2
Banta Tuhan
1 Na, in pasal kapiꞌitu Panghūꞌtam si Isa Al-Masi, maka pasal pagtimuktam mainaꞌan maka iya, ya na itu pangamuꞌ kami ma kaꞌam saga dauranakanku. 2 Daꞌa kam magtūy asasaw atawa asusa bang aniyaꞌ aꞌa magbauꞌ-bauꞌ in llaw pagbīng Panghūꞌ Isa ni dunya taꞌabut na. Daꞌa beyaꞌunbi minsan kami ya tinugpang bay amabeyaꞌ lapal atawa sulat atawa bissala bay patulun min Tuhan. 3 Daꞌa kam ameyaꞌ nilingu eꞌ sai-sai minsan buwattingga pamissala sigām. Sabab ya llaw Panghūꞌ inān mbal giꞌ magtūy atꞌkka, sabab in kahekaꞌan manusiyaꞌ ma dunya itu subay anaggaꞌ dahū ma Tuhan. Maka aniyaꞌ dakayuꞌ aꞌa mamarahi laꞌatna subay patuwaꞌ dahū boꞌ yampa atꞌkka llaw inaꞌan-i. Nalkaꞌ ya pamakadal ma aꞌa inān. 4 Kinuntarahan eꞌna ai-ai kamemon ya pagtuhanan eꞌ manusiyaꞌ, maka kamemon ya sinumba eꞌ sigām. Magpalanga iya di-na min kamemon, ati pasōd iya aningkōꞌ ma langgal pangarapan Tuhan magnahuꞌ-nahuꞌ in iya Tuhan.
5 Halam bahāꞌ taentombi? Bay na itu pangahakaku ma kaꞌam waktu lagiꞌ bay kamailuku. 6 Kataꞌuwanbi du bang ai ya angagpang aꞌa mamarahi alaꞌat eꞌ, ya angkan mbal magtūy paniyaꞌ bay yukku-i. Subay taꞌabut waktu bay panganggantaꞌ iya boꞌ yampa iya palahil. 7 Ma buwattinaꞌan magkahinangan asal aꞌa mamarahi laꞌatna inān, sagōꞌ ma deyom sipuk. Mbal giꞌ tinoꞌongan hinangna satꞌggol masi maitu ya manghahawid. 8 Subay nilaꞌanan manghahawid inān boꞌ yampa palahil aꞌa mamarahi laꞌatna itu. Sagōꞌ atubag du iya eꞌ Panghūꞌ Isa ma waktu kabalikna piꞌitu. Amatay iya eꞌ napas Panghūꞌ, magmula iya katūyan ma sabab sahaya Panghūꞌ. 9 Jari paglahil aꞌa itu, aniyaꞌ kawasana min nakuraꞌ saitan ya angkan iya makahinang kaginisan hinang kawasahan maka saga paltandaꞌan maka saga hinang makainu-inu, sagōꞌ nggaꞌi ka bꞌnnal. 10 Ginuna eꞌna kalaꞌatan indaginis pamarupangna saga aꞌa anudju nalkaꞌ. Ya angkan sigām anudju nalkaꞌ sabab mbal sigām bilahi ma panduꞌ kasabꞌnnalan. Halam tataimaꞌ eꞌ sigām boꞌ supaya sigām lappasan min hukuman dusa. 11 Pagka buwattēꞌ, pinatꞌkkahan sigām eꞌ Tuhan akkal-pikilan abengkok, ya poꞌon sigām magkahagad ma kaputingan. 12 Angkan pinatꞌkkahan hukuman sasuku mbal magkahagad ma panduꞌ kasabꞌnnalan saguwāꞌ kinōgan gom paꞌin maghinang kalaꞌatan.
Pamatotog Pangandoltam
13 Sagōꞌ wajib kami magsukul ni Tuhan sakahabaꞌ waktu ma sabab kaꞌam, saga dauranakan kinalasahan eꞌ Panghūꞌtam. Sabab bay kam tapeneꞌ asal eꞌ Tuhan min awal tagnaꞌ lagiꞌ, supaya kam lappasan ma sabab hinang Rū Tuhan amasussi deyom ataybi, maka ma sabab pagkahagadbi ma panduꞌ kasabꞌnnalan pasal si Isa Al-Masi. 14 Ya na koꞌ heꞌ poꞌonna angkan kam tapeneꞌ eꞌ Tuhan, pagka takalebi lapal ahāp ya bay pagnasihat kami ma kaꞌam. Tapeneꞌ kam eꞌna supaya kam pinahampitan sanglit maka sahaya Panghūꞌtam si Isa Al-Masi. 15 Angkanna, saga dauranakanku, patotogunbi pangandolbi. Bogboginbi toꞌongan saga panduꞌ bay takalebi min bowaꞌ kami, sampay saga panduꞌ ma deyom sulat bay pabeyaꞌan kami ni kaꞌam.
16 Kinalasahan kitam eꞌ Mmaꞌtam Tuhan, maka tinabang kitam eꞌna, angkan pamuwanna na ma kitam katotogan atay anatas ni kasaumulan. Pamuwanna isab pangasa mbal magkapinda. Mura-murahan, bang paꞌin Mmaꞌtam Tuhan maka Panghūꞌtam si Isa Al-Masi 17 amahogot ataybi maka amakosog kaꞌam supaya ahāp sadja hinangbi maka bissalabi.