5
Pagmattoꞌahan maka Ondeꞌ Bahaꞌu
1 Aniyaꞌ isab pamituwaku ma saga pagmattoꞌahan ya ma deyomanbi, sabab pagmattoꞌahan isab aku. Mataku itu bay makaꞌndaꞌ kabinasahan Al-Masi, maka aniyaꞌ du isab lamudku ma sinosōng bang iya pinabangsa na ma pangꞌndaꞌ saga manusiyaꞌ kamemon. Ya na itu amuꞌku ni kaꞌam: 2 Upiksaꞌunbi pahāp saga aꞌa bay pangandol ma kaꞌam eꞌ Tuhan, ya saliꞌ dalil bili-bili pinaipat ma kaꞌam. Ayarinbi sigām min kōg maka bayaꞌ, sabab ya na itu kabayaꞌan Tuhan. Daꞌa kam subay nihagda. Ya pangupiksaꞌbi ma sigām subay nggaꞌi ka pagpilak, subay min kahilasanbi sadja. 3 Daꞌa pagmandahinbi saga aꞌa bay pamaꞌatas kaꞌam, gom paꞌin kam panunuran sigām. 4 Jari bang piꞌitu pabalik si Isa Al-Masi, ya dalil nakuraꞌ magupiksaꞌ bili-bili, landuꞌ ahāp panungbasna ma kaꞌam. Ya tungbas inān mbal magkapinda kahāpna, sabab makahampit kam ma sahayana.
5 Na, kaꞌam isab saga lꞌlla abataꞌ lagiꞌ, beyaꞌunbi pamituwa pagmattoꞌahanbi ilu. Subay areyoꞌ pangatayanbi sabubi magtabang-tiyabangi, sabab yuk lling Kitab,
“Angatu Tuhan ma aꞌa alanga atayna,
sagōꞌ tabangna sasuku areyoꞌ atayna.”
6 Angkan kam subay magpatireyoꞌ ni Tuhan Sangat Kawasa, boꞌ kam pinalanga eꞌna bang taꞌabut llaw bay panganggantaꞌna. 7 Tukbalunbi kasusahanbi kamemon ni Tuhan, sabab magkaꞌinagon du iya.
8 Pahāpunbi pamikilbi, pajaga kam toꞌongan. Sabab ilu bantabi nakuraꞌ saitan amiha kaꞌam. Saliꞌ iya sapantun halimaw maglunsul na paꞌin, kalu aniyaꞌ tapihana nilꞌkkob eꞌna. 9 Atuhunbi nakuraꞌ saitan ma ahogot pangandolbi ma si Isa, sabab kataꞌuwanbi nggaꞌi ka hal kaꞌam ya tꞌkkahan kabinasahan, sampay isab saga pagkahibi Almasihin ma kaluhaꞌan dunya.
10 Sagōꞌ aubus paꞌin eꞌbi anandalan kabinasahan ma daiꞌ-daiꞌ, binawiꞌ du kam eꞌ Tuhan sampay halam aniyaꞌ sallaꞌbi. Pinatotog eꞌna imanbi, binuwanan du kam kosog boꞌ mbal apinda min pangandolbi ma iya. In iya Tuhan poꞌonan tatabangan. Pinagabbit kam eꞌna supaya kam pinabangsa ma deyom kasahayaꞌanna ya mbal magkapinda, pagka Al-Masi ya parakayuꞌanbi. 11 Sanglitantam Tuhan, ya sangat kawasa sampay ni kasaumulan. Amin.
Lapal Katangbusan
12 Si Silas bay anabangan aku anulat sulat apuꞌut itu. Bang ma bistahanku in iya dakayuꞌ danakantam tantu kapangandolan. Bilahi aku amahogot ataybi, ya poꞌon aku amabeyaꞌ sulat itu. Sugpatanku isab saksiꞌku, in itu tatabangan sabꞌnnal-bꞌnnal deyoꞌ bay min Tuhan. Daꞌa bbahinbi.
13 Amabeyaꞌ minsan laꞌa hal lapal sigām saga pagkahibi bebeyaꞌan Al-Masi ya magsakaum maitu ma lahat Babilon, aꞌa tapeneꞌ eꞌ Tuhan buwat kaꞌam. Ya du si Markus itu, ya itungku saliꞌ anakku. 14 Magsiyum kam tandaꞌ sin paglasabi dangan maka dangan.
Mura-murahan, bang paꞌin kam pinaniyaꞌan kasannangan deyom atay, sasuku kam sukuꞌ Al-Masi. Wassalam