3
Si Paul Mikisambahayang
1 Na, saga dauranakanku, ya itu llingku katapusan. Amuꞌ-amuꞌinbi kami tabang ni Tuhan, bang paꞌin alꞌkkas palatag lapal pasal Panghūꞌtam, bang paꞌin nihulmat isab lapal itu eꞌ saga aꞌa makakale, buwat bay kapangahulmatbi. 2 Angamuꞌ-ngamuꞌ kam isab bang paꞌin kami pinuwas eꞌ Tuhan min aꞌa jahulakaꞌ, sabab nggaꞌi ka aꞌa kamemon ya magkahagad ma lapal ahāp.
3 Daipara kapangandolan toꞌongan Panghūꞌtam. Pinahogot eꞌna imanbi, nihampanan isab kam boꞌ mbal niꞌinay eꞌ nakuraꞌ saitan. 4 Angandol kami ma kaꞌam ma sabab Panghūꞌtam, ati kataꞌuwan kami in kaꞌam tantu ameyaꞌ ma bay panohoꞌan kami, maka hinangbi na paꞌin.
5 Mura-murahan, bang paꞌin kam niulinan eꞌ Panghūꞌ boꞌ pasōng taꞌubi pasal lasa Tuhan ma kaꞌam, maka pasal kasandal Al-Masi.
Pagbandaꞌ Pasal Kalisuꞌ
6 Manjari, saga dauranakanku, pagka aniyaꞌ kapatut kami min Panghūꞌtam si Isa Al-Masi, sohoꞌta kam paokat min pagkahibi bebeyaꞌan si Isa kaseheꞌ, ya lisuꞌan magusaha, maka mbal ameyaꞌ ma bay pamanduꞌ kami ma kaꞌam. 7 Sabab kataꞌuwanbi asal in kami subay panunuranbi. Halam kami bay lisuꞌan maghinang waktu giꞌ kamailu kami ma kaꞌam. 8 Halam kami bay mikibalanjaꞌ, sagōꞌ bayaran kami ai-ai bay pagnapaka kami. Gom paꞌin kami maghulas-sangsāꞌ llaw maka sangom boꞌ supaya aniyaꞌ kalluman kami. Jari mbal kam kabuhatan amalanjaꞌ. 9 Patut asal bang kami mikibalanjaꞌ ni kaꞌam, sagōꞌ amalanjaꞌan kami di-kami boꞌ aniyaꞌ kapamintānganbi. 10 Sabab minsan ma waktu kamailu kami, aniyaꞌ bay pamanduꞌ kami ma kaꞌam, yuk-i, “Bang aꞌa mbal bilahi maghinang, subay iya mbal pakanbi.”
11 Ya angkan itu binissala, sabab makakale kami aniyaꞌ ilu ma kaꞌam saga aꞌa lisuꞌan magusaha maka kabiyaksahan sigām palamud ma palkalaꞌ nggaꞌi ka sukuꞌ sigām. 12 Ya panohoꞌan kami maka pamituwa kami ma sigām min kapatut Panghūꞌtam si Isa Al-Masi, subay sigām pahantap magusaha.
13 Sagōꞌ kaꞌam, saga dauranakanku, daꞌa kam sinumu maghinang ahāp. 14 Bang aniyaꞌ gantaꞌ mailu agagga ameyaꞌ ma panohoꞌan kami ya ma deyom sulat itu, gindaninbi aꞌa inān ati daꞌa kam magbeyaꞌ maka iya boꞌ supaya iya aiyaꞌ. 15 Daꞌa paꞌin iya itungunbi saliꞌ bantabi, sagōꞌ bandaꞌanbi iya saliꞌ dakayuꞌ danakanbi.
Pamissala Katapusan
16 Mura-murahan, bang paꞌin kam pinaniyaꞌan kasannangan eꞌ Panghūꞌtam, ya poꞌonan kasannangan, sakahabaꞌ waktu minsan ai makani-kaꞌam. Mura-murahan isab, bang paꞌin iya pagapiꞌ ma kaꞌam kamemon.
17 Na, aku baranku ya anulat katapusan sulat itu, tandaꞌ in aku si Paul ya amabeyaꞌ. Buwattitu asal kabiyaksahanku ma sulatku kamemon.
18 Mura-murahan, bang paꞌin kaꞌam kamemon pinaniyaꞌan tatabangan aheya eꞌ Panghūꞌ Isa Al-Masi. Wassalam