3
1 Manjari itu, pagka Al-Masi allum na pabīng, ya du kaꞌam parakayuꞌ ma iya binuwanan kallum kakkal. Na pagka buwattēꞌ, tuyuꞌinbi ai-ai ma deyom sulgaꞌ ma kamainaꞌanan Al-Masi. Inaꞌan asal iya aningkōꞌ ma paningkōꞌan bangsahan, ma bihing Tuhan tampal ni kowan. 2 Pagmatayinbi ai-ai sukuꞌ ma sulgaꞌ, daꞌa na ai-ai ma babaw dunya itu. 3 Sabab kaꞌam ya angandol ma Al-Masi, ibarat aꞌa amatay na, halam na aniyaꞌ bayaꞌna ma alam itu. Inaꞌan asal poꞌonan kallumbi ma haddarat Tuhan, tinauꞌ pahogot eꞌ Al-Masi. 4 Sababna Al-Masi ya poꞌonan kallumbi, angkanna ma sinosōng, bang iya paꞌndaꞌ piꞌitu, magdongan du kam maka iya boꞌ aliput isab eꞌ sahayana.
Kaul-piꞌil Tagnaꞌ maka Kaul-Piꞌil Bahaꞌu
5 Angkan yukku ma kaꞌam, taikutinbi napsubi alaꞌat. Daꞌa kam magdꞌnda atawa maglꞌlla. Daꞌa kam magkasabulan, daꞌa kam magbaꞌis-baꞌis. Daꞌa kam abahaya ma pilak sabab bang altaꞌ ya paheyabi ma atay, ya na heꞌ saliꞌ pagtuhananbi. 6 Abꞌnsi Tuhan ma hinang buwattēꞌ, ya poꞌon iya amatꞌkka mulkaꞌ ni saga aꞌa agagga ma panohoꞌanna. 7 Buwattēꞌ kabiyaksahanbi tagnaꞌ, waktu lagiꞌ kam ameyaꞌ ma ai-ai kanapsuhanbi.
8 Sagōꞌ ma buwattitu subay bbahanbi bay kasuddahanbi alaꞌat inān, buwat saga magastol, magbꞌnsi ma pagkahi, maka magbꞌngngis. Daꞌa kam angalimut seheꞌbi, daꞌa isab maglakaꞌ-lakaꞌ, 9 daꞌa kam magputing ma seheꞌbi. Bay na bbahanbi kajarihanbi maka kahinanganbi tagnaꞌ. 10 Kaniyaꞌan na kam kajarihan bahaꞌu ya pinindahan na paꞌin eꞌ Tuhan Magpapanjari, supaya kam makasaliꞌ ni buwat kajarihanna. Ya mohotna in kaꞌam subay pasōng pangitaꞌubi ma iya. 11 Manjari dasaliꞌ saga aꞌa kamemon sasuku bay pinabahaꞌu na eꞌ Tuhan. Halam aniyaꞌ pagbiddaꞌan sigām, bangsa Yahudi ka maka bangsa kaseheꞌ, aꞌa magislam ka maka aꞌa halam bay magislam, ata ka maka nggaꞌi ka, sampay saga aꞌa bangsa liyu. Patꞌnnaꞌ Al-Masi ma deyom ataytam saliꞌ-saliꞌ, maka Al-Masi sadja ya katumanan ma ai-ai kamemon.
12 Bay kam tapeneꞌ eꞌ Tuhan nihinang aꞌana. Aꞌa sussi kam kinalasahan eꞌna angkan kam wajib maꞌaseꞌ ma pagkahibi samantalaꞌ ahāp addatbi ni kaseheꞌan, areyoꞌ isab maka alunuk pangatayanbi. Tatasinbi pagkahibi minsan kam niꞌinay. 13 Bang aniyaꞌ paglaꞌatanbi maka pagkahibi, sagarinbi na. Bang aniyaꞌ kapꞌddiꞌanbi atay, subay kam magampun-iyampuni. Ya pangampunbi ma pagkahibi manusiyaꞌ subay buwat kapangampun kaꞌam eꞌ Panghūꞌ Isa. 14 Maka aniyaꞌ giꞌ sugpatna aheya: subay kam alasa ma pagkahibi sabab bang kam maglasa-liyasahi ahogot du kapagdakayuꞌbi atay.
15 Magmalulus kam ma Al-Masi boꞌ kam minaliman eꞌ kasannanganna, sabab sinōꞌ kam eꞌ Tuhan subay magsulut-siyuluti, sabab kitam magpangandol ma Al-Masi sapantun dabaran du. Pagsukulinbi isab Tuhan. 16 Gomgominbi pamanduꞌ Al-Masi boꞌ pasobsob toꞌongan ni deyom ataybi. Bang kam gantaꞌ magpanduꞌ dangan maka dangan, paglagihunbi pangitaꞌu kamemon bay pamuwan kaꞌam. Magkalang kam saga kalangan pamudji Tuhan sampay kalangan makani-kaꞌam min Rū Tuhan. Magkalang kam pagka aheya pagsukulanbi ni Tuhan. 17 Entomunbi Panghūꞌ Isa ma ai-ai hinangbi maka pamūngbi, in iya pameyaꞌanbi. Maka pagsukulinbi na paꞌin Tuhan ya Mmaꞌtam labay min ōn si Isa.
Panduꞌ ma saga Aꞌa Daokoman
18 Kaꞌam karꞌndahan subay ameyaꞌ ma kabayaꞌan hꞌllabi. Patut isab, pagka si Isa ya Panghūꞌbi.
19 Kaꞌam kalꞌllahan, kalasahinbi hꞌndabi, daꞌa kabꞌngngisinbi.
20 Kaꞌam saga kamanahutan, angikut kam ma pamiꞌat mattoꞌabi sabab kasulutan Panghūꞌtam ma hinangbi buwattēꞌ.
21 Kaꞌam kamattoꞌahan, daꞌa palaꞌatunbi atay anakbi boꞌ mbal mandāꞌ-dāꞌ.
22 Kaꞌam saga tendog, subay beyaꞌbi kamemon panohoꞌan nakuraꞌbi. Daꞌa hal ma saltaꞌ sigām angꞌndaꞌ boꞌ supaya kam sinanglitan. Subay saliꞌ du ma kamainaꞌan maka ma kalikut sigām. Hinangunbi panohoꞌan sigām min deyom ataybi, ma sabab Panghūꞌ ya pagaddatanbi. 23 Subay kam atukid ma ai-ai hinangbi sabab minsan manusiyaꞌ ya paghinanganbi, Panghūꞌ Isa ya luggiyaꞌ nakuraꞌbi. 24 Kataꞌuwanbi du, Panghūꞌtam ya anungbasan kaꞌam ma sinosōng. Pinasambutan kam pusakaꞌ ya tinauꞌan saga aꞌa sukuꞌna ma sabab Al-Masi ya paghinanganbi. 25 Sasuku mbal taluwaꞌ hinangna, tinungbasan du pinapagtongod maka hinangna alaꞌat, sabab mbal amapagbiddaꞌ Tuhan ma manusiyaꞌ.