4
1 Kaꞌam saga nakuraꞌ, subay ahāp pangahatulbi ma saga sosohoꞌanbi. Ya panambabi ma sigām subay pinapagtongod maka hinang sigām, sabab kataꞌuwanbi asal aniyaꞌ pagnakuraꞌanbi mahēꞌ ma sulgaꞌ.
Pamituwa Katapusan
2 Patukid kam angarap ni Tuhan, pahāpun akkal-pamikilbi, maka pagsukulinbi Tuhan. 3 Amuꞌ-amuꞌinbi isab kami tabang bang paꞌin kami mura-murahan pinaluhaya eꞌ Tuhan boꞌ supaya kami makapagnasihat lapal pasal Al-Masi, ya lapal halam bay kinataꞌuwan ma masa awal eꞌ. Ya heꞌ poꞌonna angkan aku kinarenahan ma deyom kalabusu itu, tuꞌud aku magnasihat pasal Al-Masi. 4 Amay-amay, amuꞌinbi aku tabang min Tuhan supaya asawa eꞌku magnasihat pasal si Isa sabab ya na heꞌ bay pamahinangna ma aku.
5 Pahāpunbi addatbi tudju ni saga aꞌa ya mbal amꞌnnal ma si Isa. Bang aniyaꞌ waktu sumiyan-sumiyan, hakaꞌinbi toꞌongan sigām ma pasalna. 6 Ai-ai pamissalabi subay ahanunut sadja, boꞌ supaya kasulutan sasuku akale. Subay kam ataꞌu isāb anambungan sasuku anilaw kaꞌam.
Bissala Pamaꞌiran
7 Aniyaꞌ lapal ma pasal kahālanku binowahan kaꞌam eꞌ si Tikikus. Danakantam iya, aꞌa landuꞌ kinalasahan. Danseheꞌan iya maka kami maghinang ma Panghūꞌ Isa, aꞌa kapangandolan isab. 8 Makabāk kam kalasigan bang iya angahati kaꞌam pasal kahālan kami itu, ya poꞌon iya sōꞌku piꞌilu. 9 Bay paseheꞌku ma iya si Onesimus, aꞌa dalahat maka kaꞌam. Danakantam iya kinalasahan maka kapangandolan. Kahakaꞌan kam eꞌna pasal saga pakaradjaꞌan maitu kamemon.
10 Si Aristarkus, seheꞌku ma deyom kalabusu itu, amabeyaꞌ minsan laꞌa hal lapalna ma kaꞌam. Ya du si Markus itu, kaki si Barnabas. Bay na kam hakaꞌanku pasal si Markus. Bang iya gantaꞌ pahapit ni lahatbi ilu subay iya patuntulunbi pahāp-hāp. 11 Itiyaꞌ isab si Yussaꞌ ya niranglay Justus, amabeyaꞌ isab lapalna ma kaꞌam. Luwal tꞌllungan itu ya bangsa Yahudi aneheꞌan aku magnasihat pasal pagparinta Tuhan. Aheya toꞌongan panabang sigām ma aku.
12 Si Epapras amabeyaꞌ isab minsan laꞌa hal lapalna. Sosohoꞌan iya ma si Isa Al-Masi, aꞌa min lahatbi du isab. Angamuꞌ-ngamuꞌ iya pakosog ma sababbi sakahabaꞌ waktu, bang paꞌin ahogot pameyaꞌbi ma kabayaꞌan Tuhan boꞌ supaya kam asampulnaꞌ ma kaul-piꞌilbi, ma halam aniyaꞌ hawal-hawal ma deyom ataybi. 13 Makasaksiꞌ du aku ma pasal si Epapras itu. Bay iya magsangsāꞌ ma sababbi sampay ma saga aꞌa ma daꞌira Laodikiya maka ma daꞌira Hirapulis. 14 Maka itiyaꞌ isab si Lukas ya doktol kalasahantam, maka si Demas. Ya du sigām duwangan itu amabeyaꞌ isab lapal sigām.
15 Amabeyaꞌ aku lapal pagaddatku ma saga danakantam ma Laodikiya, maka ma si Nimpa. Lapayun isab kajamaꞌahan Al-Masi ya magtipun ma lumaꞌna.
16 Bang aubus na eꞌbi amassa sulat itu palanjalunbi lagiꞌ ni saga jamaꞌa si Isa Al-Masi ya magtipun ma daꞌira Laodikiya inān boꞌ tabassa eꞌ sigām. Amuꞌunbi isab sulat bay pabeyaꞌanku sigām, ati bassahunbi isab heꞌ-i.
17 Hakaꞌinbi si Arkippus ilu: “Amay-amay. Talusun hinang bay pamahinang kaꞌa eꞌ Panghūꞌ Isa sabab iya ya paghinangannu.”
18 Sugpatanku isab daꞌayat maka sulatan tanganku du. Nientom du kam eꞌku, eꞌ si Paul. Daꞌa aku takalipatunbi pagka itiyaꞌ aku ma deyom kalabusu kinarenahan.
Mura-murahan, bang paꞌin kam pinaniyaꞌan tatabangan eꞌ Tuhan. Wassalam