5
1 Na, saga dauranakan, in pasal masa sinōng maka pakaradjaꞌanna, minsan kami mbal na anulatan kaꞌam. 2 Sabab kataꞌuwanbi du, ya llaw kapiꞌitu Panghūꞌ magtaghaꞌ sadja saliꞌ hantang aꞌa anangkaw ma sangom, mbal kinataꞌuwan bang sumiyan ya katꞌkkana. 3 Bang aniyaꞌ aꞌa magupama in sigām asannang na, maka halam aniyaꞌ kapiligduhan, magtūy sigām tꞌkkahan balaꞌ sabu paꞌin sigām ahꞌlling. Mbal sigām makalahi sabab taghaꞌ sadja tꞌkka balaꞌ heꞌ, sapantun dꞌnda song anganak bang pataghaꞌ pꞌddiꞌna. 4 Sagōꞌ kaꞌam ilu, saga dauranakanku, nggaꞌi ka ma deyom kalendoman, angkan kam subay mbal kinoblaꞌan bang pataghaꞌ ya tꞌkka llaw inaꞌan-i, buwat kakoblaꞌ aꞌa bang aniyaꞌ sugarul anōd lumaꞌna. 5 Sabab kaꞌam ilu saliꞌ aꞌa porol ma kasawahan, nggaꞌi ka ma kalendoman. 6 Angkanna kitam subay mbal makasaliꞌ ni saga aꞌa kaseheꞌan, ya magtulihan sadja. Subay kita pajaga, maka subay ahāp pamikiltam. 7 Sarang na waktu sangom pagtuli aꞌa, maka sangom isab ya waktu paglalango saga aꞌa magiꞌinum. 8 Sagōꞌ kitam, pagka ma deyom kasawahan na, subay ahāp pamikiltam, nggaꞌi ka buwat pamikil aꞌa maglalango. Kitam magpangandol ma si Isa saliꞌ dalil sundalu magtinampan. Ya panampan daggahata, ya na pangandolta ni Tuhan maka lasata. Ya panurung kōkta, ya na kaholatanta ma Tuhan in kitam kalappasan du. 9 Halam kitam bay pineneꞌ eꞌ Tuhan supaya kitam pinananam mulkaꞌna, sagōꞌ supaya kitam lappasan ma sabab si Isa Al-Masi ya Panghūꞌtam. 10 Bay iya amatay gantiꞌtam boꞌ supaya kitam patꞌnnaꞌ ma iya, ai na ka amatay, ai na ka allum lagiꞌ ma waktu kapiꞌituna. 11 Angkan kam subay amahogot atay seheꞌbi dangan maka dangan. Subay kam magtabang-tiyabangi buwat asal kabiyaksahanbi.
Pamissala Katapusan
12 Na, saga dauranakan, aniyaꞌ giꞌ pangamuꞌ kami ma kaꞌam. Pagaddatinbi saga aꞌa pagnakuraꞌanbi ma deyoman Panghūꞌ Isa. Atukid sigām maghinang ma deyomanbi, amanduꞌan kaꞌam pasal addat-tabiꞌat maka hinang ya makasulut iya. 13 Pagmahaltabatinbi maka kalasahinbi saga pagnakuraꞌan ilu ma sabab hinang sigām ma kaꞌam. Magsulut isab kam dangan maka dangan. 14 Ya na itu isab pangamuꞌ kami ma kaꞌam, saga dauranakan, amay-amayinbi saga aꞌa lisuꞌan, sōꞌunbi sigām maghinang. Pahogotunbi atay sasuku alꞌkkas sinōd tāw. Tabanginbi isab saga aꞌa aluhay tabowa eꞌ sasat. Imaninbi aꞌa kamemon. 15 Pajaga kam supaya halam aniyaꞌ ma kaꞌam amalosan laꞌat bang gantaꞌ aniyaꞌ angalaꞌat kaꞌam. Sagōꞌ ya tuyuꞌanbi sakahabaꞌ waktu subay maghinang ahāp ma pagkahibi angandol ma si Isa Al-Masi, sampay ma saga aꞌa kamemon.
16 Subay kam magkakōran sakahabaꞌ llaw. 17 Subay kam angamuꞌ-ngamuꞌ na paꞌin ni Tuhan. 18 Ai-ai patꞌkka ni kaꞌam, subay kam magsukul sadja sabab ya na kabayaꞌan Tuhan subay hinangbi pagka si Isa Al-Masi ya parakayuꞌanbi.
19 Daꞌa saggaꞌunbi ai-ai nihinang eꞌ Rū Sussi ma deyomanbi. 20 Daꞌa palehomunbi saga bissala ya pinabissala eꞌ Tuhan. 21 Sagōꞌ pariksaꞌunbi ai-ai takalebi. Bang ahāp, bogboginbi. 22 Halliꞌinbi laꞌat indaginis.
23 Mura-murahan, bang paꞌin pinasussi kajarihanbi kamemon eꞌ Tuhan, ya amuwan kasannangan atay. Mura-murahan isab, bang paꞌin jagahanna nyawabi maka pikilanbi maka baranbi boꞌ halam aniyaꞌ tamakbi ma waktu pagbīng piꞌitu Panghūꞌtam si Isa Al-Masi. 24 Tantu itu nihinang eꞌ Tuhan ya bay ameneꞌ kaꞌam, sabab kapangandolan iya toꞌongan.
25 Saga dauranakanku, amuꞌinbi isab kami tabang ni Tuhan.
26 Siyumunbi saga danakantam mailu kamemon, tandaꞌ pagaddat kami ma sigām. 27 Aniyaꞌ kapatutku min Panghūꞌ, ya angkan kam sohoꞌku amassa sulat itu ni pagkahibi kamemon ya angandol ma si Isa.
28 Mura-murahan, bang paꞌin kam pinaniyaꞌan tatabangan min Panghūꞌtam si Isa Al-Masi. Wassalam