1 PETROS
1
Sulat Kaissana min si
PETROS
1 Sulat itu min aku, si Petros, aꞌa kawakilan eꞌ si Isa Al-Masi magnasihat lapalna. Pasampayku sulat itu piꞌilu ni kaꞌam saga aꞌa bay tapeneꞌna, ya maglihan-lihan ma dunya itu. Ilu kam apulak-palik ma kalahat-lahatan buwattinaꞌan, ma sakalibut lahat Puntus, Galatiya, Kappadoke, Asiya, maka ma lahat Bitiniya. 2 Bay kam tapeneꞌ eꞌ Mmaꞌtam Tuhan min maksudna, jari sukuꞌna na kam ma sabab hinang Rū Tuhan ya ma deyom ataybi. Tapeneꞌ kam supaya kam ameyaꞌ ma si Isa Al-Masi, boꞌ pinuwasan dusabi ma sabab lahaꞌna.
Mura-murahan, bang paꞌin kam pinaniyaꞌan tatabangan maka kasannangan atay ma halam aniyaꞌ kulangna.
Kaholatantam Kallum Kakkal
3 Mahaldikaꞌ ni Tuhan, ya mmaꞌ Panghūꞌtam si Isa Al-Masi. Aheya toꞌongan kaꞌaseꞌna ma kitam, ya angkan kitam binuwanan kallum bahaꞌu buwat sapantun aꞌa nianakan pabīng. Makaholat isab kitam pinakallum min kamatay, sabab ya du si Isa Al-Masi bay pinakallum isab min kamatayna. 4 Jari angagad na kitam pinaniyaꞌan pusakaꞌ ya tinauꞌ eꞌ Tuhan ma saga aꞌa sukuꞌna. Tinauꞌ eꞌna ma deyom sulgaꞌ, ati mainaꞌan mbal magkaꞌat, mbal magkahaluꞌ, mbal magkapinda. 5 Nihampanan kam pahāp sabab min kawasa Tuhan, pagka kam angandol ma iya. Tantu kam nihampanan sampay taꞌabutbi kasalamatan ya pinabukis ma llaw kahinapusan.
6 Angkan kam kinōgan minsan ma deyom susa ma dunya pinjaman itu, ma sabab katiksaꞌan indaginis ya kalabayanbi. 7 Pinaniyaꞌan kam katiksaꞌan ilu boꞌ sinulayan pangandolbi bang bꞌnnal atawa nggaꞌi ka. Minsan bulawan, subay pinalabay min api boꞌ nilaꞌanan lꞌmmiꞌna. Sagōꞌ ahalgaꞌ lagiꞌ pangandolbi min bulawan, sabab mbal anatas bulawan ni kasaumulan. Bang kam angandol sabꞌnnal-bꞌnnal, sinanglitan du kam maka minahaldikaꞌan bang taꞌabut llaw pamatuwaꞌ si Isa Al-Masi. 8 Alasa kam ma iya minsan halam taꞌndaꞌbi. Maka minsan iya mbal taꞌndaꞌbi ma buwattitu, angandol kam asal ma iya. Jari aheya sidda kakōganbi, mbal tasibahat, 9 sabab kaniyaꞌan kam kasalamatan kakkal, ya kamaksuran pangandolbi.
10 Bay amikilan pahāp saga kanabihan ma masa awal eꞌ, bay angahangpat toꞌongan pasal kasalamatan itu. Bay pinagbissala eꞌ sigām kahāpan ya pinama-kaꞌam ma ahil jaman itu. 11 Pinatulunan sigām Rū Al-Masi, angkan sigām bay angabtang pasal kabinasahan ya subay kalabayanna, maka ma pasal sanglit-sahaya ma iya puwas kabinasahan eꞌ. Jari sidda bilahi saga nabi inān makataꞌu bang sumiyan katꞌkkana maka bang buwattingga kalꞌngngananna. 12 Pinataꞌu sigām eꞌ Tuhan in pakaradjaꞌan bay pagbissala sigām inān nggaꞌi ka ma baran sigām, sagōꞌ ma saga aꞌa ma tahun sinōng, hatina ma kaꞌam. Manjari kaꞌam na ya pinakale na eꞌ saga aꞌa bay magnasihat lapal ahāp min kawasa Rū Tuhan ya pinatulunan sigām min sulgaꞌ. Minsan saga malaꞌikat, bilahi toꞌongan makahati ma pasal saga pakaradjaꞌan itu.
