2
Sinōꞌ Kita Daꞌa Amapagbiddaꞌ Aꞌa
1 Saga dauranakanku, pagka kam ameyaꞌ ma si Isa Al-Masi, ya Panghūꞌtam bangsahan, subay mbal papagbiddaꞌbi aꞌa minsan sai-na. 2 Saupama aniyaꞌ duwangan aꞌa pasōd ni deyom pagtimukanbi, dakayuꞌ inān dayahan magsingsing bulawan maka magsꞌmmek ahalgaꞌ, boꞌ dakayuꞌ inān miskin, ndang asal sꞌmmekna. 3 Saupama palabi pagaddatbi ma aꞌa ahalgaꞌ sꞌmmekna, ati yukbi ma iya, “Tuwan, aningkōꞌ ka konoꞌ ma tingkōꞌan ahāp itu.” Sagōꞌ yukbi ni aꞌa miskin eꞌ, “Anꞌngge sadja ka mailu,” atawa “Aningkōꞌ ka maitu ma lantay, ma atag tapeꞌku”. 4 Na, bang buwattēꞌ hinangbi, asāꞌ kam pagka papagbiddaꞌbi saga pagkahibi bebeyaꞌan si Isa. Alaꞌat deyom pikilanbi, pagka yukbi alanga dakayuꞌ, boꞌ areyoꞌ dakayuꞌ.
5 Pakale kam, saga dauranakanku kinalasahan. Tapeneꞌ asal eꞌ Tuhan saga aꞌa ya binista miskin ma dunya itu, boꞌ aniyaꞌ karaya sigām bꞌnnal, hatina pangandol sigām ma iya. Pineneꞌ isab sigām boꞌ binuwanan palsukuꞌan ma deyom pagparintahanna, buwat asal panganjanjiꞌna ma sasuku alasahan iya. 6 Sagōꞌ ilu pagtunggīnganbi saga aꞌa miskin! Sai bahāꞌ anigpitan kaꞌam, maka sai anukbalan kaꞌam ni pagsaraꞌan? Aꞌa dayahan koꞌ heꞌ. 7 Sai bahāꞌ amissalahan laꞌat ma pasal ōn bangsahan ya pangōn tag-sukuꞌ ma kaꞌam? Aꞌa dayahan!
8 Ahāp hinangbi bang beyaꞌbi toꞌongan saraꞌ Tuhan, saraꞌ umbul dakayuꞌ. Tasulat asal saraꞌ itu ma deyom Kitab, ya yuk-i, “Kalasahinbi pagkahibi buwat eꞌbi alasahan baranbi.” 9 Sagōꞌ bang papagbiddaꞌbi aꞌa ma sabab luwana, makarusa kam, maka taluwaꞌ kam hukuman sabab langgal saraꞌ kam. 10 Saraꞌ Tuhan itu, minsan bogboganbi kahekaꞌanna boꞌ paꞌin lakaranbi hal dakayuꞌ, talanggalbi du kamemonna. 11 Sabab yuk Tuhan ma deyom saraꞌna, “Daꞌa ka angaliyu-lakad ni nggaꞌi ka pagholaꞌnu,” maka yukna isab, “Daꞌa ka amapatay”. Manjari minsan kam mbal angaliyu-lakad, boꞌ amapatay kam, masi du talanggalbi saraꞌ Tuhan.
12 Subay kitam ahantap ma kaul maka piꞌil sabab sinaraꞌ kitam ma saraꞌ ya makabuwan kalimayahan. 13 Sabab bang Tuhan ya angahukum ma manusiyaꞌ, boꞌ aniyaꞌ aꞌa halam bay maꞌaseꞌ ma pagkahina, mbal du isab kinaꞌaseꞌan eꞌ Tuhan. Saguwāꞌ bang aꞌa maꞌaseꞌ ma pagkahina, mbal iya tināw sinaraꞌ sabab maꞌaseꞌ du Tuhan ma iya.
