2
Kahinangan si Paul ma Daꞌira Tessaloneka
1 Saga dauranakanku, kataꞌuwanbi aheya kapūsan lꞌngngan kami piꞌilu ni kaꞌam. 2 Kataꞌuwanbi asal, bay kami makalabay kabinasahan ma daꞌira Pilipi maka landuꞌ nihinaꞌ, sagoꞌ magsukul ni Tuhan, bay kami makatawakkal angahakaꞌan kaꞌam lapalna ahāp minsan aheka anaggaꞌ. 3 Ya pamanduꞌ kami ma kaꞌam halam aniyaꞌ sāꞌna, halam aniyaꞌ mohotna alaꞌat, halam aniyaꞌ niyat kami angakkalan kami. 4 Tabista kami eꞌ Tuhan makajari pinangandolan lapal ahāp itu. Mbal kami angangut anulut manusiyaꞌ sagōꞌ Tuhan, ya makaliling deyom pikilantam. 5 Kataꞌuwanbi haliluwal kami, halam kami bay angalanahan aꞌa minsan sai boꞌ tabowa amꞌnnal, halam kami magbauꞌ-bauꞌ in kami asaltun boꞌ paꞌin sinōd bahaya pilak. Tuhan ya saksiꞌ kami. 6 Halam isab kami bay amiha mahaltabat min manusiyaꞌ, ai na ka min kaꞌam atawa min aꞌa saddī.
Minsan kami taga-kapatut pagka kawakilan Al-Masi, halam kami bay angahagda atawa amabuhat kaꞌam. 7 Gom paꞌin ahanunut pahꞌlling kami ma kaꞌam, buwat dꞌnda angupiksaꞌ saga anakna. 8 Aheya lasa kami ma kaꞌam, ya poꞌon kami lillaꞌ angahakaꞌan kaꞌam pasal lapal ahāp min Tuhan. Lāgi pamalillaꞌ baran kami sampay ni kamatay, ma sabab kaheya lasa kami ma kaꞌam. 9 Tantu taentombi, saga dauranakan, bay pagluꞌug kami waktu kamailu kami ma kaꞌam. Bay kami maghulas-sangsāꞌ llaw-sangom boꞌ aniyaꞌ kalluman kami, supaya halam sai-sai kabuhatan satꞌggol kami anganasihatan kaꞌam lapal Tuhan.
10 Kasaksiꞌanbi, maka kasaksiꞌan isab eꞌ Tuhan, bang buwattingga bay tebong kami ma deyomanbi saga aꞌa magpangandol. Abontol sadja kami, halam aniyaꞌ kasāꞌan. 11 Kataꞌuwanbi isab bay addat kami ma kaꞌam pakaniya-pakaniya, saliꞌ addat mattoꞌa ma saga anakna lahasiyaꞌ. 12 Bay pahogot kami imanbi, bay palasig kami pangatayanbi, bay kam sinōꞌ amahāp kaul-piꞌilbi boꞌ tōp ma Tuhan, ya amowa kaꞌam palamud ma pagparintahanna maka ma kasahayaꞌanna.
13 Magsukul na paꞌin kami ni Tuhan sabab mbal takalipat kami bay kapanaimaꞌbi lapal palman. Takalebi min kami boꞌ paꞌin nggaꞌi ka lapal manusiyaꞌ ya taimaꞌbi sagōꞌ palman sabꞌnnal-bꞌnnal min Tuhan, palman amowa na paꞌin ma deyom pangatayan sasuku magkahagad. 14 Dauranakanku, panunuranbi na pakaradjaꞌan ya kalabayan eꞌ saga jamaꞌa si Isa Al-Masi ya ma palhimpunan lahat Yahudiya. Sabab ya du kaꞌam bay nilaꞌat eꞌ pagkahibi dabangsa, buwat bay pangalaꞌat sigām eꞌ pagkahi sigām Yahudi. 15 Bay pinapatay eꞌ sigām Panghūꞌ Isa, maka pinapatay isab kanabi-nabihan ma awal lagiꞌ. Mbal sigām makasulut atay Tuhan maka sinaggaꞌ eꞌ sigām saga aꞌa kamemon. 16 Sinaggaꞌ kami eꞌ sigām boꞌ mbal tapagnasihat lapal ahāp ma saga aꞌa bangsa liyu, ya nggaꞌi ka Yahudi sabab mbal bilahi bang bangsa liyu lappasan min dusa. Mbal sigām pahali angalanduꞌan dusa sigām, ya angkan pinataluwaꞌan mulkaꞌ Tuhan.
Kabayaꞌan si Paul Anibaw saga Aꞌa Tessaloneka
17 Saga dauranakanku, pagka kami bay magokat maka kaꞌam minsan mbal atꞌggol, landuꞌ kami angentom ati atuyuꞌ toꞌongan kami amowa magꞌndaꞌ maka kaꞌam pabīng. Minsan kami alawak min kaꞌam buwattinaꞌan, itiyaꞌ kam ma deyom pikilan kami. 18 Bilahi kami patibaw ni kaꞌam, paligay aku itu, si Paul. Min pila aku bay magsakap piꞌilu, sagōꞌ pinatꞌnnaꞌan aku bimbang eꞌ nakuraꞌ saitan, ya angkan halam makalanjal. 19 Na, kaꞌam ya pagsababan pagkōg-koyagan kami maka kaholatan kami. Maka kaꞌam ya pamantugan kami ma matahan Panghūꞌtam si Isa bang taꞌabut waktu pagbīngna piꞌitu. 20 Ahoꞌ bꞌnnal, kaꞌam ya pamantugan maka pagkōg-koyagan kami.