3
Si Paul Magnasihat ma saga Aꞌa Nggaꞌi ka Yahudi
1 Ya itu sababanna angkan aku angamuꞌ-ngamuꞌ ni Tuhan ma pasalbi. Aku si Paul, pilisu Al-Masi ma sabab kaꞌam ya bangsa nggaꞌi ka Yahudi. 2 Tantu takalebi pasal hinang bay pamaꞌatas ma aku eꞌ Tuhan sabab min aseꞌna maka lasana, hinang pamowa kaꞌam ni kahāpan. 3 Bay aku pinabukisan eꞌ Tuhan maksudna ya halam bay kinataꞌuwan eꞌ manusiyaꞌ. Bay na kam sulatanku pasal itu, sagōꞌ kapuꞌutanna hal. 4 Jari bassahunbi sulat itu boꞌ tahatibi bang ai bay pinabukis ni aku pasal Al-Masi. 5 Halam itu bay pinataꞌu ni manusiyaꞌ ma masa awal, sagōꞌ pinabukis na eꞌ Rū Sussi ni saga aꞌa kawakilan maka ni kanabi-nabihan asussi. 6 Ya na itu bay pamabukis eꞌ: dambeyaꞌan na saga aꞌa nggaꞌi ka Yahudi maka bangsa Israꞌil ma sabab lapal ahāp pasal si Isa Al-Masi ya tapagsabꞌnnalbi na. Sapantun sigām pagdayaw baran dakayuꞌ-kayuꞌ, maka saliꞌ-saliꞌ sigām pinaniyaꞌan janjiꞌ pagka sōd si Isa Al-Masi na.
7 Bay aku kabuwanan hinang eꞌ Tuhan subay magnasihat lapal ahāp, ati katulunan aku kapandayan min kawasana. 8 Areyoꞌ aku min saga aꞌa sukuꞌ Tuhan kamemon, sagōꞌ nihāp aku eꞌna. Sinōꞌ aku angalapal ni saga aꞌa bangsa nggaꞌi ka Yahudi pasal anughalaꞌ mbal tapulaꞌ-pulaꞌ ya pamaniyaꞌ sigām min Al-Masi. 9 Sinōꞌ aku amahati manusiyaꞌ kamemon ma pasalan maksud Tuhan bang buwattingga kalꞌngngananna. Halam bay pinabukis maksud itu ni sai-na sangay min awal tagnaꞌ. Tuꞌud bay kinuli-kulihan asal eꞌ Tuhan, ya magpapanjari ma kamemon. 10 Jari ya na itu maksud Tuhan: subay pinahati saga bangsa malaꞌikat maka bangsa gaꞌosan ma diyataꞌ ayan pasal kalalom pangitaꞌu Tuhan ma indalupa ginis, ya pinaluwas eꞌna labay min palhimpunan saga jamaꞌa Al-Masi. 11 Ya na koꞌ itu maksud Tuhan bay niniyat eꞌna dahū lagiꞌ min awal tagnaꞌ, ya tatuman eꞌna labay min si Isa Al-Masi Panghūꞌtam. 12 Alimaya na kitam pasōd sampay ni haddarat Tuhan, mbal na tināw sabab Al-Masi ya parakayuꞌantam maka pangandolantam. 13 Angkan amuꞌku ni kaꞌam, daꞌa bbahinbi pangimanbi ma sabab aniyaꞌ katiksaꞌan kalabayanku itu. Ma kahāpbi du angkan subay pagkoyaganbi.
Pangamuꞌ-ngamuꞌ ma Pasal saga Aꞌa Epesos
14 Angkanna aku pasujud ma alopan Mmaꞌtam Tuhan, 15 ya poꞌonan ma pagꞌmmaꞌan kamemon, ai na ka ma sulgaꞌ, ai na ka ma dunya. 16 Angamuꞌ aku duwaꞌa ni Tuhan bang paꞌin kam paniyaꞌanna kawasa luwas min barakatna mbal tapulaꞌ-pulaꞌ, labay min Rū-na Sussi ya patꞌnnaꞌ ma iman-nyawabi. 17 Ya angutku bang paꞌin pataptap Al-Masi ma deyom pangatayanbi ma sabab pangandolbi ma iya. Angamuꞌ aku junjung isab bang paꞌin ahogot lasabi sapantun kayu alalom gamutna, atawa lumaꞌ ahāp papaganna. 18 Bang paꞌin kam maka aꞌa sukuꞌ Tuhan kamemon pinaniyaꞌan barakat boꞌ kasakupanbi lasa Al-Masi, luhana, langana, tahaꞌna, maka lalomna. 19 Mura-murahan, bang paꞌin kataꞌuwanbi lasa itu, ya mbal tatꞌkkad eꞌ pangitaꞌu manusiyaꞌ, boꞌ supaya kam tinulunan manglabi-labihan min katubus Tuhan.