kahinapusan dunya itu, aheka katiksaꞌan paniyaꞌ. 2 Ya niangut eꞌ saga aꞌa ma masa inaꞌan kahāpan di-sigām sadja, mbal takannal eꞌ sigām aꞌa kaseheꞌan. Napsuhan du sigām ma pilak, abbuhan sigām, maka alanga atay sigām. Amissala sigām kalaꞌatan ma pagkahi sigām maka mbal ameyaꞌ ma pamiꞌat mattoꞌa sigām. Mbal sigām ataꞌu magsukul, maka landuꞌ sigām asabul. 3 Mbal sigām maꞌaseꞌ ma seheꞌ sigām, mbal isab bilahi magkahāp bang aniyaꞌ bay pagsaggaꞌan. Angalimut na paꞌin sigām ma aꞌa kaseheꞌan, maka nirūlan ai-ai kinanapsuhan baran sigām. Abꞌngngis sigām makalanduꞌ, maka abꞌnsi ma ai-ai ahāp. 4 Mbal sigām kapangandolan sabab paninipu. Lumanduꞌan esog sigām, maka mbal manjari pagmalangkahi sigām. Bilahi sadja sigām maghāp palasahan ati halam aniyaꞌ bayaꞌ sigām angisbat Tuhan. 5 Bꞌnnal sigām magagama sagōꞌ halam aniyaꞌ pūsna sabab mbal sigām bilahi pinindahan pangatayan. Otoꞌ halliꞌin saga aꞌa buwattēꞌ.
6 Aniyaꞌ isab saga lꞌlla ma waktu inaꞌan-i pasōd ni deyom lumaꞌ aꞌa boꞌ amidjakan saga karꞌndahan magkarupangan. Asasaw pikilan saga dꞌnda inān sabab min dusa sigām, ati abowa-bowa sigām eꞌ napsu magindaginis. 7 Akale sadja sigām ma sai-sai amanduꞌ, sagōꞌ mbal toꞌongan makahati ma panduꞌ bꞌnnal. 8 Saga lꞌlla ya amidjak inān anaggaꞌ asal ma panduꞌ bꞌnnal. Asagut deyom pikilan sigām, maka pangandol sigām nggaꞌi ka bꞌnnal. Ya panunuran sigām kahinangan disi Jannis maka si Jambes, ya bay anaggaꞌ si Musa ma masa awal eꞌ. 9 Saguwāꞌ in pamanduꞌ saga aꞌa amidjak inān halam du aniyaꞌ kasōnganna. Mbal atꞌggol, kinataꞌuwan du karupangan sigām eꞌ aꞌa kamemon, buwat bay karupangan disi Jannis maka si Jambes eꞌ.
Patogol ma Panduꞌ Bꞌnnal
10 Samantalaꞌ kaꞌa, Timuti, kataꞌuwannu du bang ai pamanduꞌku maka bang buwattingga kaul-piꞌilku maka bang ai mohotku. Kataꞌuwannu isab in aku angandol asal ma si Isa. Imananku maka kalasahanku isab saga pagkahiku, maka sandalanku saga kasukkalan. 11 Kataꞌuwannu du saga kapinjalaꞌan maka kasigpitan bay patꞌkka ni aku mahēꞌ ma daꞌira Antiyuk maka mahēꞌ ma Ikuni maka ma Listara. Ahoꞌ, kataꞌuwannu saga kapinjalaꞌan kamemon bay kasandalanku. Daipara kapuwasan aku eꞌ Panghūꞌtam min kasukkalanku inān kamemon. 12 Bꞌnnal asal, sasuku bilahi ameyaꞌ ma kabayaꞌan Tuhan ma sabab si Isa Al-Masi ya parakayuꞌanna, tantu sigām katꞌkkahan kapinjalaꞌan. 13 Sagōꞌ saga aꞌa patilaꞌatun maka saga aꞌa pangakkal, paruhun na paꞌin kahinangan sigām alaꞌat. Angalingu sigām ma seheꞌ sigām, maka talingu du isab baran sigām. 14 Sagōꞌ kaꞌa, Timuti, patogol ka ameyaꞌ ma panduꞌ bꞌnnal bay pamanduꞌ kaꞌa, ya panduꞌ asal pagkahagarannu toꞌongan. Kataꞌuwannu du bang sai bay amanduꞌan kaꞌa. 15 Maka kataꞌuwannu isab kahālannu sangay min karikiꞌ-dikiꞌnu sampay ni kaheyanu, bay ka pinaꞌanad asal ma ai-ai tasulat ma deyom Kitab. Ya na inaꞌan poꞌonanna angkan ka makapikil anaimaꞌ kallum kakkal, ya pamuwan eꞌ Tuhan ma sasuku angandol ma si Isa Al-Masi. 16 Kamemon tasulat ma deyom Kitab inān bay pinasulat eꞌ Tuhan, ati aheya kagunahanna pamanduꞌ maka pangalāng saga hinang mbal taluwaꞌ, maka pamabontol kasāꞌan. Aheya isab kagunahanna pamituwa pasal addat-tabiꞌat ahāp, 17 supaya ajukup saga aꞌa sosohoꞌan Tuhan ma pangitaꞌu maka ma kapandayan. Jari sakap na sigām maghinang saga hinang ahāp kamemon.