KOLOSSA
1
Sulat si Paul ni Saga Aꞌa ma Daꞌira
KOLOSSA
1 Sulat itu deyoꞌ min aku, si Paul, maka min danakantam si Timuti. Kawakilan aku eꞌ si Isa Al-Masi min kahandak Tuhan. 2 Pasampayku sulat itu ni kaꞌam saga dauranakan ma Kolossa, aꞌa asussi taga-pangandol ma Al-Masi. Mura-murahan, bang paꞌin kam pinaniyaꞌan tatabangan maka kasannangan atay eꞌ Mmaꞌtam Tuhan.
Pagsukulan si Paul ni Tuhan
3 Sakahabaꞌ waktu kapangamuꞌ-ngamuꞌ kami ma pasalanbi, aheya pagsukulan kami ni Tuhan ya Mmaꞌ Panghūꞌ Isa Al-Masi. 4 Sabab makakale kami habal pasal pangandolbi ma si Isa Al-Masi maka pasal lasabi ma aꞌa saga sukuꞌ Tuhan kamemon. 5 Angandol kam maka alasa sabab aniyaꞌ kaholatan tinauꞌan kaꞌam ma deyom sulgaꞌ. Bay na kam pinakalehan lapal kasabꞌnnalan pasal si Isa, ati minnēꞌ kataꞌuwanbi aniyaꞌ niholat. 6 Pasaplag na paꞌin lapal ahāp itu ni kaluhaꞌan dunya. Aheya du paꞌin paluntungan lapal itu ma deyom kaul-piꞌil manusiyaꞌ, buwat ma kaul-piꞌilbi isab sangay min llaw tagnaꞌ kakalebi pasal kasi-lasa Tuhan. Tahatibi isab bang ai hatulanna 7 pagka kam pinanduꞌan eꞌ si Epapras, seheꞌ kami kinalasahan ya magbeyaꞌ maka kami maghinang panohoꞌan Tuhan. Atukid eꞌna maghinang ma deyoꞌan si Isa Al-Masi, gantiꞌ kami. 8 Bay iya amowahan kami haka pasal lasabi ma sabab Rū Tuhan.
9 Angkan na kami halam pahali angamuꞌan kaꞌam kahāpan ni Tuhan sangay min waktu kapanambut kami lapal pasal kahālanbi. Angamuꞌ-ngamuꞌ kami tabang ni Tuhan bang paꞌin kam binuwanan panghati maka pangitaꞌu eꞌ Rū-na, boꞌ supaya kasakupanbi toꞌongan bang ai pangahandak Tuhan ma buwat kaꞌam. 10 Manjari ahatul kam ma kaul-piꞌilbi buwat kabayaꞌan Panghūꞌ Isa, ati ai-ai hinangbi makasulut iya maka ajatu kahinanganbi waktu ni waktu, maka pasōng pangitaꞌubi pasal Tuhan. 11 Mura-murahan, bang paꞌin kam binuwanan kosog eꞌ Tuhan deyoꞌ min kawasana barakatan, manjari kaimananbi ai-ai minsan buwattingga. 12 Subay kam magkōg-koyag magsukul ni Mmaꞌtam Tuhan, ya bay amapatut kaꞌam boꞌ tataimaꞌbi palsukuꞌan ma deyom lahat asahaya. 13 Pinuwasan kitam eꞌna min deyom kalendoman ya pagbayaꞌan nakuraꞌ saitan, ati pininda kitam ni pagbayaꞌan Anakna kinalasahan. 14 Nilꞌkkat na kitam min pagbanyagaꞌan nakuraꞌ saitan maka taꞌampun dusatam.
