4
Pagdaꞌatay saga Bebeyaꞌan Al-Masi
1 Na, pagka aku pilisu ma sabab pameyaꞌku ma Panghūꞌtam, aniyaꞌ amuꞌku ni kaꞌam: angutunbi palantara ya tōp ma sasuku pineneꞌ eꞌ Tuhan. 2 Subay areyoꞌ pangatayanbi, subay ahanunut bissalabi maka subay kam angimanan pagkahibi. Magkaꞌinagon kam dangan-parangan, tandaꞌ lasabi. 3 Amanuyuꞌ kam magsulut-siyuluti boꞌ taptap kapagdakayuꞌbi atay, ya pamuwan kaꞌam eꞌ Rū Tuhan. 4 Kitam magpangandol saliꞌ dalil pagdayaw baran Al-Masi, boꞌ baranna dakayuꞌ du. Dakayuꞌ du Rū Tuhan maka dakayuꞌ du isab pangaholatantam, waktu kapameneꞌ Tuhan ma kitam. 5 Dakayuꞌ du Panghūꞌ, dakayuꞌ du pangandolantam, maka dakayuꞌ du pagpandi. 6 Dakayuꞌ du Tuhan ya pagꞌmmaꞌan ma binangsa manusiyaꞌ kamemon. Magnakuraꞌ iya ma kamemon, taꞌabut kamemon eꞌ kawasana maka itiyaꞌ na iya ma deyom ataytam kamemon.
7 Binuwanan kitam kapandayan pakaniya-pakaniya, ai-ai ya panganggantaꞌ eꞌ Al-Masi. 8 Buwat bay tasulat ma deyom Kitab, ya yuk-i,
“Waktu kaꞌangkatna ni sulgaꞌ
aheka pilisu bay tabowana.
Ati pamuwanna kahāpan ma manusiyaꞌ.”
9 Na, buwattitu hatian ya yukna heꞌ, “pariyataꞌ ni sulgaꞌ”. Hatina in iya bay pareyoꞌ ni dunya itu dahū, ni deyoꞌna katapusan, boꞌ yampa pariyataꞌ. 10 Jari ya aꞌa bay pareyoꞌ, iya isab bay paꞌangkat pabalik ni liyu saga langit, boꞌ supaya aliput eꞌna kamemon. 11 In iya isāb bay amuwan saga aꞌa kawakilan magnasihat, maka aꞌa taga-kapandayan amaluwas bissala Tuhan, maka aꞌa magpasaplag lapal ahāp, maka aꞌa ataꞌu amanduꞌ maka angupiksaꞌ saga jamaꞌa. 12 Ya poꞌon aniyaꞌ kapandayan buwattēꞌ ma kajamaꞌahan Al-Masi, boꞌ supaya asakap saga aꞌa sukuꞌ Tuhan kamemon maghinang ai-ai, maka supaya pahogot gom paꞌin saga pagdayaw ya pagsambatta baran Al-Masi. 13 Jari makaꞌabut du kitam kamemon pinapagdakayuꞌ atay ma pangandoltam maka ma pangitaꞌutam pasal Anak Tuhan. Jari ajatu kitam ma kaul maka piꞌil buwat kajatu Al-Masi.
14 Mbal na kitam saliꞌ ondeꞌ-ondeꞌ halam aniyaꞌ panahuꞌanna, mbal na ‘tabowa papꞌllay eꞌ baliyu atawa goyak,’ hatina panduꞌ indalupa ginis ya pinahinang eꞌ saga guru pangangakkal, panganjallat ma sasuku mbal giꞌ asangpot. 15 Padpad kitam kaddasan ma kaondeꞌ-ondeꞌtam, gom giꞌ kitam amanuyuꞌ magbissala kasabꞌnnalan luwas min lasatam dangan-parangan, ati pasangpot kitam ma kaul maka piꞌil boꞌ pasaliꞌ ni Al-Masi. In iya pagmakōkantam maka kitam sapantun pagdayaw baranna, 16 ati magbatuk-biyatuki baꞌanan pagdayaw itu, magsugpat pahāp min ugat ya karalosanna. Jari bang ajatu na kahinangan pagdayaw kamemon, pasulig du katibuꞌukantam. Buwattēꞌ isab ma kitam baran Al-Masi, maglasa-liyasahi kitam boꞌ ajatu kahinangantam dangan maka dangan, ati tantu aniyaꞌ kasōngantam.
