5
Saga Kahinangan Abontol
1 Panganak Tuhan na kam landuꞌ kinalasahan, angkan kam subay ameyaꞌ-meyaꞌan kajarihanna. 2 Subay kam alasa na paꞌin, buwat kalasa Al-Masi ma kaꞌam. Bay paglillaꞌna baranna ni kamatay ma sababbi, tinukbal ni Tuhan saliꞌ dalil pagkulban, saliꞌ lalabotan ahāp hamutna pamasulut atay Tuhan.
3 Kaꞌam ilu, pagka kam palsukuꞌan Tuhan, subay mbal na maghinang kalaꞌatan dꞌnda maka lꞌlla atawa maghinang kahinaꞌan, atawa dumasiyaw magnapsu ai-ai. Mbal tapagsuli-suli saga kahinangan buwattēꞌ. 4 Mbal apatut isab bang kam maglakaꞌ-lakaꞌ atawa magsuli-suli karupangan atawa maglata kasabulan. Ya patut hinangbi magsukul ni Tuhan. 5 Pataꞌu kam toꞌongan, sasuku maghinang kasabulan, atawa magkahinaꞌan dꞌnda maka lꞌlla, atawa bahaya pilak, napsuna ya pagtuhanan aꞌa inān. Tantu halam aniyaꞌ lamudna ma deyom pagparintahan Al-Masi maka Tuhan. 6 Painsap kam boꞌ mbal kaꞌakkalan eꞌ bissala halam pūsna. Hakaꞌanta ka, dusa buwattēꞌ ya sababan angkan pinataluwaꞌan mulkaꞌ eꞌ Tuhan saga aꞌa agagga ma iya. 7 Angkan kam bandaꞌanku, daꞌa kam palamud ma saga aꞌa buwattēꞌ.
8 Tagnaꞌ, bay kam sapantun ma deyom kalendoman, sagōꞌ ma karantaꞌan na kam sabab Panghūꞌ Isa ya pasōranbi. Subay ahantap maka asaltun kajarihanbi pagka kam aꞌa ma deyom karantaꞌan na. 9 Sasuku ma deyom karantaꞌan, kahāpan maka kaꞌadilan maka kasabꞌnnalan ya kamattihanna. 10 Panuyuꞌinbi ai-ai makasulut atay Panghūꞌtam. 11 Daꞌa kam palamud ma hinang halam pūsna, ya nihinang na paꞌin ma kalendoman. Padpad kam palamud, gom paꞌin patanyagunbi laꞌatna. 12 Makaiyaꞌ-iyaꞌ ya nihinang eꞌ saga aꞌa ma deyom limbung, subay mbal minsan pinagsuli-suli. 13 Sagōꞌ taꞌndaꞌan di-na ai-ai kamemon bang taluwaꞌ kasawahan, 14 sabab asawa asal. Angkan takallam ma ayat Kitab, ya yuk-i,
“Kaꞌa atuli ilu, abatiꞌ na ka.
Pabangun ka min kamataynu,
ati taluwaꞌ ka kasawahan Al-Masi.”
15 Jari pahatul-hatul kam boꞌ ahāp bowahanbi ma kaul maka piꞌil. Palalomunbi akkalbi, daꞌa beyaꞌ-beyaꞌunbi akkal karupangan. 16 Tukirinbi hinang ahāp sakahabaꞌ waktu, sabab aheka kalaꞌatan nihinang ma patahunan ītu. 17 Daꞌa kam magkarupangan, sagōꞌ patukid kam anganad bang ai kahandak Panghūꞌtam pamahinangna kaꞌam.
18 Daꞌa kam maglango binu sabab makamula koꞌ inān. Ahāp lagiꞌ kam kahōpan eꞌ Rū Tuhan. 19 Bang kam maglanggal maka pagkahibi jamaꞌa Al-Masi, paggunahunbi bissala min Kitab, maka kalangan ginisan pamudjibi Tuhan. Magkalangan kam pamudjibi Tuhan, pamaheyabi iya, luwas min bowaꞌbi maka min deyom ataybi. 20 Subay kam magsukul ni Mmaꞌtam Tuhan sakahabaꞌ waktu ma pasal ai-ai kamemon, sabab Panghūꞌ Isa Al-Masi ya pamanyabutanbi.
Pasal Aꞌa Maglakibini
21 Subay kam magmalulus dangan maka dangan, pagka Al-Masi ya pagtaꞌatanbi. 22 Kaꞌam karꞌndahan, subay asulut ma kabayaꞌan hꞌllabi, buwat kasulutbi ma Panghūꞌtam. 23 Hꞌllabi ya pagmakōkanbi, buwat Al-Masi ya pagmakōkan ma kitam saga aꞌana. Manglalappas asal iya. 24 Magmalulus ma iya saga jamaꞌana kamemon, damikiyanna kaꞌam karꞌndahan subay magmalulus ma hꞌllabi ma ai-ai kabayaꞌan sigām.
25 Kaꞌam kalꞌllahan, kalasahinbi hꞌndabi, buwat ka-eꞌ Al-Masi alasahan kitam saga aꞌana. Bay paglillaꞌna baranna pinapatay ma sabab kitam, 26 supaya kitam pinasukuꞌ ma Tuhan sadja. Sinussi kitam eꞌ Al-Masi min lapalna maka min boheꞌ, 27 boꞌ supaya halam aniyaꞌ dusa panāꞌan kitam, maka halam aniyaꞌ tamaktam, atawa limpaꞌ atawa sallaꞌ. Jari aninag kitam kajamaꞌahanna ati tinaimaꞌ eꞌna sapantun pangantin dꞌnda. 28 Damikiyanna isab kaꞌam kalꞌllahan, subay alasahan hꞌndabi buwat eꞌbi alasahan baranbi. Bang kam alasa ma hꞌndabi, saliꞌ kam alasahan ginhawa-baranbi. 29 Sabab halam aniyaꞌ abꞌnsihan baranna, gom paꞌin pakanna maka pahilalaꞌna pahāp, buwat kapahilalaꞌ Al-Masi ma kitam saga jamaꞌana, 30 sabab sapantun kitam pagdayaw baranna. 31 Tasulat koꞌ itu ma deyom Kitab, ya yuk-i, “Ya na itu sababanna angkan aꞌa angꞌbba min inaꞌ-mmaꞌna, boꞌ papūn ni hꞌndana. Jari dabaran na sigām karuwangan.” 32 Alalom bissala inān, mbal agon tahati. Bang ma bistahanku, Al-Masi maka kajamaꞌahanna ya sinambat inān. 33 Malaingkan kaꞌam kalꞌllahan subay alasahan kahꞌndaꞌanbi buwat eꞌbi alasahan baranbi, maka kaꞌam karꞌndahan subay magaddatan kahꞌllaꞌanbi.