In Al-Masi Mbal Kaliyuhan
15 Dasaliꞌ Al-Masi maka Tuhan. Mbal taꞌndaꞌtam Tuhan sagōꞌ kasakupanta kajarihanna pagꞌndaꞌtam Al-Masi. Anak tunggal-kawasa iya, dahū asal min kamemon pinapanjari. 16 Ai-ai kamemon ma deyom sulgaꞌ maka ai-ai ma dunya, ya taꞌndaꞌ eꞌ manusiyaꞌ maka ya mbal taꞌndaꞌ, bangsa hibilis maka ai-ai taga-gaꞌosan ma diyataꞌ ayan, in itu kamemon bay pinapapanjari eꞌ Al-Masi, deyoꞌ bay min Tuhan. Maka Al-Masi ya taga-kapatut ma kamemon. 17 Asal na iya ma halam giꞌ aniyaꞌ pinapanjari, maka iya ya angumbangan pinapanjari kamemon boꞌ supaya mbal apulag. 18 Pagmakōkan iya ma saga jamaꞌana, maka sigām ya buwat ibarat baranna. In iya asal poꞌonan kallum ma sigām, maka dahū iya min kamemon pinakallum min kamatay, supaya iya tunggal bangsahan min kamemon. 19 Min kabayaꞌan Tuhan isab angkan Al-Masi dasaliꞌ maka iya ma kajarihanna kamemon. 20 Ya minaksud asal eꞌ Tuhan in ummat pinapanjari kamemon subay maghāp maka iya labay min Anakna. Manjari ai na ka bangsa ma babaw dunya atawa ma diyataꞌ langit, makapagkahāp maka Tuhan ma sabab lahaꞌ Anakna bay pabuꞌus waktu kamatayna ma hāg.
21 Waktu tagnaꞌ, bay kam alawak min Tuhan. Bantana asal kam ma deyom pikilanbi ma sabab kalaꞌatan ya hinangbi. 22 Saguwāꞌ buwattitu maghāp na kam maka Tuhan sabab min kamatay Al-Masi. Ya maksud Tuhan subay kam magharap maka iya ma asussi pangatayanbi, ma halam aniyaꞌ tamak-tamakbi atawa dusa panāꞌan kaꞌam. 23 Tantu koꞌ inān, bang paꞌin kam patotog angandol ma Al-Masi. Daꞌa bbahinbi lapal ahāp bay takalebi sabab ya na poꞌonna angkan aniyaꞌ holatbi. Ya na koꞌ itu lapal ahāp ya pinasaplagan aꞌa kamemon ma kaluhaꞌan dunya itu. Aku si Paul taga-kagꞌllal min Tuhan magnasihat lapal itu.
Kahinangan si Paul
24 Kinōgan aku bininasa bang paꞌin ma sababanbi, sabab bang aku anandalan kabinasahan, paganap binasaku ni kabinasahan bay kasandalan Al-Masi, ya sasuku halam ajukup. Bay iya anandalan kabinasahan ma sababan saga jamaꞌana, ya ibarat baranna. 25 Aku itu tahinang sosohoꞌan na eꞌ Tuhan boꞌ aku anabang ma sasuku magpangandol ma si Isa. Kawakilan aku eꞌna anabang kaꞌam, sinōꞌ aku magnasihat lapalna kamemon. 26 Lapalna itu bay nilimbungan eꞌ Tuhan min manusiyaꞌ kamemon min masa awal lagiꞌ, sagōꞌ pamataꞌu na buwattinaꞌan ni saga aꞌa sukuꞌna. 27 Sigām sukuꞌna ya pinataꞌu, boꞌ manyatakan saga aꞌa ma sabarang bangsa bang ai maksud Tuhan ma manusiyaꞌ. Mamarahi ahāp ya bay limbunganna heꞌ, ahalgaꞌ toꞌongan, sagōꞌ pinabukis na. Hatina Al-Masi patꞌnnaꞌ du ma deyom ataytam, angkan aniyaꞌ holattam in kitam pinasukuꞌan sahaya ma deyom sulgaꞌ. 28 Angkanna halam aniyaꞌ panganasihat kami saddī min Al-Masi. Ginuna eꞌ kami ai-ai tataꞌu kami pasal Al-Masi, pamiꞌat maka pamanduꞌ kami ma aꞌa kamemon boꞌ supaya sigām dangan maka dangan abontol du ma kaul maka piꞌil, pagka ameyaꞌ na ma Al-Masi. 29 Ya na itu pagsangsāꞌanku na paꞌin. Puspusku kosogku, ya bay pamakosog aku eꞌ Al-Masi.