1 TESSALONEKA
1
Sulat si Paul Kaissana ni Saga Aꞌa ma Daꞌira
TESSALONEKA
1 Sulat itu min aku, si Paul, maka min seheꞌku si Silas maka si Timuti, pinasampay piꞌilu ni palhimpunan Tessaloneka, ya sukuꞌ Mmaꞌtam Tuhan maka Panghūꞌtam si Isa Al-Masi.
Mura-murahan, bang paꞌin kam pinaniyaꞌan tatabangan maka kasannangan.
Pagsukulan ma Sabab saga Aꞌa Tessaloneka
2 Magsukul kami ni Tuhan ma sababbi sakahabaꞌ waktu kapangamuꞌ-ngamuꞌ kami ni Tuhan. 3 Nientom kam ma alopan Mmaꞌtam Tuhan, nientom kahāpan ya hinangbi luwas min pangandolbi, nientom pagsangsāꞌbi ma sabab lasabi ma iya, maka kahogot imanbi isab ma sabab Panghūꞌ Isa Al-Masi ya pangasahanbi.
4 Saga dauranakan, kaꞌam kinalasahan eꞌ Tuhan, kataꞌuwan kami in kaꞌam bay tapeneꞌ eꞌna. 5 Sabab nggaꞌi ka pangupama manusiyaꞌ ya panganasihat kami ma kaꞌam, sagōꞌ lapal abarakat bay min Rū Tuhan, angkan ahogot pagsabꞌnnalbi. Kataꞌuwanbi bay bowahan kami waktu katꞌnnaꞌ kami ma kaꞌam boꞌ ahāp kahālanbi. 6 Bay sunuranbi kajarihan kami maka kajarihan Panghūꞌtam. Minsan kalabayanbi katiksaꞌan abisa, tinaimaꞌ eꞌbi lapal itu, lāgi kinōgan kam sabab min Rū Sussi. 7 Angkan buwattinaꞌan, kaꞌam ya panunuran eꞌ kamemon saga aꞌa magpangandol ma lahat Makidunya maka ma lahat Akaya. 8 Pasaplag isāb lapal pasal Panghūꞌ Isa sabab min kaꞌam, pasampay ni kaluhaꞌan lahat Makidunya maka Akaya. Nggaꞌi ka hal jadjahan inaꞌan, pasaplag habal pasal pangandolbi ni Tuhan ni sabarang lahat. Minsan kami mbal na ahꞌlling, 9 sabab amissala na paꞌin saga aꞌa inān pasal kapanaimaꞌbi ma kami. Tabissala pasal kapangꞌbbabi min taꞌu-taꞌu ya bay pagtuhananbi tagnaꞌ boꞌ kam papinda angisbat Tuhan bꞌnnal, ya kakkal salama-lama. 10 Angagad konoꞌ kam ma waktu kapiꞌitu min sulgaꞌ Anakna, ya bay pakallumna min kamatayna. Si Isa koꞌ inān, ya angalappas kitam min mulkaꞌ song pinatꞌkka ni saga manusiyaꞌ.