2
Al-Masi Dalil Batu Landuꞌ Ahalgaꞌ
1 Angkan kam subay angꞌbbahan kamemon kahinanganbi ajahil. Daꞌa kam magputing. Daꞌa kam magbauꞌ-bauꞌ in kaꞌam ahāp boꞌ paꞌin masi alaꞌat deyom ataybi. Daꞌa kam angalindi, maka daꞌa kam angalimut seheꞌbi. 2 Pasaliꞌ kam ni ondeꞌ-ondeꞌ bahaꞌu nianakan, ya aruruꞌ na paꞌin. Ya du kaꞌam subay angabut-ngabut angadjiꞌ palman Tuhan. Saliꞌ dalil gatas ahāp koꞌ inān, ya makapasangpot pangandolbi sampay taꞌabutbi kasalamatanna, 3 pagka tananambi na bang buwattingga kahāp Panghūꞌ ma kaꞌam.
4-5 Pasekot na kam ni si Isa, ya dalil batu allum ni kasaumulan. Pasekot kam boꞌ kam pinagguna eꞌ Tuhan pangahinanganna lumaꞌ patꞌnnaꞌan Rū-na. Pinaralil isab kam ni batu allum, maka si Isa iya batu aheya pamahogotan lumaꞌ Tuhan. Bay tasulak si Isa Al-Masi eꞌ saga aꞌa, sagōꞌ pineneꞌ iya eꞌ Tuhan sabab landuꞌ ahalgaꞌ ma atayna. Jari mainaꞌan du kam ma lumaꞌ Tuhan maghinang ni iya min itikad abontol, buwat dalil imam. Mainaꞌan kam anukbal ni iya saga kapudjihanbi maka kahinanganbi ahāp. Jari kaꞌamuhan iya ma panukbalbi sabab si Isa Al-Masi ya pamanyabutanbi. 6 Buwattitu ya tasulat ma deyom Kitab:
“Aniyaꞌ batu landuꞌ ahalgaꞌ tapeneꞌku,
patꞌnnaꞌku nihinang papagan lumaꞌ ma daꞌira Siyun.
Jari sasuku angandol ma iya
halam du aniyaꞌ kapagsusunanna.”
7 Tantu ahalgaꞌ batu itu ma kaꞌam ya magpangandol ma si Isa. Saguwāꞌ aniyaꞌ mbal bilahi magkahagad, ya sinambat ma ayat Kitab dakayuꞌ, ya yuk-i,
“Ya batu bay tasulak eꞌ saga aꞌa maghinang lumaꞌ,
kinabāꞌ halam aniyaꞌ gunana,
ya na inaꞌan batu aheya toꞌongan kalagihanna.”
8 Maka aniyaꞌ giꞌ ayat dakayuꞌ, yuk-i,
“Ya inaꞌan batu parugtulan tapeꞌ aꞌa,
batu pamahꞌbbaꞌan.”
Bꞌnnal koꞌ heꞌ. Mbal sigām magkahagad ma palman Tuhan pasal si Isa, ya poꞌon sigām saliꞌ dalil aꞌa makarugtul ni batu. Ya na tuꞌud pangahandak Tuhan ma sigām.
9 Malaingkan tapeneꞌ kam eꞌ Tuhan boꞌ kam tahinang kaimaman magsusultan, bangsa sussi, aꞌa palsukuꞌan Tuhan. Nilinganan kam eꞌna paluwas min kalendoman, boꞌ papinda ni kasawahanna makainu-inu. Tapeneꞌ kam boꞌ supaya patanyagbi pasal kahinangan Tuhan ahāp makalanduꞌ. 10 Ma waktu bay dahū inān nggaꞌi ka kam sukuꞌ Tuhan, sagōꞌ aꞌa Tuhan na kam ma buwattitu. Bay kam aꞌawam ma pasal kaꞌaseꞌ Tuhan ma waktu palabay, saguwāꞌ tananambi na kaꞌaseꞌna.
