6
Aꞌa Magtautaiꞌanak
1 Kaꞌam saga ondeꞌ-ondeꞌ, beyaꞌunbi pamiꞌat inaꞌ-mmaꞌbi, sabab patut koꞌ itu ma sasuku angandol ma Panghūꞌ Isa. 2 Ikutunbi panohoꞌan bay tasulat ma Kitab, ya muna-muna panohoꞌan sinugpatan janjiꞌ eꞌ Tuhan. Yuk-i, “Wajib kam magaddatan mmaꞌbi maka inaꞌbi.” 3 Maka buwattitu sugpatna, “boꞌ supaya kam makani-kahāpan, sampay atahaꞌ umulbi maitu ma dunya.”
4 Kaꞌam saga mattoꞌa, subay ahanunut bowahanbi ma saga anakbi boꞌ mbal mandāꞌ-dāꞌ. Ya pamiꞌatbi maka pamanduꞌbi ma sigām subay makasulut atay Panghūꞌtam.
Ata maka Tag-Ata
5 Kaꞌam saga ata, beyaꞌunbi panohoꞌan nakuraꞌbi maitu ma dunya. Ya hinangbi ma sigām subay hilas min atay poteꞌ, buwat Al-Masi ya paghinanganbi. Subay kam magmatāw maka magaddat ma sigām. 6 Subay ahāp hinangbi, nggaꞌi ka hal ma waktu kapangaliling sigām ma kaꞌam, supaya kam nihulmat eꞌ sigām. Hinangunbi panohoꞌan sigām hilas min deyom ataybi ma sabab Al-Masi ya paꞌatahanbi. 7 Hinangunbi pahāp ai-ai pamahinang kaꞌam sabab nggaꞌi ka hal manusiyaꞌ ya paghinanganbi, sampay isab Panghūꞌtam. 8 Sabab kataꞌuwanbi asal, sai-sai ahāp hinangna, ata maka nggaꞌi ka, tinungbasan iya ahāp eꞌ Panghūꞌtam.
9 Kaꞌam saga nakuraꞌ, subay ahatul addatbi ma saga panendogbi. Daꞌa sanggupinbi, sabab dakayuꞌ du nakuraꞌ ya magnakuraꞌan kaꞌam saliꞌ-saliꞌ, nakuraꞌ ka atawa ata. Ya na si Isa ya pagnakuraꞌanbi ma deyom sulgaꞌ, ya mbal amapagbiddaꞌ manusiyaꞌ bang angahukum.
Saga Panyap Pangatu ma Nakuraꞌ Saitan
10 Buwattitu ya pamituwaku katapusan: pahogotunbi na pangandolbi sabab Panghūꞌ Isa ya parakayuꞌanbi. Paggunahunbi kosogna akawasa. 11 Sapantun kam sundalu binowa magbonoꞌ, angkan kam subay magpanyap maka panyap kamemon ya pamuwan eꞌ Tuhan pangatubi, boꞌ kam makaꞌatu ma nakuraꞌ saitan. 12 Nggaꞌi ka pagkahi manusiyaꞌ ya seheꞌta magbonoꞌ, sagōꞌ binangsa mananasat ya makapagbayaꞌ ma tongaꞌan ayan, maka bangsa mbal taꞌndaꞌ mata, ai-ai taga-gaꞌos atawa ntan, sampay baꞌanan kawasa ma deyom kalendoman. 13 Angkan kam sohoꞌku: sakapunbi na panyap kamemon ya pamuwan kaꞌam eꞌ Tuhan. Jari bang patꞌkka llaw kapanasat kaꞌam eꞌ saitan, aniyaꞌ na pangatubi ati mbal kam taraꞌug. Bang taꞌambatbi kamemon ya pamahinang kaꞌam eꞌ Tuhan, tantu kam mbal angaku-daꞌug.
14 Manjari patanam kam buwat ibarat sundalu. Pakambotunbi kasabꞌnnalan pangahampan hawakanbi. Gunahunbi hinang abontol panampan daggahabi. 15 Subay kam asakap magpatanyag lapal pasal kapaghāp Tuhan maka manusiyaꞌ. Ya heꞌ saliꞌ sapantun pataumpaꞌbi. 16 Bowahunbi pangandolbi sakahabaꞌ waktu boꞌ tasagangbi panaꞌ arokot, hatina ai-ai panasat kaꞌam eꞌ saitan ya patilaꞌatun. 17 Kannalunbi pangitaꞌubi in kaꞌam tantu lappasan. Ya heꞌ saliꞌ saruk basiꞌ pangagpang kōkbi. Pangatuhunbi palman Tuhan, sapantun kalis pamuwan kaꞌam eꞌ Rū Tuhan pakokosbi. 18 Subay kam taptap anabbut ni Tuhan labay min Rū-na. Amuꞌ-amuꞌunbi ni iya ai-ai kasusahanbi sakahabaꞌ waktu, min kawasa maka kataꞌu ya pamuwan Tuhan ma kaꞌam. Daꞌa kam sinumu pajaga, angabut-ngabut kam angamuꞌan tabang saga pagkahibi sukuꞌ Tuhan kamemon.
19 Amuꞌinbi isab aku tabang ni Tuhan bang paꞌin aku buwananna bissala ma waktu kapagnasihatku, boꞌ aku makatawakkal amahati saga aꞌa pasal lapal ahāp, ya pinabukis na eꞌ Tuhan. 20 Bay aku kawakilan magnasihat lapal itu, angkan aku itiyaꞌ na ma deyom kalabusu. Angamuꞌ-ngamuꞌ kam ni Tuhan, bang paꞌin aku aesog magpasaplag palman buwat bay pamaꞌatas aku eꞌ Tuhan.
Bissala Katapusan
21-22 Papiꞌiluku ni kaꞌam si Tikikus, danakantam kinalasahan, aꞌa kapangandolan isab ma kahinanganna tudju ni Panghūꞌtam. Piꞌilu du iya amowahan kaꞌam habal pasal ai-ai kamemon ya makani-kami itu. Kahakaꞌan isab kam bang ai na paꞌin kahālanku maka hinangku, maka bang ai kahālan kami itu kamemon. Pinahogot eꞌna pangatayanbi.
23 Buwattitu pangamuꞌ-ngamuꞌku ma pasal saga dauranakan mailu: bang paꞌin sigām pinaniyaꞌan kasannangan atay maka lasa maka pangandol ahogot, deyoꞌ min Mmaꞌtam Tuhan maka Panghūꞌtam Isa Al-Masi. 24 Mura-murahan, bang paꞌin kaniyaꞌan tatabangan kamemon saga aꞌa ya taptap lasa sigām ma Panghūꞌtam si Isa Al-Masi. Wassalam