2
Kapinda min Kamatay ni Kallum
1 Na, ma waktu palabay in kaꞌam ilu bay saliꞌ aꞌa patay ma pangꞌndaꞌ Tuhan ma sabab sallaꞌ maka dusa ya tahinangbi. 2 Bay kam ameyaꞌan addat-tabiꞌat alaꞌat ya pameyaꞌan saga aꞌa baldusa ma dunya itu. Pameyaꞌanbi isab nakuraꞌ saitan, ya pagnakuraꞌan saga bangsa mananasat min diyataꞌ ayan, ya pameyaꞌan isab eꞌ saga manusiyaꞌ agagga ma panohoꞌan Tuhan. 3 Maglamugay asal kitam maka saga aꞌa inān magdūlan napsutam, maghinang ai-ai makahāp palasahan barantam, abowa-bowa eꞌ honaꞌ-honaꞌtam asabul. Bay kitam dasaliꞌ maka manusiyaꞌ kaseheꞌ angkan kitam pagmulkaꞌan eꞌ Tuhan.
4 Daipara aheya kaꞌaseꞌ Tuhan. Apaslod lasana 5 angkan kitam pinakallum eꞌna sambeyaꞌ maka Al-Masi, minsan kita bay saliꞌ sapantun patay ma sabab bay kahinangantam alaꞌat. Min kaꞌaseꞌ Tuhan maka min lasana ya angkan kam lappasan. 6 Pinakallum kitam sambeyaꞌ maka Al-Masi, ati pinapagdakayuꞌ kitam maka iya boꞌ magbayaꞌ maka iya minnaꞌan min lahat sulgaꞌ. 7 Buwattēꞌ hinang Tuhan boꞌ supaya taꞌndaꞌan di-na salama-lama in aseꞌna maka lasana mahal-mahal du paꞌin, mbal toꞌongan tasipat. Taꞌndaꞌ asal ma kahinangan si Isa Al-Masi bang buwattingga kahāp Tuhan tudju ni kitam. 8 Sabab min aseꞌ maka lasa Tuhan ya angkan kam lappasan, ma sabab pangandolbi ma Al-Masi. Nggaꞌi ka min kahinanganbi, tuꞌud pamuwan Tuhan ma kaꞌam.
9 Mbal kam makapagmalangkahi ma baranbi, sabab nggaꞌi ka min hulas-sangsāꞌbi ya angkan kam lappasan. 10 Hinangan Tuhan du kita, tapabahaꞌu eꞌna ma sabab si Isa Al-Masi ya pasōranta, boꞌ supaya taꞌambatta saga hinang ahāp ya panganggantaꞌan kita eꞌ Tuhan.
Kapagdakayuꞌ saga Bebeyaꞌan Al-Masi
11 Jari entomunbi bay kahālanbi dahū. Saddī bangsa kam, ya pinagsambatan eꞌ saga Yahudi “aꞌa halam bay makalabay pagislam”. Ya pangōn saga Yahudi di-sigam: “Bangsa magiꞌislam”, sabab aniyaꞌ bainat hinangan manusiyaꞌ ma kuwit baran sigām. 12 Entomunbi, bay kam alawak asal min Al-Masi ma waktu tagnaꞌ inān. Aꞌa liyu kam halam aniyaꞌ lamud ma bangsa Israꞌil, ya bangsa palsukuꞌan Tuhan. Halam isab aniyaꞌ lamudbi ma kapagsulutan ya bay panganjanjiꞌ Tuhan ma saga aꞌa sukuꞌna. Bay halam aniyaꞌ holatanbi ma dunya itu, lāgi halam aniyaꞌ Tuhan panaꞌatanbi. 13 Daipara ma buwattinaꞌan, in kaꞌam bay alawak sidda min Tuhan pinasekot na sabab min kamatay Al-Masi ati sōd na kam ma iya. 14 Sabab baran Al-Masi bay amowahan kitam kasannangan, ati dabangsa na kitam, bangsa Yahudi maka nggaꞌi ka. Pinahalam eꞌ si Isa agpang ya bay makabahagiꞌ-duwa bangsatam, hatina pinahalam eꞌna bay pagbantahan. 15 Tinangbus na eꞌ Al-Masi in saraꞌ agama maka panohoꞌanna bay pamogbogan bangsa Yahudi. Ya maksudna, in bay duwa bangsa subay dabangsa na, bangsa bahaꞌu, pagka sōd saliꞌ-saliꞌ ma iya. Jari maghāp na kitam, magsulut-siyuluti. 16 Lāgi pinapaghāp maka Tuhan sigām karuwa bangsa, labay min kamatay si Isa ma hāg. Pinahalam eꞌna pagbantahan Yahudi maka bangsa saddī. 17 Bay piꞌitu Al-Masi anganasihatan kitam kamemon, kaꞌam ya bay alawak min Tuhan maka kaꞌam ya asekot. Ya panganasihatna ni kitam, makajari na kitam maghāp maka Tuhan 18 sabab in kitam kamemon makapagbalharap na maka Tuhan labay min Al-Masi pagka tinabangan saliꞌ-saliꞌ eꞌ Rū-na dakayuꞌ-kayuꞌ.
19 Hatina in kaꞌam nggaꞌi ka Yahudi mbal na kaōnan aꞌa liyu atawa aꞌa saddī, sabab dabangsa na kam maka saga aꞌa bay palsukuꞌan Tuhan tagnaꞌ. Dampalanakan kam ma okoman Tuhan. 20 Jari in kitam kamemon saliꞌ dalil lumaꞌ. Bay nihinang papaganna eꞌ saga aꞌa kawakilan si Isa maka eꞌ saga kanabihan, boꞌ si Isa Al-Masi ya saliꞌ dalil batu pamahogot kamemonna. 21 Al-Masi ya pamabatukan pagdayaw maka panyapna kamemon, boꞌ pasōng heyana sampay tahinang langgal pangarapan ni Panghūꞌ. 22 Kaꞌam isab, pagka sōd na kam ma Al-Masi, saliꞌ dalil pagdayaw lumaꞌ. Pinapagdakayuꞌ kam, pinapagbatuk boꞌ kam manjari lumaꞌ patꞌnnaꞌan Tuhan, sabab min Rū-na ya patꞌnnaꞌ ma deyom pangatayanbi.