YAKUB
1
Sulat min si
YAKUB
1 Sulat itu min aku si Yakub, aꞌa sosohoꞌan Tuhan maka si Isa Al-Masi Panghūꞌtam. Magaddat aku ma kaꞌam saga pagkahiku Yahudi, aꞌa sukuꞌ Tuhan apulak-palik ma kaluhaꞌan dunya.
Pasal Kasukkalan maka Pagiman
2 Saga dauranakanku, bang kam taluwaꞌ kasukkalan indaginis, subay kam kinōgan. 3 Sabab kataꞌuwanbi, bang pangandolbi pinalabayan kasukkalan boꞌ kaimananbi, gom paꞌin pasōng tatasbi anandalan ai-ai. 4 Puspusinbi kosogbi anandalan kasukkalan boꞌ supaya kam asangpot ma kaul maka piꞌil, ma halam aniyaꞌ kulangbi. 5 Sagōꞌ bang aniyaꞌ ma kaꞌam akulang pangitaꞌuna, subay iya angamuꞌ-ngamuꞌ ni Tuhan ati tantu iya kabuwanan pangitaꞌu, sabab magmura asal Tuhan ma aꞌa kamemon. Mbal iya anꞌndal bang pangamuꞌan. 6 Saguwāꞌ bang kam gantaꞌ angamuꞌ ai-ai ni Tuhan, subay kam amꞌnnal ma iya ma halam aniyaꞌ pagduwa-duwabi. Sasuku magāng-āng pangandolbi ni Tuhan, ibarat kam sahal goyak tabowa pehēꞌ-piꞌitu eꞌ baliyu. 7 Daꞌa kam aholat pinasambutan ai-ai eꞌ Panghūꞌ, 8 sabab bang aꞌa magduwa-ruwa pikilanna mbal ahantap pamikilna.
Pasal Miskin maka Dayahan
9 Bang saupama aniyaꞌ pagkahitam sōd si Isa kamiskinan, subay iya kinōgan sabab pinalanga du iya eꞌ Tuhan. 10 Damikiyanna bang aniyaꞌ aꞌa sōd si Isa taga-karaya, subay iya kinōgan bang pinareyoꞌ eꞌ Tuhan, sabab minsan aꞌa dayahan pahalam du isab ibarat sumping kasagmotan. 11 Makasilak paꞌin llaw, magtūy alanos kasagmotan eꞌ pasuꞌ llaw heꞌ. Apakpak sumpingna ati pahalam bay manisna. Buwattēꞌ du isab bang aꞌa dayahan. Kosog-kosogan paꞌin iya angusaha, amatay du iya ati kaꞌbbahan du pagusahana.
Pasal Sasat
12 Aheya du kahāpan aꞌa bang mbal alungay pangandolna minsan iya anandalan kasukkalan. Sababna bang mbal apinda pangandolna minsan ma deyom kasukkalan, pinaniyaꞌan du iya kallum kakkal ni kasaumulan. Ya na itu tungbas panganjanjiꞌ Tuhan ma sasuku alasa ma iya.
13 Bang kam gantaꞌ sinasat maghinang laꞌat, daꞌa bīnginbi Tuhan. Daꞌa yukbi Tuhan ya anasat kaꞌam inān, sabab in Tuhan mbal tasasat maka mbal isab iya anasat. 14 Sagōꞌ napsu manusiyaꞌ ya amowa-mowa iya maghinang kalaꞌatan. Napsuna saliꞌ dalil umpan angati iya maghinang dusa. 15 Ma tagnaꞌanna, aniyaꞌ kinanapsuhan eꞌ aꞌa, ma deyom pikilanna sadja. Mbal atꞌggol magbuwaꞌ du napsu inān, jari dusa ya buwaꞌna. Bang karuhunan dusa inān, nalkaꞌ ya kamattihanna.
16 Angkanna, saga danakan kalasahanku, daꞌa palinguhunbi pikilanbi. 17 Saga lidjikiꞌ kamemon maka ai-ai halam aniyaꞌ sallaꞌna ya pamuwan kitam, patulun asal min sulgaꞌ, min Tuhan magpapanjari saga sawa ya anahaya ma bꞌttong langit. Magkapinda sawa inān sagōꞌ mbal magkapinda Tuhan maka mbal amuwan landung. 18 Min kabayaꞌanna angkan kitam nihinang anakna pagka kahagadtam lapal palmanna. Ya kabayaꞌanna in kitam saga anakna subay pinabangsa labi giꞌ min bangsa ai-ai bay papanjarina.
Pasal Pagkale maka Paghinang
19 Amay-amay, saga dauranakan kalasahanku, subay kitam pakale pahāp maka subay mbal magdaiꞌ-daiꞌ amissala. Subay kitam mbal alꞌkkas angastol, 20 sabab bang aꞌa angastol mbal tahinangna saga hinang ahāp ya kinabayaꞌan eꞌ Tuhan. 21 Angkan subay laꞌananbi kamemon ya makalumuꞌ ataybi, maka subay bbahanbi saga hinang alaꞌat ya mamarahi hekana ilu. Pareyoꞌunbi ataybi tudju ni Tuhan, maka taimaꞌunbi lapal palmanna, ya saliꞌ dalil binhiꞌ tinanom eꞌna ma deyom pangatayanbi. Sabab palman Tuhan ya sababanna angkan kam lappasan min hukuman dusa.
22 Daꞌa kam hal akale ma palman Tuhan. Ikutunbi panohoꞌanna. Bang kalebi boꞌ mbal hinangbi, angakkalan kam di-bi. 23 Bang aꞌa gantaꞌ hal akale ma palman Tuhan, boꞌ mbal ameyaꞌ ma panohoꞌanna, in aꞌa inān ibarat aꞌa ananding pangluwahanna ma samin. 24 Aubus paꞌin eꞌna ananding, alaꞌan iya min atag inaꞌan ati takalipatna magtūy bang buwattingga pangluwahanna. 25 Samin itu ibarat saraꞌ Tuhan ya halam aniyaꞌ sallaꞌna, saraꞌ makapaluhaya ma manusiyaꞌ. Maka aꞌa angꞌndaꞌ ma samin itu ibarat aꞌa angadjiꞌ na paꞌin ma saraꞌ inān. Mbal takalipatna sagōꞌ bineyaꞌ eꞌna bay taꞌadjiꞌna, jari tantu iya kabuwanan kahāpan eꞌ Tuhan minsan ai hinangna.
26 Bang aniyaꞌ aꞌa amikilan di-na in iya bal-agama, boꞌ mbal tapaggatna dꞌllaꞌna amissala alaꞌat, aꞌa inān angakkalan di-na. Halam aniyaꞌ kapūsan pagagamana. 27 Bang ma Mmaꞌtam Tuhan, ya na itu pagagama halam aniyaꞌ lamudna alaꞌat: kaissana, subay tabangta saga anak-iluꞌ maka saga balu dꞌnda bang sigām ma deyom kasigpitan. Karuwana, subay kita angahalliꞌan di-ta boꞌ kita mbal tabowa anunuran saga addat alaꞌat maitu ma dunya.