4
Kaul-piꞌil ya Makasulut Atay Tuhan
1 Na, saga dauranakan, buwattitu hatulanna. Bay kam panduꞌan kami bang kaul-piꞌil ingga ya makasulutan Tuhan. Buwattēꞌ asal kaul-piꞌilbi, Sagōꞌ buwattinaꞌan, pagka aniyaꞌ kapatut kami min Panghūꞌ Isa, amuꞌta kam maka sohoꞌta kam amuspus toꞌongan ma kaul-piꞌil ahāp. 2 Kataꞌuwanbi du, in pamanduꞌ kami ma kaꞌam asal min kapatut Panghūꞌ Isa. 3 Ya kabayaꞌan Tuhan subay asussi deyom ataybi. Daꞌa kam maghinang kalaꞌatan dꞌnda maka lꞌlla. 4 Kaꞌam kalꞌllahan, subay ahantap eꞌbi amowa hꞌndabi ma halam aniyaꞌ sabulna, maka subay ahatul addatbi ma sigām. 5 Daꞌa parūlunbi napsu baranbi magbaꞌis-baꞌis, buwat saga aꞌa mbal magmatāw ma Tuhan. 6 Na, bang takdil ni napsu baran itu, daꞌa toꞌongan kam angahinang laꞌat ma pagkahibi bebeyaꞌan si Isa. Daꞌa isab kam angulliꞌ ai-aina sabab bininasa eꞌ Panghūꞌ sasuku magdusa buwattēꞌ. Bay kam pataꞌu kami pasal palkalaꞌ itu ma waktu tagnaꞌ giꞌ, bay na kam asal bandaꞌan kami. 7 Pineneꞌ kitam eꞌ Tuhan supaya anuyuꞌan palantara asaltun, daꞌa paghinang kalaꞌatan dꞌnda maka lꞌlla. 8 Jari sasuku anaikutan panduꞌ itu, Tuhan ya taikutanna, nggaꞌi ka manusiyaꞌ. Lāgi Tuhan ya amuwanan kaꞌam Rū-na Sussi.
9 Na, minsan kam mbal sinulatan pasal paglasabi maka pagkahibi angandol ma Al-Masi, sabab kapanduꞌan kam eꞌ Tuhan, subay maglasa-liyasahi dangan maka dangan. 10 Maka alasa du kam asal ma saga danakanbi kamemon magpangandol ma si Isa, inaꞌan ma kaluhaꞌan lahat Makidunya ilu. Sagōꞌ amuꞌta kam, saga dauranakan, pasōngunbi giꞌ lasabi ma sigām. 11 Tuyuꞌinbi ai-ai amowa ni kasannangan. Tukirinbi hinangbi luggiyaꞌ, daꞌa kam anasaw ma hinang pagkahibi. Magusahaꞌan kam di-bi boꞌ aniyaꞌ kallumanbi, buwat bay panohoꞌan kami ma kaꞌam dahū. 12 Manjari bang beyaꞌbi panohoꞌan itu, pinagaddatan kam eꞌ saga aꞌa minsan sigām mbal angandol ma si Isa, ati mbal kam asukkal ma kalluman.
Pasal Kapabalik Panghūꞌ Isa
13 Na, saga dauranakanku, bilahi kami amahati kaꞌam pasal saga aꞌa angandol ma si Isa Al-Masi bang sigām gantaꞌ amatay na. Subay kam mbal magdukka buwat saga aꞌa kaseheꞌan, ya halam aniyaꞌ pangasa-ngasahan sigām allum pabalik. 14 Amꞌnnal kitam in si Isa bay amatay ati allum pabīng, angkan kitam amꞌnnal bang amatay saga aꞌa ya angandol ma si Isa, pinakallum du sigām pabīng eꞌ Tuhan ati paronganna sigām ma si Isa ma waktu pagbīngna.
15 Pamanduꞌ kami itu bay min Panghūꞌ Isa, ya yukna in kitam masi allum ma waktu kabīngna piꞌitu, mbal du parahū min saga aꞌa magpatayan. 16 Sabab dahū aniyaꞌ lling pagtawag akosog, maka suwala nakuraꞌ malaꞌikat, maka lling tiyup-tiyup min Tuhan. Magtūy saruꞌun-duꞌun ya tꞌkka Panghūꞌ min sulgaꞌ. Puwas eꞌ pinabangun dahū saga aꞌa bay magpatayan, aꞌa asal bay angandol ma Al-Masi. 17 Puwas eꞌ kitam ya masi allum ma dunya itu, binowa du magdongan maka sigām paꞌangkat ni diyataꞌ gabun boꞌ anampang Panghūꞌtam ma tongaꞌan ayan. Manjari parakayuꞌ kitam ma Panghūꞌ sampay ni kasaumulan. 18 Angkan pangahakaꞌunbi saga bissala itu dangan ni dangan, boꞌ supaya ahogot pangatayanbi.