Pilipi i

PILIPI

Pahati pasal sulat itu

Pilipi itu dakayuꞌ daꞌira aheya ma lahat Makidunya. Ma lahat Girīk asal sagoꞌ ma deyoꞌan pagparinta Rōm ma waktu si Paul. Bay makapagnasihat si Paul mainaꞌan ma Pilipi tagnaꞌ katꞌkkana ni lahat Makidunya, ati aheka aꞌa bay magkahagad ma si Isa Al-Masi. Ahogot toꞌongan pangandol sigām ma Panghūꞌ Isa, maka magkalasa isab sigām maka si Paul. Minsan iya makalikut min Pilipi, maumu tibawna pabīng saga bagayna mainaꞌan. Lāgi pinatuntul iya eꞌ sigām.

Palabay paꞌin daka pilantahun min waktu katꞌnnaꞌ si Paul ma Pilipi, kinalabusu iya ma sabab pagnasihatna. Takale paꞌin eꞌ saga Almasihin ma Pilipi in si Paul waꞌi takalabusu, magtūy sigām bay amabeyaꞌ danakan sigām si Epaprode amowahan iya balanjaꞌ.

Na, ya na itu sababanna angkan sinulat eꞌ si Paul sulat itu: kaissana, pinabeyaꞌ eꞌna lapal pagsukulna ma sabab tabang maka lasa sigām. Karuwana, sinōꞌ sigām amahogot pangandol sigām ma si Isa Al-Masi, maka sinōꞌ kinōgan minsan ma deyom kasigpitan. Katꞌlluna, sinōꞌ sigām angahalliꞌ ma saga guru putingan.