3
Pamanduꞌ ma Aꞌa Maglakibini
1 Kaꞌam saga karꞌndahan, subay sulutbi kabayaꞌan hꞌllabi. Manjari bang aniyaꞌ sigām mbal giꞌ magsabꞌnnal ma lapal Tuhan, boꞌ pagꞌndaꞌ sigām kaul-piꞌilbi ahāp du, minnēꞌ aniyaꞌ pagsabꞌnnalan sigām. Minsan sigām mbal bissalahanbi, tabowa sigām asulut 2 pagꞌndaꞌ sigām ma kabontol itikadbi sampay ma panaꞌatbi ma Tuhan. 3 Mbal kam tahinang alingkat ma sabab pangari-ngaribi ma pangluwahanbi, buwat saga pamaꞌalti buꞌunbi, maka pamulawanbi maka panꞌmmekbi ahalgaꞌ. 4 Ya wajib tuyuꞌanbi boꞌ kam ahāp dꞌnda, subay addat ahāp. Bang kam ahongpot, bang areyoꞌ pangatayanbi, anatas du kamanisbi sampay ni katoꞌabi. Maka landuꞌ ahalgaꞌ kamanisbi buwattēꞌ ma pangꞌndaꞌ Tuhan. 5 Buwattēꞌ isab kahinangan saga dꞌnda sukuꞌ Tuhan ma masa awal. Bay sigām pasangdol ma iya, angkan sigām ahāp dꞌnda. Bay sinulut eꞌ sigām kabayaꞌan hꞌlla sigām 6 buwat si Sara, hꞌnda si Ibrahim. Sinulut eꞌna kabayaꞌan hꞌllana, niōnan eꞌna nakuraꞌna. Na, kaꞌam saga dꞌnda ma buwattitu, bang ahāp hinangbi, maka bang kam mbal aluhay pinakitāw, saliꞌ kam dī tubuꞌ si Sara.
7 Kaꞌam kalꞌllahan, subay ahāp akkalbi magpūn maka pagholaꞌbi. Pagaddatinbi sigām pahāp pagka alunuk baran sigām min baranbi, sabab saliꞌ-saliꞌ du kam pinahampitan kallum taptap ma deyom sulgaꞌ. Bang buwattēꞌ hinangbi halam aniyaꞌ makalimbit pangamuꞌ-ngamuꞌbi ni Tuhan.
Kabinasahan ma Sabab Hinang Ahāp
8 Ya na itu bissalaku katapusan ma kaꞌam, subay kam dauyunan kamemon, magkannal-kiyannali. Sunurinbi addat magdanakan maglasa-liyasahi, kaꞌaseꞌinbi pagkahibi ma areyoꞌ pangatayanbi. 9 Bang kam gantaꞌ nilaꞌat, daꞌa balosinbi laꞌat. Bang kam sinuknaꞌan, daꞌa pellenginbi suknaꞌ. Ya pamalosbi ma sigām subay kahāpan sabab ya na kabayaꞌan Tuhan ma kaꞌam, supaya kam pinusakaꞌan kahāpan. 10 Sabab tasulat ma deyom Kitab, ya yuk-i,
“Sai-sai bilahi ahāp palasahanna,
supaya tananamna waktu kasannangan,
subay pahondong maghimumungan alaꞌat,
subay mbal magbissala kaputingan.
11 Subay iya pataikut min hinang alaꞌat,
boꞌ maghinang ahāp.
Subay iya atuyuꞌ magsulut maka kaseheꞌanna,
maka subay pagmatayanna kasannangan.
12 Sabab anganjaga du Panghūꞌ ma saga aꞌa abontol,
kinale eꞌna pamanyabut sigām.
Sagōꞌ sinaggaꞌ eꞌna saga aꞌa jahallis.”
13 Halam aniyaꞌ angalaꞌat kaꞌam bang kam atuyuꞌ maghinang ahāp. 14 Maka minsan kam saupama pinuhingaꞌ ma sabab hinangbi ahāp, aheya du kakōganbi. Daꞌa kam atāw ma pananggup manusiyaꞌ, daꞌa isab kam magkahanggawan. 15 Sagōꞌ paheyaꞌunbi Al-Masi ma deyom pangatayanbi, in iya tantu Panghūꞌbi. Subay kam asakap sakahabaꞌ waktu supaya kam makasambungan sai-sai atilaw kaꞌam bang angay kam makatantu pinaniyaꞌan kahāpan. 16 Sagōꞌ subay ahanunut maka aꞌaddat panambungbi. Subay abontol isab itikadbi boꞌ magkaiyaꞌan saga aꞌa ya anoway kahinanganbi ahāp ma sabab pameyaꞌbi ma Al-Masi. 17 Bang Tuhan ya magkahandak, ahāp kam taluwaꞌ kabinasahan ma sabab ahāp hinangbi, bang paꞌin daꞌa hinang alaꞌat.
18 Sabab bay amatay Al-Masi pinamintꞌdda ma sabab kamemon paldusahan manusiyaꞌ. Nggaꞌi ka ma sabab dusa baranna, sabab halam aniyaꞌ dusana minsan dakayuꞌ. Tuꞌud iya amatay supaya kam binowa maghāp maka Tuhan. Bay iya pinapatay sagōꞌ pinakallum eꞌ Rū Tuhan. 19 Min Rū Tuhan isab angkan iya bay pehēꞌ magmahalayak ni saga umagad ya bay tinambolan eꞌ Tuhan ma deyom ahirat. 20 Ya na inaꞌan umagad saga aꞌa bay mbal ameyaꞌ ma kabayaꞌan Tuhan waktu kapangahinang adjung eꞌ si Nū. Bay angagad Tuhan ma samantalaꞌ si Nū angahinang adjung inān, ya aniyaꞌ ameyaꞌ ma iya. Saguwāꞌ pagtumbuk latap, waluꞌ du aꞌa bay pasakat ni adjung boꞌ lappasan min latap. 21 Ya kalappas sigām min latap inān saliꞌ paralilan kalappastam labay min boheꞌ pagpandi ma waktu itu. Bang nihati pagpandi itu, nggaꞌi ka hinang pamalaꞌan lumut baranta saguwāꞌ paltandaꞌan in kitam bay anganjanjiꞌ ni Tuhan min itikad abontol. Manjari lappasan kitam sabab min kallum si Isa pabalik min kamatayna. 22 Waꞌi na iya pehēꞌ ni sulgaꞌ aningkōꞌ ma bihing Tuhan tampal ni kowan. Mahēꞌ na iya magbayaꞌ ma bangsa malaꞌikat kamemon, maka ma ai-ai taga-kapatut atawa taga-gaꞌosan ma deyom sulgaꞌ.