4
Kaul-Piꞌil ya Makasulut Tuhan
1 Na, pagka Al-Masi bay makalabayan kabinasahan ma ginhawa-baranna, ya du kaꞌam subay anengoran iya boꞌ kam sakap anandal kabinasahan. Sabab sai-sai angananam kabinasahan buwattēꞌ, angꞌbba na min katagihanna magdusa. 2 Jari puwas itu, satꞌggolbi maitu ma dunya, subay kam pinagagihan eꞌ kabayaꞌan Tuhan. Daꞌa na kam pinagagihan eꞌ napsu maka bayaꞌ manusiyaꞌ, 3 ya pineneꞌ eꞌ saga aꞌa ya mbal ataꞌuwan Tuhan. Atꞌggol bay kapaghinangbi kasabulan makatamparasa, magbaꞌis maka maglangohan. Sakahabaꞌ waktu pagtipunbi maglami-lami, landuꞌ aheka bay inumbi. Bay kam pasumba isab ni taꞌu-taꞌu ya sammal ma pangꞌndaꞌ Tuhan. Sagōꞌ sarang na. 4 Ma buwattinaꞌan ainu-inu saga aꞌa bay seheꞌbi waktu tagnaꞌ bang angay kam mbal na palamugay ni sigām angandūlan napsubi. Angkanna kam binissalahan laꞌat eꞌ sigām. 5 Saguwāꞌ aniyaꞌ du waktu paharap saga aꞌa inān ni Tuhan angahaka pasal bay kahinangan sigām. Asakap asal Tuhan angahukum binangsa manusiyaꞌ, saga aꞌa masi allum sampay aꞌa bay magpatayan. 6 Ya itu sababanna angkan lapal ahāp itu bay pinagnasihat sampay ni umagad saga aꞌa magpatayan, boꞌ supaya sigām pinaniyaꞌan kallum ma haddarat Tuhan, minsan sigām bay pinalabayan hukuman ya panganggantaꞌan manusiyaꞌ pagma-dunya lagiꞌ.
7 Sōng na kiyamat dunya itu, angkan subay ahāp sadja kōkbi. Subay ahantap eꞌbi amikil boꞌ ahāp pangamuꞌ-ngamuꞌbi ni Tuhan. 8 Maka ya na itu subay pahalgaꞌbi min kamemon: maglasa-liyasahi kam toꞌongan, sabab bang kam maglasa sabꞌnnal-bꞌnnal tantu kam magampun-iyampuni minsan painay heka kasāꞌanbi. 9 Bang aniyaꞌ saga pagkahibi bebeyaꞌan si Isa gantaꞌ pahapit ni lumaꞌbi, daꞌa kam magmusmud. Paꞌiddahunbi sadja sigām min atay poteꞌ. 10 Aniyaꞌ ma kaꞌam kapandayan bay pamuwan eꞌ Tuhan pakaniya-kaniya. Jari paggunahunbi kapandayanbi ilu panabangbi ni kaseheꞌan, sabab patut du bang ahāp eꞌbi angangguna kataꞌu atawa kapandayan bay pangandol ma kaꞌam eꞌ Tuhan. 11 Sai-sai apanday magnasihat, subay lapal min Tuhan ya pagnasihatna. Sai-sai ataꞌu anabang ma seheꞌna, subay iya anabang toꞌongan min kosog bay pangahandak iya eꞌ Tuhan. Sabab minnēꞌ pinaheya ōn Tuhan ma ai-ai hinangbi, pagka si Isa Al-Masi ya pamanyabutanbi. Patut iya pinasukuꞌan kasahayaꞌan maka barakat sampay ni kasaumulan. Amin.
Kabinasahan ma Sabab Kapameyaꞌta ma Al-Masi
12 Saga bagay kalasahanku, daꞌa kam kinoblaꞌan ma sabab kabinasahan aheya ya tumꞌkka panulayan kaꞌam, sabab maumu aniyaꞌ buwattēꞌ. 13 Sagōꞌ palasigunbi ataybi, sabab tananambi na kabinasahan buwat bay kalabayan Al-Masi, jari aheya du kakōganbi bang pinaꞌndaꞌan na sanglit sahayana ni kamemon. 14 Subay kam kinōgan bang kam pinamūng-mūngan alaꞌat ma sabab Al-Masi ya pameyaꞌanbi, sabab ilu patꞌnnaꞌ ma kaꞌam Rū barakatan, ya na Rū Tuhan. 15 Bang kam taluwaꞌ kabinasahan, subay halam aniyaꞌ sababanna, buwat saga bay amapatay aꞌa, bay anangkaw, bay magpilliyu, atawa minsan bay palamud ma palkalaꞌ aꞌa nggaꞌi ka lamudbi. 16 Sagōꞌ bang kam pinananaman kabinasahan ma sabab Almasihin kam, daꞌa kam aiyaꞌ. Magsukul sadja kam ni Tuhan ma sabab ōn Al-Masi ya pangōn kaꞌam.
17 Song na waktu panagnaꞌ hukuman Tuhan, sagōꞌ kitam ma deyomanna ya nihukum dahū. Bang buwattēꞌ kahālanna, bang kitam sukuꞌna pinatꞌnnaꞌan hukuman, ai kamaujuran saga aꞌa mbal magkahagad ma lapal ahāp ya min Tuhan? 18 Buwat yukna ma deyom Kitab,
“Bang aꞌa adil mbal agon lappasan,
lubaꞌ-lagiꞌna na aꞌa baldusa, ya mbal angisbat Tuhan!”
19 Angkanna, sai-sai kam angalabayan kabinasahan sabab iya na kahandak Tuhan ma kaꞌam, pasangdan kam maghinang ahāp. Pangandolunbi isab baranbi ni bay amapanjari kaꞌam, sabab tantu iya kapangandolan.