3
Pasal Dꞌllaꞌ
1 Saga dauranakanku, subay mbal aheka min kaꞌam angangut nihinang guru. Sabab kataꞌuwanbi in kami saga guru, bang asāꞌ pamanduꞌ kami, labi abuhat in hukuman ya pinatꞌnnaꞌan kami eꞌ Tuhan min saga aꞌa nggaꞌi ka guru. 2 In kitam manusiyaꞌ, araran magkasāꞌ. Bang aniyaꞌ aꞌa mbal toꞌongan asāꞌ ma bissalana, tubus na aꞌa inān ma kaul maka piꞌil, maka kapagagihanna kabayaꞌan baranna. 3 Ya dalilna kakkang kuraꞌ. Sangonanta kakkang itu ni bowaꞌ kuraꞌ boꞌ ameyaꞌ ma panohoꞌanta, ati kapagbayaꞌanta piꞌingga-piꞌingga. 4 Dalilna isab bansān ma kappal lehaꞌan. Minsan aheya baran kappal, maka minsan akosog baliyu, maka minsan arikiꞌ isab bansān, in kappal inān tabowa patudju piꞌingga-piꞌingga ya kinabayaꞌan eꞌ aꞌa amansān. 5 Buwattēꞌ isab hatulan dꞌllaꞌta itu. Minsan bꞌnnal arikiꞌ, tantu aheya hinangna.
Pikilunbi api. Minsan hal keyat arikiꞌ, tantu makaralletan gulangan aluha. 6 Na, api itu pangandalilan dꞌllaꞌta, sabab dꞌllaꞌta ya makatagnaꞌan ginisan kalaꞌatan. Dakayuꞌ du dꞌllaꞌ ma baranta, sagōꞌ bang itu palagtik na, tabowa katibuꞌukan baranta ni kalaꞌatan. Tꞌggolta allum, in dꞌllaꞌta itu amuwanan kita kasusahan. Ya dalilna api luwas bay min nalkaꞌ. 7 Binangsa kaginisan, sattuwa talun maka manuk-manuk, daing isab maka sowa, takoleꞌ pinagbayaꞌan eꞌ manusiyaꞌ. 8 Saguwāꞌ dꞌllaꞌ itu, halam aniyaꞌ makapagbayaꞌan iya. Halam aniyaꞌ hondongan laꞌatna, apꞌnnoꞌ asal eꞌ lassun makapatay.
9 Dꞌllaꞌta ya ginuna pamudjita Panghūꞌta Tuhan, ya Mmaꞌtam. Maka dꞌllaꞌta isab ya ginuna panuknaꞌta pagkahita manusiyaꞌ, ya bay pinapanjari eꞌ Tuhan ma buwat kajarihanna. 10 Hatina dakayuꞌ du bowaꞌ ya paluwasan bissala pamudji maka bissala panuknaꞌ. Saga dauranakanku, subay kita daꞌa buwattēꞌ. 11 Aniyaꞌ bahāꞌ boheꞌ ahāp maka boheꞌ atꞌbbag magbeyaꞌ paluwas min dakayuꞌ tuburan? 12 Tantu halam. Saga dauranakanku, aniyaꞌ bahāꞌ kayu igira amuwan buwaꞌ jaitun? Aniyaꞌ bahāꞌ bahan anggul amuwan buwaꞌ igira? Tantu halam. Damikiyanna, mbal ka makasauk boheꞌ ahāp min pagboheꞌan atꞌbbag.
Pasal Pangitaꞌu min Tuhan
13 Bang aniyaꞌ mailu ma kaꞌam aꞌa alalom pangitaꞌuna maka ahāp panghatina, subay manyatakan ma kahāp tebong aꞌa ilu in iya taga-pangitaꞌu. Subay areyoꞌ pangatayanna maka subay alalom pikilanna boꞌ maghinang ahāp. 14 Sagōꞌ kaꞌam ilu, bang alaꞌat deyom honaꞌ-honaꞌbi boꞌ kam angandaliꞌit ma seheꞌbi, maka bang hal kahāpan baranbi ya kannalbi, daꞌa kam magbantug-bantug di-bi in kaꞌam taga-kataꞌu. Daꞌa paliluhinbi dusabi. 15 Min dunya sadja saga honaꞌ-honaꞌ buwattēꞌ, min pikilan manusiyaꞌ maka min saitan. Nggaꞌi ka buwattēꞌ bang pangitaꞌu min Tuhan. 16 Sabab maingga-maingga lahat, bang aniyaꞌ saga aꞌana angandaliꞌit maka hal angannal ma kahāpan baran sigām, tantu aniyaꞌ mainaꞌan kasasawan maka ginisan laꞌat kamemon.
17 Sagōꞌ bang aꞌa taga-pangitaꞌu min Tuhan buwattitu kahālanna: kaissana, halam aniyaꞌ tamak atayna. Karuwana, aluhay iya binowa magsulut bang aniyaꞌ pagsaggaꞌan. Ahāp bowahanna ni aꞌa kamemon, maka ahanunus iya. Maꞌaseꞌ iya, maka biyaksa iya maghinang ahāp ma pagkahina. Magtaluwaꞌ hinangna maka lling bowaꞌna, maka mbal iya amapagbiddaꞌ aꞌa minsan sai. 18 Sasuku aꞌa amapagkahāp seheꞌna, saliꞌ dalil aꞌa magtanom. Kabontolan atay ya taꞌāꞌna min tinanomna, pagka patisulutun iya maka mbal pangalulugat.