11 Saga bagay kalasahanku, saliꞌ kitam aꞌa liyu ma dunya itu sabab aniyaꞌ lahattam saddī. Angkan buwattitu panganjunjungku ma kaꞌam: daꞌa toꞌongan dūlinbi napsu baranbi alaꞌat, sabab napsuta itu magsaggaꞌ asal maka kapameyaꞌta ma Tuhan. 12 Ya kalꞌngngananbi subay ahantap sadja minsan kam ma deyoman saga aꞌa mbal ataꞌuwan Tuhan. Minsan sigām bilahi anunaꞌan kaꞌam maghinang alaꞌat, taꞌndaꞌ eꞌ sigām saga hinangbi ahāp, ya poꞌon sigām ananglitan Tuhan ma llaw kapiꞌituna.
Pagmalulus ma Pagnakuraꞌan
13 Subay kam magpabeyaꞌ sadja ma saga aꞌa kamemon sasuku taga-kagꞌllal, ma sabab Panghūꞌ Isa ya pameyaꞌanbi. Kaissana, beyaꞌunbi panohoꞌan min sultan mahatinggi, ya alanga min kamemon ma lahat itu. 14 Pasunuꞌ, beyaꞌunbi panohoꞌan min saga gubnul, ya kabuwanan kapatut aminasa sasuku maghinang alaꞌat, maka ananglit ma sasuku maghinang ahāp. 15 Sabab ya na itu kabayaꞌan Tuhan ma kaꞌam, hinangunbi kahāpan. Jari pagꞌndaꞌ saga aꞌa kulang panghati inān ma kahinanganbi, magtūy patambol bowaꞌ sigām. Pahondong sigām amūng-mūng karupangan. 16 Limaya na kam, maka ahāp isab. Saguwāꞌ daꞌa kam anumagal in kaꞌam makajari maghinang alaꞌat ma sabab limaya na. Ata Tuhan na kam, angkan kam limaya maghinang panohoꞌanna sadja. 17 Pagaddatinbi manusiyaꞌ kamemon. Kalasahinbi pagkahibi magpangandol ma si Isa, pagmatāwinbi Tuhan, pagaddatinbi sultan mahatinggi.
Si Isa Al-Masi ya Panunuran
18 Kaꞌam saga sosohoꞌan maghinang ma aꞌa, angalillaꞌ sadja kam ma aꞌa ya paghinanganbi. Nggaꞌi ka hal aꞌa ahāp kasuddahanna, aꞌa alasa ma kaꞌam ya subay pagaddatanbi. Subay pagaddatinbi sigām minsan isab abꞌngngis. 19 Bang kam gantaꞌ bininasa ma halam aniyaꞌ sāꞌbi paminasahan kaꞌam, boꞌ paꞌin sandalanbi ma sabab Tuhan ya paheyabi ma atay, kasulutan Tuhan ma kaꞌam. 20 Sagōꞌ bang kam angimanan katiksaꞌan ya pinapagtongod maka hinangbi alaꞌat, mbal kam patut sinanglitan. Sagōꞌ bang kam anandal kabinasahan minsan bay makahinang ahāp, kasulutan du Tuhan ma kaꞌam. 21 Ya na heꞌ asal kabayaꞌan Tuhan ma kaꞌam, in kaꞌam subay asandal ma deyom kabinasahan. Al-Masi ya panunuranbi sabab bay na iya anandalan kabinasahan ma sababanbi. Pasaliꞌ kam ni iya.
22 Halam toꞌongan iya bay makarusa,
halam iya bay makapahꞌlling puting minsan min tꞌdda.
23 Ma waktu bay kapamūng-mūng alaꞌat ma iya, halam iya bay anambung alaꞌat. Waktu kapaminasa ma iya, halam iya bay ananggupan sai-sai. Gom paꞌin pangandolna baranna ni Tuhan ya abontol hukumanna. 24 Bay tinanggung eꞌ si Isa karusahantam pagka amatay ma hāg pangalansangan ma iya, supaya kitam angꞌbba min dusatam boꞌ amanuyuꞌ kahinangan abontol. Kauliꞌan kitam ma sabab saga bakat bay tananamna. 25 Bay kam saliꞌ sapantun bili-bili alungay min paglabayan, sagōꞌ ma buwattinaꞌan pabibud na kam boꞌ pabeyaꞌ ma Al-Masi, ya angupiksaꞌ kaꞌam sampay anganjagahan nyawabi.