Pasal Pangandol maka Paghinang
14 Saga dauranakanku, bang aniyaꞌ aꞌa gantaꞌ ahꞌlling in iya angandol ma Tuhan, boꞌ mbal taluwaꞌ saga hinangna, pangandolna inān halam aniyaꞌ pūsna, maka halam aniyaꞌ dapat makalappas iya min hukuman dusa. 15 Saupama aniyaꞌ pagkahibi bebeyaꞌan si Isa kulang-kabus ma panꞌmmek maka ma pagkakan, 16 ai kapūsanna bang hal yukbi ni sigām, “Mura-murahan, bang paꞌin ahāp kahālanbi. Magsꞌmmek kam akapal boꞌ kam mbal nihaggut! Amangan kam pahāp!” Bang kam hal amissala sadja boꞌ mbal amuwan ai-ai panabangbi kulang-kabus sigām, na, tantu halam aniyaꞌ pūsna. 17 Damikiyanna bang takdil ni pangandol. Bang yukbi in kaꞌam angandol ma Tuhan, boꞌ halam aniyaꞌ hinangbi ahāp tumabeyaꞌ, mbal bꞌnnal pangandolbi.
18 Kalu aniyaꞌ anganjawab, yuk-i, “Aniyaꞌ angandol ma Tuhan, aniyaꞌ maghinang kahāpan.” Na, bang buwattēꞌ panganjawabna, buwattitu panambungku, “Paꞌndaꞌin aku pangandolnu ma halam aniyaꞌ hinang tumabeyaꞌ tandaꞌ saksiꞌ, ati paꞌndaꞌanta ka pangandolku luwas min kahinanganku ahāp.” 19 Amꞌnnal ka bahāꞌ in Tuhan dakayuꞌ du? Na, ahāp isab. Sagōꞌ minsan saga saitan, amꞌnnal isab sigām in Tuhan dakayuꞌ du, ati amidpid sigām sabab min tāw sigām.
20 Dupang pahāp ka! Bilahi ka bahāꞌ kabꞌnnalan pasal pangandolta halam aniyaꞌ pūsna bang mbal pinabeyaꞌan kahinangan ahāp? 21 Pikilun si Ibrahim ya kaꞌmboꞌ-mboꞌantam. Angkan iya bay binista abontol eꞌ Tuhan ma sabab tahinang eꞌna panohoꞌan Tuhan. Bay tukbalanna ni Tuhan anakna si Isaꞌak, pinatꞌnnaꞌ eꞌna ma diyataꞌ batu pagkulban. 22 Mbal bahāꞌ tahatinu? Ya pangandol si Ibrahim inān bay magbeyaꞌ maka hinangna. Min hinangna angkan jukup pangandolna ma Tuhan. 23 Jari tahatita na in bay tasulat ma deyom Kitab pasal si Ibrahim, ya yuk-i, “Si Ibrahim bay amꞌnnal ma Tuhan, ati binista iya abontol eꞌ Tuhan sabab min kapamꞌnnalna.” Angkan iya bay kaōnan bagay Tuhan. 24 Na, minnēꞌ kataꞌuwannu in kitam itu binista abontol eꞌ Tuhan bang aniyaꞌ isab hinangta ahāp. Mbal jukup bang kita hal angandol. In pangandolta subay magbeyaꞌ maka hinangta.
25 Buwattēꞌ isab si Rahab, dꞌnda pagtatambahan ma masa awal eꞌ. Sagōꞌ binista iya abontol eꞌ Tuhan ma sabab hinangna ahāp. Bay patuntulna saga mata-mata bangsa Israꞌil bay pinaꞌan anganyataꞌ lahatna. Pinanduꞌan sigā eꞌna lān saddī pamoleꞌan sigā. 26 Manjari in pangandolta ma Tuhan sapantun baran, amatay bang halam aniyaꞌ napasna. Damikiyanna pangandolta ma Tuhan, amatay isāb bang halam aniyaꞌ kahinangan ahāp tumabeyaꞌ.