Kolossa i

KOLOSSA

Pahati pasal sulat itu

Kolossa itu dakayuꞌ daꞌira bay mahēꞌ ma lahat niōnan Asiya Dikiꞌ. Mbal magkataꞌu si Paul maka saga jamaꞌa si Isa Al-Masi ya maglahat ma daꞌira Kolossa heꞌ. Luwal aꞌa niōnan si Epapras ya kataꞌuwanna mahēꞌ, dakayuꞌ seheꞌna maghinang ma si Panghūꞌ Isa. Aniyaꞌ isab aꞌa Kolossa bay amꞌnnal ma si Isa ma sabab nasihat si Epapras.

Ma kalabusu paꞌin si Paul, atꞌkka ni iya si Epapras bay min Kolossa. Aniyaꞌ habal tabowana pasal kahālan saga aꞌa ma palhimpunan si Isa ma Kolossa heꞌ. Yuk habal itu, aniyaꞌ konoꞌ saga guru bahaꞌu palamud ni sigām amowa panduꞌ saddī. Pinareyoꞌ-deyoꞌkonoꞌ si Isa eꞌ sigām ati bang ma pamanduꞌ sigām in bangsa malaꞌikat alanga konoꞌ min si Isa, maka malaꞌikat ya magpatillot ma manusiyaꞌ maka Tuhan. Jari asasaw pikilan kajamaꞌahan si Isa ma palhimpunan Kolossa ma sabab pamanduꞌ saga guru tꞌkka bahaꞌu inān.

Ya itu sababanna angkan si Paul bay amabeyaꞌ sulat itu ni sigām, pinabowa ma si Epapras. Ya pangahaka si Paul ma deyom sulat itu in panduꞌ saga guru inān asāꞌ du. Si Isa Al-Masi bꞌnnal Anak Tuhan, pinalanga asal iya eꞌ Tuhan maka halam aniyaꞌ paliyu min iya. Jari halam aniyaꞌ saddī min si Isa amowa manusiyaꞌ ni Tuhan, maka tunggal iya pagpanghūꞌan.