Sinōꞌ Kita Amanuyuꞌ ma Kaꞌadilan
13 Angkan kam sohoꞌku subay pahatul-hatul ma deyom pamikilbi. Pahalliꞌ kam, maka holatunbi kahāpan ya pamuwan kaꞌam bang taꞌabut na llaw pamatuwaꞌ si Isa Al-Masi. 14 Beyaꞌunbi panohoꞌan Tuhan, sengorinbi ondeꞌ-ondeꞌ ahatul. Daꞌa parūlunbi kanapsuhan ya bay kabiyaksahanbi waktu tagnaꞌ, ma halam giꞌ aniyaꞌ kataꞌubi. 15 Subay kam aꞌadil ma ai-ai hinangbi sabab aꞌadil asal Tuhan, ya bay anohoꞌ kaꞌam ameyaꞌ ma iya. 16 Sabab tasulat ma deyom Kitab bay bissala Tuhan, ya yuk-i, “Wajib kam sussi ma kaulbi maka piꞌilbi, sabab aku itu mahasussi asal.”
17 Angahukum Tuhan ma manusiyaꞌ kamemon, tinongoran kahinangan sigām pakaniya-pakaniya ma halam aniyaꞌ papagbiddaꞌna. Angkanna, pagga pangōnbi ‘Mmaꞌ’ ma Tuhan bang aniyaꞌ pangamuꞌ-ngamuꞌbi, subay kam magmatāw ma iya tꞌggolbi patꞌnnaꞌ ma dunya itu. 18 Kataꞌuwanbi du bang ai bay pamuwan eꞌ Tuhan pangalꞌkkat kaꞌam min bay kajarihanbi halam taga-pūs inān, ya kajarihan bay pangꞌbba kaꞌam eꞌ kamattoꞌahanbi. Nggaꞌi ka altaꞌ magkakaꞌat buwat bulawan atawa pilak ya bay pangalꞌkkat kaꞌam, 19 sagōꞌ lahaꞌ Al-Masi ahalgaꞌ, ya bay pabuꞌus ma kamatayna. Ibarat iya bili-bili halam aniyaꞌ tamakna atawa sallaꞌna, pagkulban pamapuwas dusatam. 20 Ya na itu asal pangahandak Tuhan ma iya ma halam giꞌ aniyaꞌ dunya, jari makapiꞌitu na iya ma masa damuli itu, ma sababbi du. 21 Min hinang si Isa Al-Masi angkan kam angandol na ma Tuhan, ya bay amakallum si Isa min kamatayna sampay amabangsa iya ma deyom kasahayaꞌan. Jari ahogot na pangandolbi maka pangasabi ma Tuhan.
22 Na buwattinaꞌan, pagka kam angisbat na ma panduꞌ kasabꞌnnalan, tabowa na kam angꞌbba min kasabulan kamemon boꞌ aniyaꞌ kasi-lasabi bꞌnnal ma pagkahibi bebeyaꞌan si Isa. Angkan kam sohoꞌku: maglasa-liyasahi kam min deyom ataybi. 23 Sabab kaꞌam ilu saliꞌ sapantun ondeꞌ bahaꞌu bay nianakan. In kapaganak ma kaꞌam itu nggaꞌi ka min manusiyaꞌ ya magkamatay, sagōꞌ min palman Tuhan. Aꞌa bahaꞌu na kam sabab min kapagsabꞌnnalbi ma palman Panghūꞌ, ya makakallum ma manusiyaꞌ maka mbal magkapinda. 24 Yuk ayat Kitab,
“Pinjaman sadja saga manusiyaꞌ kamemon, sapantun parang.
Kamemon kabantugan sigām sapantun sumping-sumping.
Angalanos du parang, magkapakpak du isab kasumpingan,
25 saguwāꞌ anatas palman Panghūꞌ salama-lama.”
In palman Panghūꞌ itu, ya na lapal ahāp bay panganasihat kaꞌam.