2 TIMUTI
1
Sulat si Paul Karuwana ni si
TIMUTI
1 Sulat itu min aku, si Paul. Kawakilan aku eꞌ si Isa Al-Masi sabab min kabayaꞌan Tuhan, sinōꞌ magnasihat ni saga aꞌa pasal kallum kakkal ya bay paljanjiꞌan Tuhan ma sasuku parakayuꞌ ma si Isa Al-Masi.
2 Pasampayku sulat itu ni kaꞌa, Timuti. Saliꞌ ka anakku kinalasahan. Mura-murahan, bang paꞌin ka pinaniyaꞌan tatabangan maka kasannangan deyom atay eꞌ Mmaꞌta Tuhan maka Panghūꞌta si Isa Al-Masi. Bang paꞌin ka kinaꞌaseꞌan isab.
Pamalasig si Paul ma Pangatayan si Timuti
3 Magsukul aku ni Tuhan, ya paghinanganku. Maghinang na paꞌin aku ma iya ma abontol itikadku, buwat bay paghinang kamattoꞌahanku ma masa awal eꞌ. Magsukul aku ni Tuhan ma sababnu, Timuti, pagka taentomta ka ma waktu kapangarapku ni Tuhan llaw maka sangom. 4 Bang taentomku bay panangisnu ma waktu katulakku, landuꞌ aku bilahi magꞌndaꞌ maka kaꞌa pabalik supaya aku kinōgan toꞌongan. 5 Taentomku isab kapangandolnu sabꞌnnal-bꞌnnal ma si Isa Al-Masi, buwat bay pangandol mboꞌnu dꞌnda si Loyda maka bay pangandol inaꞌnu si Yunis. Tatantuku isab in kaꞌa taga-pangandol buwattēꞌ. 6 Ya itu poꞌonna angkan ka paentomanku pasal kapandayan bay pamuwan kaꞌa eꞌ Tuhan, waktu kapatꞌnnaꞌku tanganku ma kaꞌa. Pajatuhun kapandayannu ilu 7 sabab nggaꞌi ka tāw ya pamahōp Tuhan ma pangatayantam, sagōꞌ kawasa, maka lasa ma pagkahi, maka pamaggat napsu.
8 Daꞌa ka aiyaꞌ magsabꞌnnal ni aꞌa pasal Panghūꞌtam si Isa Al-Masi. Daꞌa ka isab aiyaꞌ ma pasalku, pagka aku ma deyom kalabusu itu ma sabab pameyaꞌku ma Al-Masi. Sagōꞌ maglillaꞌ sadja ka ameyaꞌan aku anandalan kasigpitan ma sabab lapal ahāp pasal si Isa Al-Masi. Pinakosog du ka eꞌ Tuhan boꞌ kasandalannu. 9 Lappasan na kitam eꞌna min hukuman dusa, tapeneꞌ kitam boꞌ kitam tahinang aꞌa sukuꞌna. Nggaꞌi ka koꞌ itu tungbas ma sabab aniyaꞌ bay hinangtam ahāp, sagōꞌ ma sabab aniyaꞌ lasana maka aseꞌna tudju ni kitam. Ya asal mohotna ma halam giꞌ tapapanjari dunya, in kitam manusiyaꞌ asal kalasahanna maka kaꞌaseꞌanna sabab min kahinangan si Isa Al-Masi. 10 Aꞌawam kitam tagnaꞌ sagōꞌ pinabukis na ma buwattinaꞌan, sabab makapiꞌitu na ni dunya si Isa Al-Masi, ya Manglalappas. Tagaꞌos eꞌna kosog kamatay ati kaniyaꞌan kitam kallum kakkal ni kasaumulan luwas min lapal ahāp.
11 Kawakilan aku eꞌ Tuhan, sinōꞌ magnasihat maka magpanduꞌ lapal ahāp. 12 Ya na itu sababna angkan aku katiksaꞌan ma deyom kalabusu itu, sagōꞌ mbal aku aiyaꞌ sabab kataꞌuwanku du bang sai ya pangandolanku. Maka tatantuku isab in iya makakoleꞌ anganjagahan kamemon bay pangandolna ma aku, sampay taꞌabut llaw pabalikna ni dunya.
13 Isbatun toꞌongan saga panduꞌ bꞌnnal bay pamanduꞌku ma kaꞌa. Panunurin pahāp. Pahogotun pangandolnu ma si Isa Al-Masi maka kalasahin isab pagkahinu, pagka si Isa Al-Masi ya parakayuꞌantam saliꞌ-saliꞌ. 14 Tauꞌun panduꞌ ahāp ya bay pangandol Tuhan ma kaꞌa, pagka ka tinabang eꞌ Rū Sussi, ya patꞌnnaꞌ ma deyom ataytam.
15 Kataꞌuwannu, Timuti, bay aku siniya-siya eꞌ saga bebeyaꞌan si Isa ma lahat Asiya itu, sampay eꞌ si Pigilus maka si Hermogen. 16 Saguwāꞌ mura-murahan bang paꞌin disi Onesepor magtaiꞌanak kinaꞌaseꞌan eꞌ Tuhan, sabab araran iya bay amalasig pangatayanku. Halam iya bay aiyaꞌ anibaw aku minsan aku ma deyom kalabusu. 17 Sagōꞌ pagtꞌkkana piꞌitu ni daꞌira Rōm, magtūy pinuspusan eꞌna kosogna amiha aku sampay aku tabākna na. 18 Mura-murahan, bang paꞌin iya kinaꞌaseꞌan eꞌ Tuhan ma llaw kabalik si Isa Al-Masi piꞌitu angahukum manusiyaꞌ. Kataꞌuwannu du bang buwattingga bay katabang si Onesepor itu ma aku, waktu kamahēꞌku giꞌ ma daꞌira Epesos eꞌ.