2 PETROS
1
Sulat Karuwana min si
PETROS
1 Sulat itu deyoꞌ min aku, si Simun Petros, dakayuꞌ sosohoꞌan si Isa Al-Masi ya kawakilan eꞌna magnasihat.
Pabeyaꞌku sulat itu ni kaꞌam kamemon angandol ma si Isa Al-Masi. In iya Tuhantam maka iya ya makalappas kitam. Min kabontolanna, ya angkan kitam kaniyaꞌan pangandol itu. Manjari pangandolbi ilu maka pangandol kami itu mbal du magbiddaꞌ, ahalgaꞌ saliꞌ-saliꞌ.
2 Mura-murahan, bang paꞌin manglabi-labihan tatabangan maka kasannangan deyom atay ma kaꞌam, min pangitaꞌubi ma pasal Tuhan maka ma pasal Panghūꞌtam si Isa.
Pasal Panaꞌabbit maka Pameneꞌ Tuhan
3 Min barakatna du, angkan kita kaniyaꞌan ai-ai pamajatu kallumta maka pamahogot pangisbatta ma Tuhan, labay min Al-Masi ya bay amowa kaꞌam pinasukuꞌan kahāpna maka kabangsana. 4 Jari pamuwan na ma kitam saga janjiꞌ Tuhan, ya mamarahi ahāp maka ahalgaꞌ. Minnēꞌ kitam makasengod ni kajarihan Tuhan, ati makapuwas kitam min kanapsuhan alumuꞌ ya ma deyom dunya itu.
5 Ya itu sababanna angkan kam subay amanuyuꞌ boꞌ supaya pinasugpat addat-tabiꞌat ahāp ni pangandolbi, ati addat-tabiꞌatbi pinasugpatan pangitaꞌu. 6 Pangitaꞌubi subay pinasugpatan pamaggat napsu, ati pamaggatbi napsu subay pinasugpatan iman. Pangimanbi subay pinasugpatan pagtaꞌat ni Tuhan, 7 ati pagtaꞌatbi subay pinasugpatan lasa ma saga danakanbi bebeyaꞌan si Isa, maka lasabi subay pinasugpatan lasa ni aꞌa kamemon. 8 Bang jukup itu kamemon ma kaꞌam sampay manglabi-labihan na, tantu ahāp kamattihanna ma ai-ai hinangbi, maka pasōng taꞌubi pasal si Isa Al-Masi, Panghūꞌtam. 9 Saguwāꞌ sai-sai halam kaniyaꞌan bay pamūngku heꞌ, ibarat iya aꞌa kasamunan matana, mbal agon makaꞌndaꞌ. Takalipatna na in iya bay sinussi min karusahanna tagnaꞌ.
10 Angkan yukku ma kaꞌam, saga dauranakan, subay kam atuyuꞌ toꞌongan boꞌ atuman kapameneꞌ Tuhan ma kaꞌam. Bang itu hinangbi na paꞌin, mbal toꞌongan kam angꞌbba min pangandolbi tudju ni iya. 11 Minnēꞌ kam binuwanan kapatut boꞌ kam sinagina pasōd ni deyoman pagparinta si Isa Al-Masi, ya Panghūꞌtam Manglalappas. Taptap kapagbayaꞌna sampay ni kasaumulan.
12 Ya du inaꞌan sababanna angkan aku mbal pahali amaentoman kaꞌam, minsan kataꞌuwanbi na maka minsan ahogot na pameyaꞌbi ma panduꞌ bꞌnnal ya taꞌāꞌbi. 13 Sababna, bang ma aku, patut kam paentomanku na paꞌin satꞌggolku allum. 14 Kataꞌuwanku, mbal aku atꞌggol maitu, sabab pinataꞌu aku eꞌ si Isa Al-Masi Panghūꞌtam in aku song amoleꞌ lahat. 15 Angkan tukiranku pamanduꞌku ma kaꞌam boꞌ supaya aniyaꞌ pangentomanbi ma ai-ai bay pamūngku bang aku amatay na.
Kasahaya maka Barakat Panghūꞌ Isa Al-Masi
16 Nggaꞌi ka kissa luwas min akkal manusiyaꞌ ya pameyaꞌan kami, waktu kapangahaka kami ma kaꞌam pasal kabalik si Isa Al-Masi Panghūꞌtam ni dunya, maka pasal kawasana. Mata kami ya bay makaꞌndaꞌ sahayana maka kaheyaꞌanna. 17 Mahēꞌ asal kami waktu bay kapanambutna kamahaldikaꞌan maka sahaya min Tuhan ya Mmaꞌna. Aniyaꞌ suwala bay pinakale ma iya luwas min haddarat Tuhan, yuk-i, “Anakku koꞌ itu kalasahanku. Landuꞌ aku kasulutan ma iya.” 18 Baran kami bay makakale suwala heꞌ amissala min deyom sulgaꞌ, waktu kapagdongan kami maka Al-Masi ni pussuk būd ya bay kamahēꞌan Tuhan.
19 Manjari itu, pagka inaꞌan bay tanyataꞌ kami, makatantu kami in bay pagkallam saga nabi pasal Al-Masi kapamꞌnnalan sadja du. Subay asipbi pahāp ya bay pinagkallam eꞌ sigām, sabab sapantun palitaꞌan koꞌ inān asinag na paꞌin ma deyom kalendoman, sampay ni karaiꞌ-llawan, sampay ni waktu kasobang bituꞌun maga. 20 Muna-muna, asipunbi panduꞌ ītu labi min kamemon: halam aniyaꞌ manusiyaꞌ makapahati pasal pagkallam kanabi-nabihan ya tasulat ma deyom Kitab, bang hal min baranna. 21 Sabab ya pinagkallam eꞌ kanabi-nabihan itu nggaꞌi ka luwas min kahandak manusiyaꞌ. Tuꞌud sigām kapagbayaꞌan eꞌ Rū Tuhan angkan makapaluwas lapal deyoꞌ min Tuhan.