Kaul-piꞌil ya Tōp ma Aꞌa Sōd ma Al-Masi
17 Magbandaꞌ aku ma kaꞌam sabab aniyaꞌ kapatutku min Panghūꞌtam. Pahali kam ameyaꞌ ma kasuddahan saga aꞌa ya mbal magtaꞌat ni Tuhan, ya kulang pūs ma pamikil sigām. 18 Kalaungan akkal sigām maka halam aniyaꞌ lamud sigām ma kallum ya pamuwan eꞌ Tuhan. Tuꞌud sigām magmatuwas di-sigām angkan mbal ataꞌuwan iya. 19 Mbal sigām ataꞌu aiyaꞌ, gom paꞌin sigām angandūlan di-sigām maghinang kasabulan makamaru. Paddas sigām maghinang kalumuꞌan duhun manduhun.
20 Sagōꞌ nggaꞌi ka buwattēꞌ ya pakataꞌubi pasal Al-Masi. 21 Tantu kam bay makakale ma pasalna, bay kam pinanduꞌan kasabꞌnnalanna labay min lapal ahāp pasal si Isa. 22 Angkanna kam subay angꞌbba min bay kabiyaksahanbi tagnaꞌ. Bbahinbi kajarihanbi tagnaꞌ, waktu kam tabowa-bowa eꞌ saga napsu baran pangangakkal. 23 Subay kam pinabahaꞌu toꞌongan ma itikadbi maka panahuꞌanbi. 24 Sulugunbi kajarihanbi bahaꞌu (sapantun badjuꞌ) ya pinaniyaꞌan kaꞌam eꞌ Tuhan boꞌ kam makasaliꞌ ni iya ma kabontolan maka kasussihan atay.
25 Angkan koꞌ kitam subay pataikut min pagputing. Ai-ai pahꞌllingta ma pagkahita subay bꞌnnal sadja, sabab dambeyaꞌan kitam, sapantun pagdayaw baran Al-Masi. 26 “Bang kam gantaꞌ angastol, pahalliꞌ kam boꞌ mbal tabowa angahinang alaꞌat.” Daꞌa buku-bukuhinbi pangastolbi sampay ni kakohapan. 27 Kamayaꞌ-mayaꞌ kam boꞌ halam aniyaꞌ lawang pasōran nakuraꞌ saitan anasat kaꞌam. 28 Bang aꞌa bay panangkaw subay angꞌbba min pagtangkawna. Subay iya amiha pagusaha alaba, jari bang manglabi-labihan na aniyaꞌ du paꞌin panulungna ma saga aꞌa miskin. 29 Daꞌa kam amaluwas bissala asabul. Ai-ai pamissalabi subay panabang sadja ma kaseheꞌanbi, pamahāp panghati sigām ma ai-ai kagunahan. Bang buwattēꞌ, aniyaꞌ kasōngan ma sasuku makakale. 30 Daꞌa pabakatunbi atay Rū Sussi min Tuhan, ya pinatulunan kaꞌam boꞌ aniyaꞌ palsaksiꞌan in kaꞌam pinalimaya du ma llaw damuli. 31 Timaninbi kotoꞌ-kotoꞌ deyom ataybi kamemon, maka astolbi. Daꞌa pakawasunbi ataybi, daꞌa kam angamahit atawa angalimut, daꞌa isab kam anganjingki ma sai-sai. 32 Saguwāꞌ hāpunbi seheꞌbi, kaꞌaseꞌinbi. Magampun-iyampuni kam, buwat bay pangampun kaꞌam eꞌ Tuhan sabab min Al-Masi.