2
1 Bilahi aku amataꞌu kaꞌam pasal pagkaꞌinagonku ma kaꞌam maka saga aꞌa min daꞌira Laodikiya inān, sampay isab sasuku mbal giꞌ magkilā maka aku. 2 Ya angutku subay ahogot pangandolbi maka subay arakayuꞌ ataybi maglasa-liyasahi. Subay asawa panghatibi pasal Al-Masi sabab minnēꞌ ahogot toꞌongan pangandolbi ati kasakupanbi lapal bay nilimbungan eꞌ Tuhan ma waktu palabay, ya pasal Al-Masi. 3 In iya pagtatauꞌan pangaltaꞌ kamemon, hatina kapandayan maka kataꞌu Tuhan.
4 Na, buwattēꞌ pamahatiku kaꞌam supaya kam mbal takoleꞌ nirupang eꞌ baꞌanan pasuꞌalan halam aniyaꞌ pūsna, minsan buwattingga kaluꞌuyna. 5 Manjari itu, minsan aku alikut min kaꞌam, aheya du kam ma deyom pikilanku. Sidda aku kinōgan ma sabab ahatul pagtipunbi maka atotog pangandolbi ma Al-Masi.
Al-Masi ya Pagmakōkan
6 Jari itu, pagka tataimaꞌbi na si Isa Al-Masi pagpanghūꞌanbi, subay kam pasangdan na paꞌin ma iya. 7 Ya pamalutbi ma iya subay buwat gamut kayu lalomna. Patꞌttog kam ma iya supaya pahogot gom paꞌin pangandolbi buwat bay pamanduꞌ kaꞌam. Subay lipat-manglipat pagsukulanbi ni Tuhan.
8 Kamayaꞌ-mayaꞌ kam boꞌ kam mbal kaꞌakkalan eꞌ manusiyaꞌ minsan sai-na bang bilahi amanyagaꞌ kaꞌam supaya kam tabowa ameyaꞌ ma sigām. Pangangakkal asal pangitaꞌu saga aꞌa inān. Halam aniyaꞌ kagunahanna sabab hal pali-pali bay pangꞌbba min kamattoꞌahan, maka ilmuꞌ bay min bangsa hibilis ya magbayaꞌ ma diyataꞌ ayan. Nggaꞌi ka pangitaꞌu min Al-Masi.
9 Sabab inaꞌan ma Al-Masi kajarihan Tuhan, jukup ma addatna maka ma panahuꞌanna, boꞌ paꞌin magpabaran manusiyaꞌ buwat kitam. 10 Ya du kaꞌam kabuwanan kasampulnaꞌan pagka Al-Masi ya pasōranbi. Alanga asal iya min kamemon, makapagagi ma ai-ai taga-gaꞌos, bangsa malaꞌikat ka maka bangsa saitan. 11 Aniyaꞌ bainat pangilāhan kaꞌam ya sōd ma Al-Masi, saguwāꞌ nggaꞌi ka bainat ma kuwit baranbi ya nihinang eꞌ manusiyaꞌ magiꞌislam. Ya pangilāhan kaꞌam bainat bay nihinang eꞌ Al-Masi. 12 Sababna sapantun kam aꞌa bay kinubul sambeyaꞌ maka iya, waktu kapamandi ma kaꞌam tandaꞌ palsaksiꞌan in kaꞌam sukuꞌna na. Pinakallum isab kam pabīng, pagka pasangdolanbi kawasa Tuhan ya bay amakallum si Isa pabīng min kamatayna.
13 Tagnaꞌbi inān saliꞌ kam hantang aꞌa magpatayan ma pangꞌndaꞌ Tuhan sabab masi magdusa. Bay alaꞌat kajarihanbi maka halam aniyaꞌ lamudbi ma bangsa sukuꞌ Tuhan. Daipara apinda na kahālanbi buwattinaꞌan, pinakallum na kam eꞌ Tuhan sambeyaꞌ maka Al-Masi. Niampun eꞌna dusata kamemon, 14 maka pinapasan eꞌna sulat panuntut ya pamatꞌnnaꞌan kitam. Pinuwasan kita min hukuman saraꞌ ma sabab kamatay Al-Masi ma hāg. Jari halam na aniyaꞌ sababan pamatꞌnnaꞌan kita hukuman. 15 Taraꞌug isab eꞌ Al-Masi bangsa mananasat maka ai-ai taga-kagaꞌos ma diyataꞌ ayan. Kalaꞌanan eꞌna gaꞌosan sigām ati pinahinaꞌ sigām ma mairan. Taraꞌug eꞌna kamemon ma sabab kamatayna ma hāg.
16 Angkanna kam subay mbal tasoway eꞌ sai-sai ma pasal kinakanbi maka inumanbi, atawa pasal jamu duwaꞌa atawa hinang bulan atawa hinang ma llaw mulliya. 17 Binogbog eꞌ sigām usulan inān boꞌ paꞌin hal gindan pamaentom sigām aniyaꞌ giꞌ nilagaran ma waktu sinōng, ya na Al-Masi. 18 Jagahinbi kahāpan ya panungbas kaꞌam eꞌ Tuhan boꞌ kam mbal kinulliꞌan eꞌ saga aꞌa ya maglaku-laku pasal kareyoꞌ pangatayan sigām. Anumba sigām ma saga malaꞌikat, magmalangkahi na paꞌin sigām pasal aniyaꞌ konoꞌ bay panyataꞌ ni sigām min Tuhan. Abbuhan saga aꞌa buwattēꞌ ati abowa-bowa eꞌ legot dunya, maka honaꞌ-honaꞌ halam aniyaꞌ pūsna. 19 Tuꞌud sigām pabutas min Al-Masi ya poꞌonan kallum sigām. Buwat sapantun baran, Al-Masi ya kōkna, maka kitam ya pagdayawna. Jari magdalos pagdayaw itu maka kōk pagka aniyaꞌ ugat paralosanna. Angkan kitam itu, ya dalil pagdayaw Al-Masi, pasōngna paꞌin kosogtam ma sabab Tuhan ya magkabayaꞌan.
Kapaunung ma Al-Masi
20 Sapantun kam aꞌa bay paunung ma Al-Masi ma kamatayna, sabab amatay na kam ni bay palihalanbi tagnaꞌ, ati apuwas na kam min komkoman binangsa saitan ya magbayaꞌ ma diyataꞌ ayan. Jari angay kam subay pasangdan na paꞌin ma kalꞌngnganan aꞌa kaseheꞌ ma dunya itu? 21 Angay beyaꞌbi pali-pali sigām, ya yuk-i, “Daꞌa ntanin ilu!” atawa “Daꞌa kakanun inaꞌan!” atawa “Daꞌa umasun inaꞌan!” 22 Saguwāꞌ pinjaman sadja ya pinagpali-pali eꞌ saga aꞌa inān, sabab ubus paꞌin ginuna, magtūy pahalam. Maka pali-pali inān hal pinahinang eꞌ manusiyaꞌ. 23 Nihagda kita eꞌ sigām subay magsumba ni malaꞌikat. Sinōꞌ magpareyoꞌ-deyoꞌ di-ta, maka magtiksaꞌ-tiksaꞌ di-ta. Aniyaꞌ konoꞌ paluntungan ma pangahagda sigām, sagōꞌ halam aniyaꞌ dapatna pamapaggat napsu baran.