2
1 Manjari kaꞌa Otōꞌ, pakosogun pangandolnu sabab min tatabangan ya pamuwan kitam bebeyaꞌan si Isa Al-Masi. 2 Saga pamanduꞌku bay takalenu min aku ma alopan saga saksiꞌ aheka, subay patanggungnu ma saga aꞌa kapangandolan, aꞌa ataꞌu isab amanduꞌan saga seheꞌ sigām. 3 Maglillaꞌ ka ameyaꞌan aku anandalan kasigpitan, supaya ka makasaliꞌ ni sundalu ahāp ma deyoman si Isa Al-Masi. 4 Sabab bang aꞌa magsundalu, mbal iya palamud ma kahinangan saga aꞌa nggaꞌi ka sundalu sabab kabayaꞌanna subay kasulutan nakuraꞌna. 5 Atawa bang aꞌa bilahi maglomba ma pagdaganan, mbal iya makaraꞌug bang mbal beyaꞌna aturan paglomba heꞌ. 6 Bang aꞌa isab magsangsāꞌ maghuma, subay iya parahū angāꞌ bahagiꞌna min buwaꞌ huma heꞌ. 7 Taliꞌun toꞌongan saga pamaralilku itu, sabab tinabang du ka eꞌ Tuhan boꞌ tahatinu toꞌongan.
8 Entomun si Isa Al-Masi, tubuꞌ iya si Daꞌud maka bay iya pinakallum pabīng min kamatay. Ya na itu lapal ahāp pagnasihatku. 9 Angananam aku kabinasahan ma sabab pagnasihatku lapal ahāp itu, maka itiyaꞌ aku tinahan ma deyom kalabusu buwat aꞌa bay makalanggal saraꞌ. Sagōꞌ minsan tinahan baranku itu, mbal tatahan lapal Tuhan. 10 Manjari maglillaꞌ aku angananam kabinasahan ma sabab saga aꞌa tapeneꞌ eꞌ Tuhan, boꞌ supaya sigām parakayuꞌ ni si Isa Al-Masi ati pinaniyaꞌan kasalamatan ma deyom sahaya Tuhan salama-lama. 11 Bꞌnnal sadja saga kabtangan itu, ya yuk-i,
“Bang kita bay ameyaꞌ ma si Isa ma kamatayna,
ameyaꞌ du isab ma iya ma kallumna.
12 Bang kita anandal na paꞌin ma deyom kabinasahan,
ameyaꞌ du kita ma si Isa angꞌntanan pagparinta ma sinosōng.
Bang kita amalilu in si Isa nggaꞌi ka pameyaꞌanta,
pinaliluhan du kita isab eꞌna.
13 Bang kita mbal atꞌttog angandol ma iya,
masi du iya kapangandolan sabab mbal toꞌongan apinda addatna.”
Sosohoꞌan ya Makasulut Atay Tuhan
14 Paentomin saga bebeyaꞌan si Isa mailu pasal pamituwaku itu. Amay-amayin toꞌongan sigām ma pangꞌndaꞌ Tuhan, sōꞌun sigām daꞌa magsuꞌal pasal saga kabtangan. Saga pagsuꞌal itu mbal du makahāp, sagōꞌ amakaꞌat gom paꞌin pangandol saga aꞌa sasuku makakale iya. 15 Puspusun kosognu amahāp ai-ai hinangnu boꞌ ka makasulut atay Tuhan. Subay abontol eꞌnu magnasihat pasal lapal kasabꞌnnalan, supaya ka mbal aiyaꞌ ma sabab hinangnu. 16 Halliꞌin saga pagbissala karupangan ya mbal makasulut atay Tuhan. Bang aꞌa palamud ma saga pagbissala buwattēꞌ, ya kamattihanna tabowa sigām magdusa ati palawak gom paꞌin min Tuhan. 17 Ya panduꞌ saga aꞌa magbissala karupangan eꞌ ibarat dugsul, palatag na paꞌin ma deyom baran sampay alapat kamemonna. Buwattēꞌ isab saga pamanduꞌ disi Himinus maka si Pilitus. 18 Kaꞌbbahan eꞌ sigā panduꞌ bꞌnnal. Yuk sigā in pamakallum saga aꞌa magpatayan palabay na, angkan halam na aniyaꞌ pinakallum ma sinosōng. Jari minnēꞌ aniyaꞌ saga aꞌa mbal na angandol ma si Isa. 19 Sagōꞌ ya panduꞌ min Tuhan itu apagon asal, saliꞌ dalil papagan lumaꞌ mbal tajogjog. Aniyaꞌ sulat ma papagan itu, yuk-i, “Kinataꞌuwan eꞌ Tuhan bang sai aꞌana.” Aniyaꞌ giꞌ isab sulatna dakayuꞌ, yuk-i, “Sasuku ahꞌlling in iya sukuꞌ Tuhan, subay bbahanna saga kahinangan alaꞌat.”
20 Buwattitu pamaralilku ma kaꞌa, Timuti. Ma deyom lumaꞌ aheya ya patꞌnnaꞌan aꞌa dayahan, magginisan kapanyapanna. Aniyaꞌ saga pangisihan hinangan bulawan, aniyaꞌ isab hinangan pilak. Subay palkalaꞌ aheya boꞌ yampa ginuna saga pangisihan ahalgaꞌ itu. Aniyaꞌ isab saga pangisihan hinangan kayu atawa tanaꞌ, makajari ginuna llaw-llaw. 21 Manjari saga bebeyaꞌan si Isa saliꞌ dalil kapanyapan indaginis. Sasuku anussihan di-na min laꞌat kamemon, tapagguna ma pakaradjaꞌan aheya. Ya angkan iya tapagguna eꞌ Panghūꞌna, sabab tasussi deyom atayna maka sakap iya maghinang ai-ai ahāp.
22 Halliꞌin saga napsu baran ya kabiyaksahan saga ondeꞌ bahaꞌu. Ya tuyuꞌannu subay atay abontol, maka pagiman, maka paglasa, maka kasannangan. Magdaꞌatay ka maka saga aꞌa angarap ma Panghūꞌta si Isa Al-Masi min deyom atay sussi. 23 Daꞌa ka palamud ma saga pagjawab karupangan, ya halam aniyaꞌ kapūsanna. Kataꞌuwannu in pagjawab buwattitu tahinang sadja pagbonoꞌ. 24 Pagka sosohoꞌan Tuhan ka, daꞌa ka maglugat maka sai-sai. Subay ka angahāp maka anabalan aꞌa kamemon, maka subay ahāp eꞌnu magpanduꞌ. 25 Bang aniyaꞌ gantaꞌ makasaggaꞌ panduꞌnu, subay ahanunus panambungnu. Kalu sigām binuwanan pikilan eꞌ Tuhan boꞌ makabāk pagsusunan, ati tabowa sigām pataꞌu ma panduꞌ kasabꞌnnalan. 26 Jari angahāp pikilan sigām pabīng, ati papuwas sigām min pangꞌntanan nakuraꞌ saitan, ya bay anganjallat pikilan sigām boꞌ ameyaꞌ maghinang kabayaꞌanna.