1 TESSALONEKA
Pahati pasal sulat itu
Aniyaꞌ dakayuꞌ daꞌira mahēꞌ ma lahat Makidunya niōnan Tessaloneka. Mbal du alawak daꞌira itu min daꞌira Pilipi.
Ma lꞌngngan si Paul karuwana bay iya makahapit maka saga seheꞌna si Timuti maka si Silas ni Tessaloneka boꞌ magnasihat ni saga aꞌa mahēꞌ. Minsan mbal atꞌggol kamahēꞌ sigām, aheka aꞌa bay akale ma pagnasihat sigām sampay magkahagad na ma Panghūꞌ Isa. Sagōꞌ aniyaꞌ saga Yahudi bay anaggaꞌ disi Paul, bay amidjakan isab saga aꞌa Tessaloneka, sinōꞌ angalaꞌat sigām. Angkanna sigām bay alaꞌan minnēꞌ tudju ni daꞌira Kurintu. Ma Kurintu paꞌin, asusa pamikil si Paul pasal saga bebeyaꞌan si Isa bay bbahanna ma Tessaloneka inān, ya agon-agon tabowa eꞌ sasat ati pataikut min Panghūꞌ sigām si Isa. Jari sinōꞌ si Timuti patibaw eꞌ si Paul pinaꞌan ni Tessaloneka angahati bang buwattingga saga Almasihin mainaꞌan.
Makabīng paꞌin si Timuti ni Kurintu, nihaka eꞌna pasal kahālan saga bebeyaꞌan si Isa Al-Masi mainaꞌan ma Tessaloneka. Manjari aheya pagsukulan si Paul ni Tuhan pasal iman maka lasa sigām. Angkanna pabeyaꞌna sulat itu. Sinambungan isab eꞌna patilaw sigām pasal kabalik si Isa min sulgaꞌ, maka sinōꞌ sigām pataptap angandol ma si Isa minsan ma deyom kabinasahan.