3
1-2 Na, pagka mbal kasandalan pangentom kami ma kaꞌam, anganiyat kami amatibaw si Timuti piꞌilu, boꞌ kami duwangan taꞌbba ma daꞌira Aten itu. Si Timuti itu, danakan kami asal maka seheꞌ kami maghinang kahinangan Tuhan. Magbeyaꞌ kami magnasihat lapal ahāp pasal Al-Masi. Pinatibaw iya piꞌilu boꞌ amahogot imanbi maka amakosog pangandolbi ma Tuhan. 3 Ya kabayaꞌan kami subay halam aniyaꞌ tabowa maghenggol-henggol imanna ma sabab kabinasahan ya kalabayanbi ilu. Kataꞌuwanbi asal, pinakadal kitam kabinasahan pagka sukuꞌ Al-Masi. 4 Bay sa kam nihakaꞌan waktu kamailu kami, in kitam sukuꞌ Al-Masi tantu tꞌkkahan kabinasahan. Jari kasakupanbi na, paniyaꞌ na bay pangahaka kami. 5 Angkanna, pagka mbal na kasandalanku susaku ma kahālanbi, bay sohoꞌku si Timuti piꞌilu angahati kaꞌam bang masi ahogot pagimanbi ma si Isa Al-Masi. Ya kahanggawanku, kalu kam bay tasasat eꞌ nakuraꞌ saitan, sabab bang kam tabowa eꞌ sasat saitan, kaliman bay hinang kami mailu.
6 Daipara itiyaꞌ na si Timuti bahaꞌu bay atꞌkka min kaꞌam, maka ahāp toꞌongan habal ya tabowana pasalbi. Yukna ahogot masi pagimanbi ma Tuhan maka masi na paꞌin paglasabi dangan maka dangan. Yukna isab ahāp ataybi tudju ni kami itu, maka aheya bayaꞌbi angꞌndaꞌ kami, buwat kaheya bayaꞌ kami magꞌndaꞌ maka kaꞌam. 7 Angkanna, saga dauranakan, minsan kami ma deyom kasigpitan maka kabinasahan, ahogot du atay kami sabab makataꞌu na kami in kaꞌam halam apinda min pangandolbi ma Tuhan. 8 Ahāp na palnyawahan kami pagka kataꞌuwan kami in pameyaꞌbi ma Panghūꞌ Isa atotog du. 9 Magsukul na kami ni Tuhan ma sababbi, sabab kaꞌam ya poꞌonna angkan aheya kakōgan kami ma matahanna. 10 Llaw-sangom atukid kami angamuꞌ-ngamuꞌ ni Tuhan, bang paꞌin kami magꞌndaꞌ maka kaꞌam, boꞌ kam katabangan kami bang aniyaꞌ mbal giꞌ jukup ma pagimanbi.
11 Mura-murahan, bang paꞌin kami tinabang eꞌ Mmaꞌtam Tuhan maka eꞌ Panghūꞌtam si Isa boꞌ kami makatūy piꞌilu ni kaꞌam. 12 Mura-murahan isab, bang paꞌin kam tinabang eꞌ Panghūꞌtam boꞌ lumabihan lasabi ma saga seheꞌbi dambeyaꞌan ilu sampay ma manusiyaꞌ kamemon, buwat isab lasa kami ma kaꞌam. 13 Bang paꞌin pinatotog ataybi eꞌ Panghūꞌ supaya kam asussi maka saltun ma matahan Mmaꞌtam Tuhan ma waktu kabalik piꞌitu Panghūꞌ Isa, beyaꞌ maka baꞌanan aꞌa sukuꞌna.